የተጣሩ መረጃዎች

ሀሰት፡ ይህ የሰው ልጅ ሲቃጠል የሚያሳየው ምስል ኢትዮጵያ ውስጥ የተፈፀመ አይደለም

ከ39ሺህ በላይ ተከታይ ያለው የፌስቡክ ገፅ ህዳር 26 ፤ 2015 ዓ.ም ላይ “ይህ ፊልም አይደለም እዚሁ ሀገራችን ውስጥ ነው” የሚል ፅሁፍን በማያያዝ አንድ ምስልን አጋርቶ ነበር።

ይህ ፅሁፍ ለንባብ እስከበቃበት ጊዜ ድረስ ይህ የፌስቡክ ፖስት ከ260 በላይ ግብረ-መልስን ሲያገኝ ከ60 ጊዜ በላይ መጋራት ችሏል።

ይሁን እንጂ ሀቅቼክ ምስሉ የቆየ እና በአሁኑ ሰዓት በኢትዮጵያ ውስጥ ካለው ወቅታዊ ሁኔታ ጋር የተያያዘ እንዳልሆነ በማረጋገጥ ምስሉን ሀሰት ብሎታል።

ምስሉ ለመጀመሪያ ጊዜ የተጋራው ከ8 ዓመት በፊት መስከረም 26 ፤ 2007 ዓ.ም ላይ በአንድ የትዊተር አካውንት ላይ ነበር።

ከቅርብ ጊዜ ወዲህ ኢትዮጵያ በተለያዩ የእርስ በርስ ግጭቶች እና አለመረጋጋቶች ውስጥ እያለፈች ትገኛለች። ውስጣዊ የድንበር ግጭቶች ፤ የብሄር ግጭት ፤ ሞት እና መፈናቀሎችም ተከስተዋል።

ከነዚህ ክስተቶች መሃልም በሰሜኑ የሀገሪቷ ክፍል በህወሓት እና በፌደራል መንግስት መካከል ተከስቶ የነበረው እና ለሁለት አመት ቆይቶ የነበረው የእርስ በርስ ጦርነት ይጠቀሳል።

ከቅርብ ጊዜ ወዲህ ደግሞ በምዕራብ ኦሮሚያ ወለጋ ውስጥ በተከሰተው ግጭት ምክንያት በተደጋጋሚ የተለያዩ የጅምላ ግድያዎች ፤ ሞት እና መፈናቀሎች እየተሰሙ ይገኛሉ።

አዲስ ስታንዳርድ የተሰኘው የሀገር ውስጥ ጋዜጣ ህዳር 24 ፤ 2015 ዓ.ም ይዞ በወጣው ዘገባ መሰረት ህዳር 16 እና ህዳር 20 በምስራቅ ወለጋ ኪረሙ ዞን በሺዎች የሚቆጠሩ ሰዎች በአማራ ፋኖ እና ሚሊሽያ ታጣቂዎች አማካኝነት እንደተገደሉ የሚያሳይ አንድ የዜና ሪፖርት ይዞ ወጥቷል።

በዚህ የፌስቡክ ገፅ ላይ የተጋራው ይህ መረጃም በዚህ ሀሳብ ላይ ተመስርቶ የተጋራ ነው።

ስለዚህ ሀቅቼክ መረጃውን ለመደገፍ የተጋራውን ምስል መርምሮ ምስሉ ኢትዮጵያ ውስጥ የተፈፀመ እንዳልሆነ አረጋግጧል።

ምስሉ ለመጀመሪያ ጊዜ የታተመው መስከረም 26 ፤ 2007 ዓ.ም በአንድ የትዊተር አካውንት ላይ ሲሆን “የህግ የበላይነት የታለ?” ከሚል የጥያቄ ፅሁፍ ጋር ተጋርቶ ነበር።

ይህን መረጃ ያጋራው የትዊተር አካውንት ከ30ሺህ በላይ ተከታይ ያለው ሲሆን አዳዲስ መረጃዎችን ከአፍሪካዊቷ ሀገር ማላዊ የሚያቀርብ እንደሆነ ይናገራል።

በዚህም ምክንያት ሀቅቼክ ይህ የፌስቡክ ገፅ መረጃውን ይደግፍልኛል ብሎ የተጠቀመውን ምስል መርምሮ ሀሰት ብሎታል።

ይህ ቪድዮ መንግስት ወታደሮቹን ከደብረዘይት አየር ሀይል ወደ አስመራ ሲያጓጉዝ ያሳያል?

ከ700ሺህ በላይ ተከታይ ያለው የፌስቡክ ገፅ መስከረም 25 ቀን 2015 ዓ.ም “የአብይ መንግስት ወደ አስመራ ከደብረዘይት አየር ሀይል ግቢ በአንቶኖቭ ወታደሮችን ሲያመላልስ የሚያሳይ ቪድዮ ተመልከቱ። ስለ ሰላም እያወራን ወታደር ማሰማራት ትክክል አየደለም ለማንኛውም ሰራዊታችን TDF አይዘናጋም።” የሚል ፅሁፍ በማያያዝ አንድ የ25 ሰከንድ ርዝመት ያለው ቪድዮ አጋርቶ ነበር።”

ይህ ፅሁፍ ለንባብ እስከበቃበት ጊዜ ድረስ ይህ የፌስቡክ ፖስት ከ11ሺህ በላይ እይታን ማግኘት ችሏል።
ይሁን እንጂ ሀቅቼክ ቪድዮውን መርምሮ ሀሰት ብሎታል። 


መስከረም 21 ቀን 2015 ዓ.ም የአፍሪካ ህብረት ሊቀ-መንበር ሙሳፋኪ ሀማት ለዶ/ር ደብረፅዮን ገብረሚካኤል ደብዳቤ ጽፈው ነበር። ህብረቱ መስከረም 28 ፤ 2015 ዓ.ም ሊደረግ ታስቦ ወደነበረው የሰላም ድርድር በደብዳቤው ጋብዟቸዋል።  

መሰከረም 25 ፤ 2015 ዓ.ም ህወሓት ከአፍሪካ ህብረት የቀረበለትን የድርድር ጥያቄ መቀበሉን ባወጣው መግለጫ አሳውቋል። 

የኢትዮጵያ የመንግስት ኮሙኒኬሽን አገልግሎት በበኩሉ ባወጣው መግለጫ በአፍሪካ ህብረት ያቀረበውን የድርድር ጥያቄን እንደሚቀበለውና ከዚህ በፊትም የፌደራል መንግስት ግጭቱን ለማስቆም እና ሰላምን ለማውረድ የተቻለውን ሁሉ ሲያደርግ እንደቆየ ገልጿል።    

ሀቅቼክ በፌስቡክ ገፁ ላይ የተጋራውን ቪድዮ ለማጣራት ባደረገው ጥረት ነሀሴ 23 ፤ 2014 ዓ.ም የ4 ደቂቃ ከ5 ሴኮንድ ርዝመት ባለው ቪድዮ ውስጥ አግኝቶታል። ይህ ቪድዮም ከ9ሺህ በላይ ተከታይ ባለው የፌስቡክ ገፅ ላይ “የኢፌዴሪ የአየር ሀይል ልምምድን ተመልከቱ” በሚል የፅሁፍ መግለጫ ተጋርቶ ተገኝቷል። ይህ ፅሁፍ ለንባብ እስከበቃበት ጊዜ ድረስም ቪድዮው ከ500 በላይ እይታን ማግኘት ችሏል።    

ከዚህ በተጨማሪ ሀቅቼክ በሁለቱ ቪድዮዎች ውስጥ ያሉ ተመሳሳይ ምስሎችን ለመመልከት ጥረት ያደረገ ሲሆን ከዚህ በታች የተመለከቱት ከብዙዎቹ ጥቂቶቹ ናቸው።     

ምስል አንድ

ምስል ሁለት 

በተጠቀሱት ምክንያቶች የተነሳ ቪድዮው የቆየ እና ይህ የፌስቡክ ገፅ ካጋራው መረጃ ጋር ፍጹም ያማይገናኝ እንደሆነ ሀቅቼክ አረጋግጧል። ስለዚህ ሀቅቼክ ቪድዮውን መርምሮ ሀሰት ብሎታል።

ቪዲዮው ዳግም በተቀሰቀሰው ጦርነት የተማረኩ የመከላከያ ሰራዊት አባላትን ያሳያል?

ከ 7 ሺ በላይ ተከታይ ያለው የትዊተር አካውንት መስከረም 3 ቀን 2015 ዓ.ም በስፋት ሲዘዋወር የነበረ አንድ ቪዲዮ አጋርቷል። ተንቀሳቃሽ ምስሉ ዳግም በተቀሰቀሰው ጦርነት ኢትዮጵያውያን የጦር እስረኞች ለሕዝባዊ ወያኔ ሓርነት ትግራይ (ህወሓት) ኃይሎች እጃቸውን ሲሰጡ እንደሚያሳይ በፅሁፍ መግለጫው ይናገራል።

ይህ ፅሁፍ ለንባብ እስከበቃበት ጊዜ ድረስ ይህ ቪዲዮ ከስድስት መቶ ጊዜ በላይ የተጋራ ሲሆን በትዊተር ላይ ብቻ ከ63 ሺህ በላይ ሰዎች ተመልክተውታል።

ይሁን እንጂ ቪዲዮው የቆየ እና በቅርቡ በቀጠለው ጦርነት በህወሓት ሃይሎች የተያዙ የመከላከያ ሰራዊት አባላትን እንደማያሳይ ማረጋገጥ ተችሏል።

መጋቢት 15 ቀን 2014 ዓ.ም በኢትዮጵያ መንግስት እና በህወሓት ሃይሎች መካከል ለሰብአዊ እርዳታ የተኩስ አቁም ስምምነት ተደርጎ የነበረ ቢሆንም ነሀሴ 18 ቀን 2014 ዓ.ም በሁለቱ ሀይሎች መካከል ዳግም ግጭት አገርሽቷል።

ነሀሴ 10 ቀን 2014 ዓ.ም ሕወሓት በመጋቢት ወር መጨረሻ በጋራ የታወጀውን ጦርነት ማቆም ቀድሞ የፌደራል መንግስት እንደጣሰ በመግለጽ የፌደራል መንግስት ሃይሎች በመድፍና በታንክ በመታገዝ ጥቃት መሰንዘራቸውን ተናግሯል።

ሕወሃት በበኩሉ በአሁኑ ወቅት በህወሓት ሃይሎች ተይዘው ወደሚገኙ ግዛቶች ለመዝመት የሞከሩ የኢትዮጵያ መከላከያ ሰራዊት እና የኤርትራ ጦር ክፍሎችን እንደደመሰሰ መስከረም 3 ቀን 2015 ዓ.ም ገልጿል።

ይህን ሁኔታ ታሳቢ በማድረግ የተማረኩ የጦር ምርኮኞችን እንደሚያሳይ በመግለጽ ቪዲዮው እንደገና በማህበራዊ ትስስር ገጾች ሊጋራ ችሏል።

ይህ ተንቀሳቃሽ ምስል ከዚህ ቀደም ግንቦት 11 ቀን 2014 ዓ.ም በአሜሪካ ድምጽ አማርኛ የፌስቡክ ገጽ ላይ “የትግራይ ክልል መንግሥት የጦር ምርኮኞች እንዲለቀቁ መወሰኑን አስታወቀ” በሚል ዜና ስር የተጋራ መሆኑን ሀቅቼክ አረጋግጧል። 

ስለሆነም ሀቅቼክ የትዊተር ፖስቱ መረጃውን እንዲደግፍለት የተጠቀመውን ቪዲዮ የቆየና ከተገለፀው ሁነት ጋር ተያያዥነት የሌለው በመሆኑ ሀሰት ብሎታል።

ቪድዮው በህወሓት አመራሮች ላይ የተፈፀመ የድሮን ጥቃትን ያሳያል?

ከሰሞኑ ፌስቡክ እና ዩቲዩብን ጨምሮ በተለያዩ የማህበራዊ ሚድያ አውታሮች የተጋራ አንድ ቪድዮ “የፌደራል መንግስt ወታደራዊ ድሮኖችን በመጠቀም በህወሓት አመራሮች ላይ ጥቃት ሲፈፅም የሚያሳይ ቪድዮ” በሚል መግለጫ ሲዘዋወር ተስተውሏል።

ፌስቡክ ላይ ተጋርቶ የነበረው ቪድዮ ከግማሽ ሚልዮን በላይ ተመልካች ሲያገኝ በዩቲዩብ ላይ ተጋርቶ የነበረው ቪድዮ ከመቶ ሺህ በላይ እይታ ማግኘት ችሏል።

ይሁን እንጂ ሀቅቼክ ቪድዮው የፌደራል መንግስት ወታደራዊ ድሮኖችን ተጠቅሞ የህወሓት አመራሮችን ሲያጠቃ የሚያሳይ እንዳልሆነ አረጋግጧል። 

ጥቅምት 24 ፤ 2013 ዓ.ም በፌደራል መንግስት እና በህወሓት መካከል ግጭት ከተከሰተ በኋላ የፌደራል መንግስት ከሌሎች የክልል ልዩ ሀይል እና ሚሊሻዎች ጋር በመሆን ህወሓትን ከመቀሌ እና ከሌሎች የትግራይ ዋና ዋና ከተሞች ማስለቀቅ ችሎ ነበር።  

ይሁን እንጂ በሰሜኑ የሀገሪቱ ክፍል የተከሰተው ይህ ጦርነት ህወሓት ከመቀሌ እና ከሌሎች ዋና ዋና የትግራይ ከተሞች ከለቀቀ በኋላ የሽምቅ ውጊያን መጠቀሙን ተከትሎ ጦርነቱ ሊራዘም ችሏል።

ይህን ተከትሎ የፌደራሉ መንግስት በጊዜው ተቋቁሞ ከነበረው የትግራይ ጊዜያዊ አስተዳደር ጋር በመሆን ግንቦት ወር 2013 ዓም ላይ የአንድ ወገን የተኩስ አቁም በማድረግ የመከላከያ ሰራዊቱን እና የክልል ልዩ ሀይል እና ሚሊሻዎችን ከትግራይ እና አካባቢው አስወጥቷል።

ይህን የፌደራሉ መንግስትን ውሳኔ ተከትሎ ህወሓት የክልሉን ዋና ከተማ መቀሌን መልሶ መቆጣጠር ችሎ ነበር። ከዚህ በመቀጠልም ህወሓት ጦሩን ወደ አማራ እና አፋር አጎራባች ክልሎች አንቀሳቅሷል። ይህን ተከትሎ የህወሓት ሀይሎችም የአማራ ክልል ትልልቅ ከተሞችን ጨምሮ ወደ አዲስ አበባ መቃረብ ችለው ነበር።    

የኢትዮጵያ መከላከያ ሰራዊት እና ሌሎች ጥምር ሀይሎች በህወሓት ጦር ላይ የመልሶ ማጥቃት እርምጃን መውሰድ ከጀመሩ በኋላ የፌደራሉ መንግስት በህወሓት ሀይሎች ተይዘው የነበሩ የአፋር እና አማራ ክልል ቦታዎችን መልሶ መያዝ ችሏል። 

መጋቢት 15 ፤ 2014 ዓ.ም ላይ የፌደራሉ መንግስት ከህወሓት ጋር ያለውን ግጭት ለማቆም መወሰኑን ገልፆ ነበር። ህወሓትም በፌደራል መንግስት የተላለፈውን ይህን ውሳኔ እንደሚቀበል ገልፆ ነበር።

በፌደራል መንግስት እና በህወሓት መካከል የተፈጠረውን ግጭት ለማደራደር ከሶስተኛ ወግን ሀሳብ መቅረቡን ተከትሎ የሰላም እና የድርድር ጥረቶች ሲከናወኑ ቆይተዋል። ይህን ተከትሎም የቀድሞው የናይጄርያ ፕሬዝዳንት እና በአፍሪካ ህብረት የአፍሪካ ቀንድ ልዩ መልዕክተኛ የሆኑት ኦሉሴጉን ኦባሳንጆ በፌደራል መንግስት እና በህወሓት መካከል ሊደረግ የታሰበውን የድርድር እና የሰላም ውይይት እንዲያግዙ በአፍሪካ ህብረት ተሹመዋል።

ፕሬዝደንት ኦባሳንጆም የድርድር ሂደቱን ለማስጀመር በተደጋጋሚ በሁለቱ ወገኖች ጋር ተደጋጋሚ ውይይቶችን ሲያደርጉ ቆይተዋል።       

ነገር ግን ህወሓት በፕሬዝደንት ኦባሳንጆ የሰላም ድርድሩ ለመምራት መመረጣቸው ላይ እንደማያምንበት እና ከፊደራል መንግስቱ ጋር በሚደረገው የድርድር ሂደት ላይ ድርድሩን ለመምራት ብቁነታቸው ላይ ጥያቄ እንዳለው አስታውቋል። 

ህወሓት የፌደራል መንግስቱ ታንክ እና ከባድ መሳሪያዎችንም ተጠቅሞ ነሀሴ 10 ቀን 2014 ዓ.ም ጥቃት እንደሰነዘረበት ሕወሃት ገልፆ በመጋቢት ወር በሁለቱ ሀይሎች መካከል ተደርጎ የነበረውን ስምምነት የፈደራል መንግስት እንዳፈረሰው አስታውቋል።

በተጨማሪም ነሀሴ 18 ፤ 2014 ዓ.ም የፌደራል መንግስት በደቡባዊ የትግራይ አቅጣጫ ጥቃት እንደከፈተባቸው ህወሃት ገልጿል። 

ይሁን እንጂ የፌደራል መንግስት ይህ በህወሓት የቀረበው ውንጀላ ሀሰት መሆኑን በመናገር ህወሓት ወደ አጎራባች ክልልሎች ለመንቀሳቀስ የሚያረገውን ሙከራ ለማስቆም የትኛውንም ወታደርዊ እርምጃዎችን እንደሚወስድ አስታውቋል።   

የፊደራል መንግስት እየወሰደ ያለውን ወታደራዊ እርምጃ ተከትሎ በፌደራል መንግስት አማካኝነት እየተደረገ ያለ የድሮን ጥቃት በማለት የተለያዩ ተንቀሳቃሽ ምስሎች [ቪድዮውች] ሲዘዋወሩ ቆይተዋል። ይህ በፌስቡክና ዩቲዩብ ጨምሮ የተሰራጨው ቪድዮም ከነዚህ አንዱ ነው። 

ይሁን እንጂ ቪድዮው የፌደራል መንግስት በህወሓት አመራሮች ላይ ያደረሰውን የድሮን ጥቃት እንደማያሳይ ሀቅቼክ ማረጋገጥ ችሏል።    

በቪድዮው መሃል ያለው የቪድዮው ክፍል በፈረንጆቹ 2020 በአዘርባጃን እና በአርሜንያ መካከል የተከሰተውና ናጎርኖ ካራባህ እየተባለ በሚጠራው ጦርነት የቱርክ ድሮኖች የነበራቸውን እንቅስቃሴ የሚያሳይ ነው። 

ሀቅቼክ ቪድዮውን ለማግኘት ባደረገው ጥረት የቪድዮውን ክፍል መጋቢት 29 ፤ 2013 ዓ.ም በአንድ የዩቲዩብ ቻናል ላይ ተጋርቶ አግኝቶታል። 

በዚህም ምክንያትም ሀቅቼክ በፌስቡክ እና በዩቲዩብ ላይ ሲዘዋወር የነበረው ቪድዮ ሀሰት መሆኑን አረጋግጧል። 

ሀሰት ፡ ምስሉ በራያ ግንባር የተማረኩ የጦር መሳሪያዎችን አያሳይም

ከ120 ሺህ በላይ ተከታይ ያለው የፌስቡክ ገፅ ነሀሴ 28 ፤  2014 ዓ.ም ላይ “በራያ ግንባር ከጠላት የተማረከ 430 ክላሽንኮቭ እና 3 ዲሽቃ ፤ ጠላት የጥምር ጦሩ ብርቱ ክንድ መቋቋም ያልቻለው ሀይል እየተማረከ ነው” የሚል ፅሁፍ በማያያዝ አንድ ምስልን አጋርቶ ነበር።

ይህ ፅሁፍ ለንባብ እስከበቃበት ጊዜ ድረስ ይህ ፅሁፍ ከአንድ ሺህ በላይ ግብረመልስ ሲያገኝ ከ150 ጊዜ በላይ መጋራት ችሏል። 

ይሁን እንጂ ሀቅቼክ ምስሉን መርምሮ ሀሰት ብሎታል።  

ጥቅምት 24 ፤ 2013 ዓ.ም በፌደራል መንግስት እና በህወሓት መካከል ግጭት ከተከሰተ በኋላ የፌደራል መንግስት ከሌሎች የክልል ልዩ ሀይል እና ሚሊሻዎች ጋር በመሆን ህወሓትን ከመቀሌ እና ከሌሎች የትግራይ ዋና ዋና ከተሞች ማስለቀቅ ችሎ ነበር።  

ይሁን እንጂ በሰሜኑ የሀገሪቱ ክፍል የተከሰተው ይህ ጦርነት ህወሓት ከመቀሌ እና ከሌሎች ዋና ዋና የትግራይ ከተሞች ከለቀቀ በኋላ የሽምቅ ውጊያን መጠቀሙን ተከትሎ ጦርነቱ ሊራዘም ችሏል።

ይህን ተከትሎ የፌደራሉ መንግስት በጊዜው ተቋቁሞ ከነበረው የትግራይ ጊዜያዊ አስተዳደር ጋር በመሆን ግንቦት ወር 2013 ዓም ላይ የአንድ ወገን የተኩስ አቁም በማድረግ የመከላከያ ሰራዊቱን እና የክልል ልዩ ሀይል እና ሚሊሻዎችን ከትግራይ እና አካባቢው አስወጥቷል።

ይህን የፌደራሉ መንግስትን ውሳኔ ተከትሎ ህወሓት የክልሉን ዋና ከተማ መቀሌን መልሶ መቆጣጠር ችሎ ነበር። ከዚህ በመቀጠልም ህወሓት ጦሩን ወደ አማራ እና አፋር አጎራባች ክልሎች አንቀሳቅሷል። ይህን ተከትሎ የህወሓት ሀይሎችም የአማራ ክልል ትልልቅ ከተሞችን ጨምሮ ወደ አዲስ አበባ መቃረብ ችለው ነበር።    

የኢትዮጵያ መከላከያ ሰራዊት እና ሌሎች ጥምር ሀይሎች በህወሓት ጦር ላይ የመልሶ ማጥቃት እርምጃን መውሰድ ከጀመሩ በኋላ የፌደራሉ መንግስት በህወሓት ሀይሎች ተይዘው የነበሩ የአፋር እና አማራ ክልል ቦታዎችን መልሶ መያዝ ችሏል። 

መጋቢት 15 ፤ 2014 ዓ.ም ላይ የፌደራሉ መንግስት ከህወሓት ጋር ያለውን ግጭት ለማቆም መወሰኑን ገልፆ ነበር። ህወሓትም በፌደራል መንግስት የተላለፈውን ይህን ውሳኔ እንደሚቀበል ገልፆ ነበር።

በፌደራል መንግስት እና በህወሓት መካከል የተፈጠረውን ግጭት ለማደራደር ከሶስተኛ ወግን ሀሳብ መቅረቡን ተከትሎ የሰላም እና የድርድር ጥረቶች ሲከናወኑ ቆይተዋል። ይህን ተከትሎም የቀድሞው የናይጄርያ ፕሬዝዳንት እና በአፍሪካ ህብረት የአፍሪካ ቀንድ ልዩ መልዕክተኛ የሆኑት ኦሉሴጉን ኦባሳንጆ በፌደራል መንግስት እና በህወሓት መካከል ሊደረግ የታሰበውን የድርድር እና የሰላም ውይይት እንዲያግዙ በአፍሪካ ህብረት ተሹመዋል።

ፕሬዝደንት ኦባሳንጆም የድርድር ሂደቱን ለማስጀመር በተደጋጋሚ በሁለቱ ወገኖች ጋር ተደጋጋሚ ውይይቶችን ሲያደርጉ ቆይተዋል።       

ነገር ግን ህወሓት በፕሬዝደንት ኦባሳንጆ የሰላም ድርድሩ ለመምራት መመረጣቸው ላይ እንደማያምንበት እና ከፊደራል መንግስቱ ጋር በሚደረገው የድርድር ሂደት ላይ ድርድሩን ለመምራት ብቁነታቸው ላይ ጥያቄ እንዳለው አስታውቋል። 

ህወሓት የፌደራል መንግስቱ ታንክ እና ከባድ መሳሪያዎችንም ተጠቅሞ ነሀሴ 10 ቀን 2014 ዓ.ም ጥቃት እንደሰነዘረበት ሕወሃት ገልፆ በመጋቢት ወር በሁለቱ ሀይሎች መካከል ተደርጎ የነበረውን ስምምነት የፈደራል መንግስት እንዳፈረሰው አስታውቋል።

በተጨማሪም ነሀሴ 18 ፤ 2014 ዓ.ም የፌደራል መንግስት በደቡባዊ የትግራይ አቅጣጫ ጥቃት እንደከፈተባቸው ህወሃት ገልጿል። 

ይሁን እንጂ የፌደራል መንግስት ይህ በህወሓት የቀረበው ውንጀላ ሀሰት መሆኑን በመናገር ህወሓት ወደ አጎራባች ክልልሎች ለመንቀሳቀስ የሚያረገውን ሙከራ ለማስቆም የትኛውንም ወታደራዊ እርምጃዎችን እንደሚወስድ አስታውቋል።   

ነሀሴ 23 ቀን 2014 ዓ.ም የኢትዮጵያ መከላከያ ሰራዊት በተለያዩ የጦር ግንባሮች ድል እያስመዘገበ እንደሆነ ተናግሯል።

ይህ የፌስቡክ ፖስትም ይህን ሁኔታ መሰረት አድርጎ ተጋርቷል። 

ሀቅቼክ ምስሎቹን ትክክለኛነት ለማጣራት ባደረገው ጥረት ምስሎቹን በአማራ ሚድያ ኮርፖሬሽን የዩቲዩብ ቻናል ላይ ጥር 25 ፤ 2014 ዓ.ም በቀረበ የዜና ቪድዮ ላይ አግኝቷቸዋል። ይህ ጽሁፍ ለንባብ እስከበቃበት ጊዜ ድረስ የዩቲዩብ ቪድዮው ከ150ሺህ ጊዜ በላይ ታይቷል። 

የመጀመርያው ምስል በዜና ቪድዮው በ23ተኛ ደቂቃ ከ05 ሴኮንድ ላይ ይገኛል  

ሁለተኛው ምስል በዜና ቪድዮው በ22ተኛ ደቂቃ ከ57ተኛ ሴኮንድ ላይ ይገኛል

የዜና ቪድዮው፣ “በመከላከያ ሰራዊት እና በፌደራል ፖሊስ ጥምር ሃይል አማካኝነት በአሸባሪው ኦነግ ሸኔ ላይ በተወሰደው ርምጃ ከ100 በላይ የሚሆኑ አባላቱ ተደምስሰዋል” በሚል ርዕስ የቀረበ ሲሆን በተጨማሪም በቪድዮው ተማረኩ ያላቸውን የሽብር ቡድኑን አባሎች ያሳያል። በዚህም መሰረት መረጃውን ለመደገፍ ከፖስቱ ጋር የተያያዙትን ምስሎች ሀቅቼክ ሀሰት ብሏቸዋል።

ምስሉ በአላማጣ አካባቢ በተፈፀመ የአየር ጥቃት የወደሙ ታንኮችን ያሳያል?

ከ130ሺህ በላይ ተከታይ ያለው የፌስቡክ ገፅ መስከረም 4፤ 2015 ዓ.ም ላይ “አላማጣ ኳስ ሜዳ ተብሎ በሚጠራ ስፍራ በተፈፀመ የአየር ጥቃት ወደ ቆቦ እየተጫኑ የነበሩ ሁለት ታንኮች መመታታቸው ታውቋል” የሚል ፅሁፍን በማያያዝ አንድ ምስልን አጋርቶ ነበር።

ይህ ፅሁፍ ለንባብ እስከበቃበት ጊዜ ድረስ ይህ የፌስቡክ ፖስት ከ800 በላይ ግብረመልስ ሲያገኝ ከ30 ጊዜ በላይ መጋራት ችሏል።    

ይሁን እንጂ ሀቅቼክ ምስሉን መርምሮ ሀሰት ብሎታል። 

ጥቅምት 24 ፤ 2013 ዓ.ም በህወሓት እና በፌደራል መንግስቱ መካከል የተከሰተው ግጭት ከአንድ ዓመት በላይ አሳልፏል። 

በሰኔ ወር 2013 ዓ.ም መጨረሻ አካባቢ የፌደራል መንግስት ከትግራይ ጊዜያዊ አስተዳደር በቀረበለት ጥያቄ መሰረት የአንድ ወገን የተኩስ አቁም ስምምነትን በማድረግ የመከላከያ እና የክልል ልዩ ሃይሎችን ከትግራይ ክልል አስወትቷል። 

ይህን ተከትሎ ለዘጠኝ ወራት ቆይቶ የነበረው የተኩስ አቁም ስምምነት [ለሰብዓዊ እርዳታ] ነሀሴ 18 ፤ 2014 ዓ.ም  ዳግም ወደ ግጭት ገብቷል።    

መስከረም 3 ቀን 2015 ዓ.ም በድምፂ ወያኔ ስም የተከፈተ እና ከ600ሺህ ተከታይ ባለው የፌስቡክ ገፅ ላይ በቀረበ ሪፖርት የፌደራሉ መንግስት በድምፂ ወያኔ የቴሌቪዥን ጣብያ ላይ የድሮን ጥቃት ማድረሱን ተገልጿል።  

መስከረም 14 ፤ 2015 ዓ.ም የህወሓት ማዕከላዊ ኮሚቴ አባል እና ቃል አቀባይ የሆኑት አቶ ጌታቸው ረዳ በይፋዊ የትዊተር ገፃቸው ላይ “የፌደራሉ መንግስት ከደቂቃዎች በፊት በመቀሌ ከተማ ላይ የድሮን ጥቃት አድርሷል።” የሚል ፅሁፍን አጋርተው ነበር።

ሀቅቼክ ምስሉን ለማጣራት ባደረገው ጥረት ምስሉን የካቲት 27 ፤ 2014 ዓ.ም ጽሁፎችን በዩክሬን ቋንቋ በሚያቀርብ suspline.media በተሰኘ አንድ ድረገፅ ላይ አግኝቶታል። 

ምስሉን “የትራንስካርፓቲያን ብርጌድ ተዋጊዎች የሩሲያን BMP ታንክ ሲያወድሙ አንድ ወታደር መማረክ ችለዋል” በሚል  ፅሁፍ ስር ሀቅቼክ ያገኘው ሲሆን በፅሁፉም ውስጥ የወደሙ የሩስያ BMP ታንኮች እና የተማረከ የሩሲያ ወታደር ምስል ተካተዋል።

በ2014 እ.አ.አ በሩሲያ እና በዩክሬን መካከል በተከሰተው ግጭት በየካቲት 17 ቀን 2014 ዓ.ም ሩሲያ ዩክሬንን ወራለች። በሩሲያ የተጀመረው ወረራ ከሁለተኛው የአለም ጦርነት በኋላ በአውሮፓ ውስጥ ትልቁን የስደተኞች ቁጥር እንዲመዘገብ ምክንያት ሆኗል። በዚህም ምክንያት ወደ 7.3 ሚሊዮን(አንድ ሶስተኛ) የሚሆኑ ዩክሬናውያን ለስደት ተዳርገዋል።

ሊንክ

የፌደራል መንግስት በሰሜኑ የሀገሪቱ ክፍል እየተደረገ ባለው ጦርነት የተለያዩ የአየር ጥቃቶችን እያደረገ እንደሆነ የሚያሳዩ የተለያዩ መረጃዎች ቢኖሩም በፌስቡክ ገፁ መረጃውን ይደግፍልኛል በማለት የተጠቀመው ምስል የተሳሳተ ነው።
ስለዚህ ሀቅቼክ የፌስቡክ ገጹ የተጠቀመውን ምስል መርምሮ ሀሰት ብሎታል።

ምስሉ በቅርቡ ቦሌ አራብሳ አካባቢ ሁለት ህፃናትን የገደለችው ግለሰብ ያሳያል?

አንድ ከ200 ሺህ በላይ ተከታይ ያለው የፌስቡክ ገፅ ነሀሴ 27 ፤ 2014 ዓ.ም ላይ “ሁለቱን እንቦቀቅላ ህፃናትን በጭካኔ አርዳ እና አንቃ የገደለችው ግለሰብ እቺ ናት” የሚል ፅሁፍን በማያያዝ አንድ ምስል አጋርቶ ነበር። 

ይህ ፅሁፍ ለንባብ እስከበቃበት ጊዜ ድረስ ይህ የፌስቡክ ፖስት ከ9 ሺህ በላይ ግብረመልስን ሲያገኝ ከ1400 ጊዜ በላይ መጋራት ችሏል። 

ይሁን እንጂ ሀቅቼክ የፌስቡክ ፖስቱን መርምሮ ምስሉን ሀሰት ብሎታል።    

ነሀሴ 26 ፤ 2014 ዓ.ም በተለያዩ የማህበራዊ ሚድያ አውታሮች ላይ በለሚ ኩራ ክፍለ ከተማ አራብሳ ኮንዶሚንየም ተብሎ በሚጠራው የጋራ መኖሪያ ቤት መንደር አካባቢ በቤት ሰራተኛ አማካኝነት የ2 እና 3 አመት ህፃናት እንደተገደሉ ተነግሮ ነበር።

ነሀሴ 26 ፤ 2014 ዓ.ም ቢቢሲ አማርኛ ያናገራቸው የአዲስ አበባ ፖሊስ ኮሚሽን የሕዝብ ግንኙነት ዳይሬክተር ምክትል ኮማንደር ማርቆስ ታደሰ “እጅግ በጣም አሳዛኝ እና ዘግናኝ” በተባለው በዚህ ወንጀል የተጠረጠረችው የቤት ሠራተኛ የ19 ዓመት ወጣት መሆኗን የገለፁ ሲሆን በሁለት ህጻናት ላይ ግድያው ከተፈጸመች በኋላ ተጠርጣሪዋ ወንጀሉን መፈጸሟን በማመን ለፖሊስ እጇን ከሰጠች በኋላ በቁጥጥር ስር መዋሏን የአዲስ አበባ ፖሊስ ኮሚሽን የሕዝብ ግንኙነት ኃላፊ ለቢቢሲ ተናግረዋል።

 ይህ የፌስቡክ ፖስትም ይህንን መረጃ መሰረት አድርጎ ተጋርቷል። 

ነገርግን ሀቅቼክ የጎግል የተገላቢጦሽ ምስል ፍለጋን ተጠቅሞ ምስሉን ለማጣራት ባደረገው ጥረት ምስሉን ጠቅላይ ሚኒስትር አብይ አህመድ በፖለቲካ አመለካከታቸው ምክንያት ከሀገር ተሰደው የነበሩ ፖለቲከኞችን ወደ ሀገር እንዲመለሱ መጋበዛቸውን ተከትሎ ሐምሌ 29 ቀን 2010 ዓ.ም አክቲቪስት እና ፖሊቲከኛ ጀዋር መሀመድን ለመቀበል በተደረገ ስነ ስርዓት ላይ ቦምብ ለመጣል የተዘጋጀች ግለሰብ በፖሊስ ቁጥጥር ስር መዋሏን ከሚገልጽ ፅሁፍ ጋር ተጋርቶ አግኝቶታል። 

ሊንክ

ከሰሞኑን በቦሌ አራብሳ ኮንዶሚኒየም አካባቢ በሰራተኛቸው አማካኝነት የተገደሉ ህፃናት ቢኖሩም ይህ የፌስቡክ ገፅ የሰራተኛዋን ምስል ያሳያል ብሎ የተጠቀመው ምስል የተሳሳተ ነው።
ስለዚህም ሀቅቼክ ምስሉን መርምሮ ሀሰት ብሎታል። 

የሃሰተኛ ዜና ጥቆማ፡ ዮናስ ዘውዴ ወደ ሌላ የስራ መደብ ተዘዋወረ እንጂ በራሱ ፈቃድ ከኃላፊነቱ አልለቀቀም

በአንድ የፌስቡክ ፖስት ሀምሌ 7 ቀን የተላለፈ መረጃ የአዲስ አበባ ከተማ አስተዳደር የኮሙኒኬሽን ጉዳዮች ሀላፊ አቶ ዮናስ ዘውዴ ከስራው በገዛ ፈቃዱ መልቀቁን አስታውቆ ነበር። ይህ ፖስት ዮናስ ዘውዴ ራሱ እንደተናገረው በመጥቀስ “አሁን ያለው አገዛዝ በሙስና የተዘፈቀ እና ለሀገሪቱ መፃኢ ዕድል የማያስብ ስለሆነ አብሬ ልቀጥል ባላመቻሌ በራሴ ፍቃድ ከሃላፊነቴ ለቅቄያለው” ማለቱን ፅፏል። 

ይሁን እንጂ ሀቅቼክ የቀድሞ የአዲስ አበባ ከተማ አስተዳደር የኮሙኒኬሽን ቢሮ ሀላፊ አቶ ዮናስ ዘውዴ ከኃላፊነቱ አለመልቀቁንና በመስተዳድሩ ወደ ሌላ የስራ መደብ መዘዋወሩን አረጋግጧል።    

አቶ ዮናስ ዘውዴ ከኃላፊነቱ በገዛ ፈቃዱ ለቋል የሚለው የዚህ የፌስቡክ ፖስት መረጃ የተሰራጨው የተለያዩ የመንግስት ባላስልጣናት ከኃላፊነታቸው በተነሱበትና በቁጥጥር ስር በዋሉበት ሰሞን ነው።  

ባለፈው ሳምንት የአደጋ ስጋት አመራር ኮሚሽን ኮሚሽነር የሆኑት አቶ ምትኩ ካሳ በሙስና ወንጀል ተጠርጥረው የፌደራል ፖሊስ በቁጥጥር ስር ውለዋል። 

የአዲስ አበባ ከተማ መስተዳድር በቅርቡ ለዕድለኞች የወጣውን የኮንዶሚኒየም ዕጣ በአስተዳደሩ ውስጥ የሚሰሩ ሰራተኞች እና አንዳንድ ባለስልጣናት በዕጣው የማጭበርበር ሂደት ውስጥ ተሳትፈዋል በማለት የእጣ አወጣጥ ሂደቱ እንደሚደገም አስታውቋል። በማጭበርበር ሂደቱም ላይ ተሳትፈዋል ያላቸውን ግለሰቦች ላይ የምርመራ መዝገብ ተከፍቶባቸዋል።

የቀድሞው የአዲስ አበባ መስተዳድር የኮሙኒኬሽን ሃላፊ ከስራ የመልቀቅ መረጃዎች መሰማት የጀመሩትም የኮንዶሚኒየም የዕጣ አወጣጥ ውዝግብ ባስነሳበት ወቅት ላይ ነበር።           

አቶ ዮናስ ዘውዴ የብልፅግና ፓርቲ አባል ሲሆን በስድስተኛው ሃገር አቀፍ አጠቃላይ ምርጫ የአዲስ አበባ ከተማ አስተዳደር ምክር ቤት አባል ሆኖ ተመርጧል። ይህንንም ተከትሎ በከተማዋ ከንቲባ አማካኝነት የአዲስ አበባ ከተማ አስተዳደር የኮሙኒኬሽን ቢሮ ኃላፊ ተደርጎ ተሹሟል።  

የአቶ ዮናስ ከኃላፊነት የመልቀቅ መረጃን ተከትሎ አል-አይን አማርኛ ባቀረበው ሪፖርት የቀድሞው የኮሙኒኬሽን ቢሮ ኃላፊ ወደ ሌላ የስራ መደብ መዘዋወሩን ገልጿል። በሪፖርቱም በዶ/ር ዮናስ ምትክ በቦታው የተሾሙት አቶ አብዲ ፀጋዬ የአቶ ዮናስን ወደ ሌላ የስራ መደብ መዘዋወሩን አረጋግጠዋል። 

ሃቅ ቼክ በጉዳዩ ዙሪያ መልስ ለማግኘት አቶ ዮናስ ዘውዴን በስልክ ያገኘው ሲሆን በጉዳዩ ላይ አስተያየት መስጠት እንደማይፈልግ ገልጾ ስለ ጉዳዩ ያለውን ትክክለኛ መረጃ ራሱ ይፋ እንደሚያደርግ ተናግሯል።    

በዚህም መሰረት የቀድሞ የአዲስ አበባ ከተማ አስተዳደር የኮሙኒኬሽን ቢሮ ኃላፊ የነበረው አቶ ዮናስ ዘውዴ በገዛ ፈቃዱ ከኃላፊነቱ አለመልቀቁን እንዲሁም ወደሌላ የስራ መደብ እንደተዘዋወረ ሃቅ ቼክ አረጋግጧል።  

ህወሓት አውሮፕላን አግቷል?

አንድ በዩቲዩብ የተሰራጨ ቪድዮ በፊት ገፁ ላይ “ህወሓት አውሮፕላን አገተ” በሚል ርዕስ ሰኔ 16 ቀን 2014 ዓ.ም መረጃ አጋርቶ ነበር። ይህ ፅሁፍ ለንባብ እስከበቃበት ጊዜ ድረስ ይህ ቪድዮ ከ2500 በላይ እይታ ማግኘት ችሏል።

ሀቅቼክ ሙሉ ቪድዮውን በመመልከት ቪድዮው በውስጡ ህወሓት አውሮፕላን እንዳገተ የሚገልፅ ምንም አይነት መረጃ እንደሌለው የተገነዘበ ሲሆን በአንፃሩ ህወሓት አውሮፕላን መቀሌ እንዳያርፍ መከልከሉን ይናገራል። 

ስለዚህ ሀቅቼክ በዚህ የዩቲዩብ ቪድዮ የተላለፈውን መረጃ አሳሳች ብሎታል።  

ጥቅምት 24 ቀን 2013 ዓ.ም በህወሓት እና በፌደራል መንግስት መካከል የተጀመረው ጦርነት እስካሁን ድረስ ማብቂያ አላገኘም።   

ከመጋቢት ወር 2014 ዓ.ም ጀምሮ በሁለቱ ተዋጊ ሀይሎች መካከል ለሰባዊ እርዳታ በሚል በተፈጠረው የተኩስ አቁም ስምምነት የሰብዓዊ እርዳታ ፍሰቱን እንዳሻሻለው ተነግሯል።    

ይህ በእንዲህ እንዳለ በህወሓት አመራሮች እና በፌደራል መንግስት መካከል ቀጥተኛ ውይይቶች እንደነበሩ የሚዘግቡ ያለተረጋገጡ ሪፖርቶች ሲወጡ ቆይተዋል። ከቅርብ ጊዜ ወዲህ የፌደራል መንግስት ከህወሓት ጋር ድርድር እና ውይይት ለማድረግ እንደተቃረቡ የሚያሳዩ አንዳንድ መረጃዎች እየተሰሙ ነው። 

የህወሓት አመራር የሆኑት ደብረፅዮን ገብረሚካኤል በፃፉት ግልፅ ደብዳቤ አማካኝነት አስተዳደራቸው ሰላም ለማውረድ ለሚደረገው ድርድር ተወካዮቻቸውን ወደ ናይሮቢ ኬንያ እንደሚልኩ ገልፀዋል።   

ጠቅላይ ሚኒስትር አብይ አህመድ ከተወካዮች ምክር ቤት አባላት ለሚቀርቡላቸው ጥያቄዎች መልስ ለመስጠት በተገኙበት መድረክ የፌደራሉ መንግስት ከህወሓት ጋር ለሚደረግው ድርድር ኮሚቴ ማዋቀሩን ገልፀዋል። 

በሌላ መልኩ በፌደራል መንግስት እና በህወሓት መካከል የሰብዓዊ እርዳታ እና መጓጓዣ መንገዶችን አስመልክቶ ይሚነሱ አንዳንድ ውዝግቦች ተስተውለዋል። በዚህም የፌደራል መንግስት እና ህወሓት የሰብዓዊ እርዳታ ተደራሽነትን ማደናቀፍን አስመልክቶ እስር በእርስ ሲካሰሱ ቆይተዋል። 

ባለፈው መሰከረም ወር የአለም የምግብ ፕሮግራም (WFP) ወደ ትግራይ ከገቡት 445 የዕርዳታ መኪናዎች ውስጥ 407 የሚሆኑት መመለስ አንዳልቻሉ ገልጿል። በተመሳሳይ ሁኔታም ሰኔ 16 ፤ 2014 ዓ.ም ወደ ትግራይ ሲጓዙ የነበሩ የዕርዳታ አውሮፕላኖች መቀሌ አየር ማረፍያ እንዳይወርዱ አግዷል በማለት የፌደራል መንግስት ህወሓትን ከሷል። ህወሓት ለፌደራል መንግስት ክስ አየር መንገዱ በነዳጅ እጥረት ምክንያት መስራት ማቆሙን በመግለፅ ምላሽ ሰጥቷል። 

የዩቲዩብ ቪድዮው የተጠቀሱትን ነባራዊ ሁኔታዎች ተገን በማድረግ እንደተጋራ መረዳት ይቻላል። ይህ የዩቲዩብ ቪድዮ “ህወሓት አውሮፕላን አገተ” በሚል ርዕስ ቪድዮውን ያጋራ ቢሆንም በቪድዪው የሚተላለፈው መልዕክት ህወሓት ወደ መቀሌ የሚደረጉትን በረራዎች በመከልከል የሰብዓዊ እርዳታ ተደራሽነትን ማስተጓጎሉን ይገልፃል። ይህም በፊት ገፁ ላይ ያለው ርዕስ እና በውስጥ ያለው መረጃ የማይገናኝ መሆኑን ያሳየናል።  ከነዚህ ምክንያቶች በተነሳ ሀቅቼክ ቪድዮውን መርምሮ አሳሳች ብሎታል። 

ቪድዮው በምዕራብ ወለጋ የተደረገውን ግድያ ያሳያል?

ከ196ሺህ በላይ ተከታይ ያለው የፌስቡክ ገፅ በሰኔ 14 ቀን 2014 ዓ.ም ያሰራጨውን ቪድዮ “የምዕራብ ወለጋው ጭፍጨፋ በጥቂቱ ማሳያ ምስል..” የሚል ፅሁፍ በማያያዝ አጋርቶ ነበር። 

ይህ ፅሁፍ ለንባብ እስከበቃበት ጊዜ ድረስ ቪድዮው ከ140ሺህ በላይ እይታ ሲያገኝ ከ3500 በላይ ግብረ መልስ አግኝቷል። 

ይሁን እንጂ ሀቅቼክ ቪድዮውን አጣርቶ ሀሰት ብሎታል።  

ሰኔ 7 ፤ 2014 ዓ.ም በጋምቤላ ዋና ከተማ የኦነግ ሸኔ እና የጋምቤላ ነፃ አውጪ ግምባር ጥምር ሀይሎች ከከተማዋ ከመንግስት ሀይሎች ጋር የተኩስ ልውውጥ አድርገው እንደነበር ተዘግቧል። እንደ ዘገባዎቹ ሁለቱ አማፅያን ሀይሎች በድንገት ከተማዋን በመቆጣጠር በመንግስት ሀይሎች ላይ ተኩስ ከፍተዋል። 

ነገር ግን ብዙም ሳይቆይ መንግስት ሁኔታውን በቁጥጥር ስር እንዳዋለው ገልጿል።

በተመሳሳይ ቀን እና በተቀራራቢ ጊዜ በደምቢ ዶሎ እና በምዕራብ ወለጋ ጊምቢ ከተማዎች በኦነግ ሸኔ ታጣቂዎች እና በመንግስት ሀይሎች መካከል ግጭት ተፈጥሮ እንደነበርና በአንዳንድ ሪፖርቶች መሰረትም የኦነግ ሸኔ ታጣቂዎች ከተሞቹን በቁጥጥራቸው ስር ማዋላቸውን ገልጸው ነበር።  

ሰኔ 11 ፤ 2014 ዓ.ም በኦሮሚያ ክልል በምዕራብ ወለጋ ዞን ጊምቢ ወረዳ ቶሌ ቀበሌ የአማራ ብሔር ተወላጆች በሚኖሩባቸው መንደሮች በተፈጸመው ጥቃት በመቶዎቹ የሚቆጠሩ ሰላማዊ ሰዎች መገደላቸውንና ሺዎች ደግሞ አካባቢውን ለቀው መውጣታቸውን ነዋሪዎችን እማኝ ያደረጉ ዜናዎች በሰፊው ተሰራጭተዋል።

ሆኖም የኦነግ ሸኔ አለማቀፍ ቃል አቀባይ የሆነው ኦዳ ተርቢ በትዊተር አካውንቱ ዘገባውን አስተባብሏል።       

ኦነግ ሸኔ መረጃዎችን ይፋ በሚያደርግበት የኮምዩኒኬ ድረ-ገፁ ላይ መንግስት ያደራጃቸው “ጋቸና ሲርና” የሚል ስም የተሰጣቸው የሚሊሽያ ቡድኖች እንዳሉና እነሱም የኦነግ ሸኔ አባሎችን ለመምሰል አርቴፊሻል ዊግ እና ሹሩባዎችን እንደሚያደርጉ ተገልጿል።

ሀቅቼክ ቪድዮውን ለማጣራት ባደረገው ጥረት ቪድዮው ከዚህ በፊት ሐምሌ 16 ፤ 2013 ዓ.ም በአንድ የፌስቡክ አካውንት “የኦሮሞ ነፃነት ሰራዊት የፖለቲካ እስረኞችን ያለምንም ፍርድ እየተሰቃዩ የነበሩትን በማስፈታት ነጻ አውጥቷል። ይህ በእንዲህ እንዳለ ጉዞ ወደ 4ኪሎ በሚል መርህ በብዙ ሺዎች የሚቆጠሩ የሰራዊቱ ኮማንዶዎች በመገስገስ ላይ ይገኛሉ” በሚል ጽሁፍ ተጋርቶ ነበር። ይህ ቪድዮም ከ460 በላይ እይታን ማግኘት ችሏል። 

ሀቅቼክ በሁለቱ ቪድዮዎች ውስጥ ተመሳሳይ ሲቪል ሰዎችን እና ታጣቂዎችን መመልከት ችሏል።

በምዕራብ ወለጋ የተፈፀሙ የተለያዩ ዘርን መሰረት ያደረጉ ጭፍጨፋዎች እንደተፈፀሙ ሪፖርቶች ቢወጡም ይህ የፌስቡክ ገፅ መረጃውን ለመደገፍ የተጠቀመው ቪድዮ የቆየ መሆኑን ማወቅ ተችሏል።
ስለዚህ ሀቅቼክ የፌስቡክ ፖስቱን መርምሮ ሀሰት ብሎታል። 

Exit mobile version