ሼክ መሀመድ ሁሴን አሊ አል አሙዲን ለመጭው የኢትዮጵያ የገና በዓል የ75ሺህ ብር ስጦታ አዘጋጅተዋል?

የበዓል ወቅቶች በቀረቡ ቁጥር የተለያዩ ሰዎችን የማጭበርበሪያ እና የማጥመጃ መንገዶች ጥቅም ላይ ይውላሉ። በዚህ ወቅትም የመንግስት ተቋማት እንዲሁም የተለያዩ የፀጥታ ተቋማት ህብረተሰቡ በበዓላት ወቅት ከእንደዚህ አይነት የማጭበርበሪያ መንገዶች እራሱን እንዲጠብቅ ማሳሰብ አለባቸው።

በአሁኑ ጊዜ አጭበርባሪዎች የተለያዩ ቴክኒክ እና ዘዴዎችን ይጠቀማሉ። ከሚጠቀሟቸው መንገዶች አንዱ የሰዉን ደካማ ጎን እና ስሜቱን ሊይዝ የሚችሉ ነገሮችን በመጠቀም ሲሆን ሰዎች ሽልማቶችን እና ገንዘቦችን ማግኘት ከፈለጉ በፍጥነት እንዲያደርጉ በመገፋፋት በመጠየቅ ነው። ይህንንም ሲያደርጉ የተለያዩ ታዋቂ ፤ ሀብታም እና ተፅዕኖ ፈጣሪ ግለሰቦችን ስም እና ማንነት ከዚህም ባለፈ የታዋቂ ድርጅቶች ምልክቶችን እና ድረ-ገፆችን አስመስሎ በመስራት ታማኝ ለመምሰል ይሞክራሉ። ከሰሞኑ በተለያዩ የፌስቡክ ገፆች ላይ ሼክ መሀመድ ሁሴን አሊ አል አሙዲን ለኢትዮጵያውያን የ75ሺ ብር ስጦታ እየሰጡ እንደሆነ እና ሽልማቱንም ለማግኘት የተቀመጠውን ሊንክ በመጫን በድረ-ገፁ ውስጥ ያለውን ፎርም እንዲሞሉ ያስገድዳል። ፖስቶቹን ለመልከት እዚህ ጋር (ይጫኑ ፣ ይጫኑ)።

ይሁን እንጂ ሀቅቼክ እነዚህን ፖስቶች ከመረመረ በኋላ የተሳሳቱ እና የማጭበርበሪያ መንገዶች እንደሆኑ አረጋግጧል።   

ከተለያዩ የፌስቡክ ፖስቶች የተወሰዱ ምስሎች (ምስል አንድ ፤ ምስል ሁለት)

ትውልደ ኢትዮጵያዊ የሆኑት የሳውዲው ቢልየነር ሼክ መሀመድ ሁሴን አላሙዲን ከየመናዊ አባታቸው እና ከኢትዮጵያዊ አባታቸው በወሎ ክፍለ ሀገር ውስጥ የተወለዱ ሲሆን ከዚያም በኋላ ወደ ሳውዲ አረቢያ ሄደው የሳውዲ ዜግነትን ማግኘት እንደቻሉ መረጃዎች ያሳያሉ። 

በፈረንጆቹ 2024 ብሉምበርግ ይዞ በወጣው የቢልየነሮች ዝርዝር ውስጥ የሳውዲ ኢትዮጵያዊው ቢልየነር ሼክ መሀመድ ሁሴን አላሙዲን በ8.73 ቤልየን ዶላር በአለም ላይ 324ኛ ደረጃ ላይ ተቀምጠዋል።
ሀቅቼክ መረጃውን መረጃውን በፌስቡክ ላይ ያሰራጩትን ሰዎች መረጃውን ከየት እንዳገኙት እና መረጃውን ያጋሩበትን አላማ ለማነጋገር ጥረት ያደረገ ቢሆንም ሁለቱም የፌስቡክ ገፆች የመልዕክት መቀበያ ክፍሉን መዝጋታቸውን ማስተዋል ችለናል። 

ነገር ግን ሀቅቼክ መረጃውን ያሰራጩትን አካላቶች ከዚህ በፊት ሲያሰራጯቸው የነበሩትን መረጃዎች በማጥናት ይህን መረጃ በምን አላማ ሊያሰራጩ ይችላሉ የሚለውን ተመልክቷል። “Apostl Esrael Abebe” በሚል ስም የተከፈተው የፌስቡክ ገፅ አብዛኛውን ጊዜ መንፈሳዊ ይዘት ያላቸውን ነገሮች እንደሚያጋራ የተመለከትን ሲሆን ከዚህ በተጨማሪም በሼክ መሀመድ ሁሴን አሊ አል አሙዲን ስም ላጋራው መረጃም እርግጠኛ እንዳልሆነ እና ሰዎች ሊንኩን ሲጠቀሙ እንዲጠነቀቁ ሰዎች ለጠየቁት ጥያቄዎች መልስ ሲሰጥ ተመልከተናል። ከዚህ በተጨማሪም በኮመንት መስጫው ስር መረጃውን የሚያውቀው ሰው እንዳጋራው እና እሱም ዝምብሎ እንዳጋራው ሲገልፅ ተመልክተናልገ። ከዚህም ተነስተን ይህ የፌስቡክ ገፅ የተሳሳተውን መረጃ ባላማወቅ እንዳጋራው መረዳት ችለናል።

ከዚህ በተጨማሪም ሁለተኛውን እና Mekonnen Maryamawit Muktar በሚል ስም የተከፈተውን የፌስቡክ ገፅ ከዚህ በፊት የሚያጋራቸውን ነገሮች ለመመልከት የሞከርን ሲሆን ይህ ገፅ ከፖለቲካ ነክ ነገሮች አንስቶ እስከ መዝናኛ ቪድዮዎች ድረስ እንደሚያጋራ መመልከት ችለናል። ይህ ገፅ አብዛኛውን ጊዜም ሌሎች ያጋሩትን ነገር መልሶ እንደሚያጋራ መመልከት ችለናል። 

ሀቅቼክ ከነዚህ መረጃዎች በመነሳት በእነዚህ የፌስቡክ ገፆች የተጋራውን ሊንክ ትክክለኛነት ያጣራ ሲሆን ኦንላይን የሚገኙ የማጣሪያ መሳርያዎችን ተጠቅመን ስንመለከት ሊንኩ የሚወስደን ድረ-ገፅ አደገኛ እና ሰዎችን ለማጥመድ የተዘጋጀ እንደሆነ ማረጋገጥ ችለናል። ከዚህ በተጨማሪም የማስፈንጠርያ ሊንኩን ሳንጫን ሊንኩ ሊወስደን የሚችለውን ድረ-ገፅ መመልከት ችለናል።


ሊንኩ አደገኛ እንደሆነ ካሳየን መሳርያ እና ከድረ-ገፁ ላይ የተወሰዱ ምስሎች

ሊንኩ የሚወስደን ድረ-ገፅ የሼክ መሀመድ ሁሴን አሊ አል አሙዲን ምስልን የያዘ ሲሆን እሰጣለው የሚለውን ገንዘብ በቁጥር 95000 ብር ብሎ ካስቀመጠ በኋላ በቅንፍ ውስጥ በአማርኛ ፅሁፍ 75000 ብር ብሎ ያስቀምጣል። 



ድረ-ገፁ የሰራቸውን የፅሁፍ ስህተቶች የሚያሳይ ምስል 

ሀቅቼክ በብዙ የበጎ አድራጎት ስራዎች ላይ የሚሳተፈውን እና በዚህ ጉዳይ መልስ ሊሰጠን ይችላል ብለን ያሰብነውን ሚድሮክ ኢትዮጵያ ኢንቨስትመንት ግሩፕን ያነጋገርን ሲሆን ከሚድሮክ ኢትዮጵያ የሚድያ ሰዎች ጋር ተነጋግረው መልስ እንደሚሰጡን ቃል ገበተውልናል። ከሚድሮክ ኢትዮጵያ ኢንቨስመንት ግሩፕ መልስ እንዳገኘን መልሰን መረጃውን የምናደርስ ይሆናል።

ሼክ መሀመድ ሁሴን አሊ አል አሙዲን እና ቤተሰቦቻቸው በተለያዩ ጊዜያቶች በድርቅ ለተጎዱ ወገኖች እና በበዓላት ጌዜያቶች አቅም ለሌላቸው ወገኖች እርዳታን እንደሚሰጡ ይታወቃል።

ይሁን እንጂ ሀቅቼክ በፌስቡክ ገፆቹ የተጋራውን ፖስት እና የተያያዘውን ሊንክ በማጣራት ሰዎችን የማጥመጃ እና የማጭበርበር ይዘት እንዳለው ማረጋገጥ ችሏል።


 

ሀሰት፡ ቢቢሲ አማርኛ ከፋኖ አስረስ ማረ ጋር የተደረገ ቃለምልልስ ላይ ዘገባ አልሰራም

በግጭቶች ጊዜ የሀሰት መረጃ መስፋፋት ይጨምራል። በቅርቡ በፌስቡክ በሰፊው የተጋራ ፅሁፍ በጎጃም ክፍለጦር ውስጥ የፋኖ የፖለቲካ መምሪያ ሀላፊ የነበረው አስረስ ማረ ለቢቢሲ የሰጠው ቃለምልልስ በሚል ተሰራጭቷል።

በመግለጫው “ከጠላት ጋር እያደረግነው ባለው ውጊያ ብልጫ ተወስዶብናል ነገር ግን ለሽንፈት የሚያበቃ አይደለም” የሚለው ጥቅስ ተያይዞ ተሰራጭቷል። ይህ የፌስቡክ ልጥፍ አቶ አስረስ ማረ በፋኖ እና በመከላከያ መካከል እየተካሄደ ባለው ጦርነት መንግስት(መከላከያ ሰራዊት) የበላይነቱን እየወሰደ መሆኑን ለቢቢሲ ዜና አማርኛ እንደገለጹ ይናገራል። 

ነገር ግን በቢቢሲ ዜና የአማርኛው ድረ-ገጽ ላይ እንዲህ ያለ ጽሁፍ ባለመኖሩ ሃቅቼክ ምርመራ አድርጎ ይህንን ጽሁፉን ከታማኝ ምንጮች አለመወሰድ በማየት መሠረተ ቢስ እና ሀሰት መሆኑን አረጋግጧል።

ከፌስቡክ ገጽ ላይ የተወሰደ ምስል

ጎጃም በሰሜን ምዕራብ አቅጣጫ የሚገኝ የኢትዮጵያ አማራ ክልል ዞን ነው። “ፋኖ” የሚለው ስያሜ “የነጻነት ታጋይ” የሚለውን ትርጓሜ የሚገልጽ ሲሆን በአሁኑ ሰዓት የአማራን ህዝብ እንወክላለን ብለው የሚንቀሳቀሱ ታጣቂ ሃይሎች ይጠቀሙበታል።  

ይህ የተሳሳተ ጽሁፍ ይበልጥ አሳሳቢ የሚያደርገው ቢቢሲ ዜና አማርኛ እንደዘገበው ተደርጎ መሰራጨቱ ነው። 

ቢቢሲ አማርኛን በመጥቀስ ልጥፉን ያጋሩ ፌስቡክ አካውንቶች ምስል

አስረስ ማረ በአማራ ክልል በፋኖ ታጣቂዎች እና በመከላከያ ሰራዊት መካከል እየተካሄድ ባለው ጦርነት በጎጃም ያለውን የፋኖ ሚሊሻ ቡድን እየመራ ይገኛል። 

ሀቅቼክ የቢቢሲ አማርኛ ባለፉት 3ወራት የሰራቸውን ዘገባዎች ላይ ማጣራት ያደረገ ቢሆን በቢቢሲ አማርኛ እና በፋኖ ወታደር አስረስ ማሬ መካከል የተደረገውን ውይይት የሚያሳይ የዜና ዘገባ አላገኘም። እንዲሁም በፌስቡክ የተሰራጨው ልጥፍ ላይ ቢቢሲ ዘግቦበታል የተባለበትን ቀን አላስቀመጠም።

ይህ ስክሪን ሪከርድ የቢቢሲ አማርኛ ያለፉት 3 ወራት ዘገባዎችን ያሳያል  

ቢቢሲ-አማርኛ የብሪቲሽ ብሮድካስቲንግ ኮርፖሬሽን (ቢቢሲ) የአማርኛ ቋንቋ አገልግሎት ሲሆን ዜና እና መረጃን ለአማርኛ ተናጋሪ እና ታዳሚዎች በዋናነት በኢትዮጵያ ፣ በአፍሪካ ቀንድ አህጉራዊ ጉዳዮችን እንዲሁም ዓለም አቀፍ ክስተቶችን ይዳስሳል። 

በተጨማሪም ሀቅቼክ በእይታ ምርመራ ቴክኒኮች በጥልቀት ሲመረመር ፣ የተያያዘው ምስል የተቀናበረ ስለመሆኑ ፍንጭ አግኝቷል።  

የቢቢሲ አማርኛ ፖስት ተብሎ የተያያዘው ልጥፍ ምስልም በሀቅቼክ ምርመራ አስረስ ማሬ ዳምጤ በሚል የተሰየመ የፌስቡክ ገፅ ላይ እ.ኤ.አ ሰኔ 20 ፣ 2022 የመግለጫ ምስል ማዘመን (profile picture update) ላይ አግኝቶታል።

እ.ኤ.አ. ሰኔ 20 ፣ 2022 ከተሰራጨ ልጥፍ የተወሰደ ምስል

አንዳንድ ጊዜ የዜና ድረ-ገፆች መረጃዎችን ካጋሩ በኋላ መልሰው ሲያነሱት ይታያል። ለዚህም ሀቅቼክ በማህበራዊ ሚድያ ላይ ስለተሰራጨው ልጥፍ ሀቅቼክ የቢቢሲ አማርኛ አርታኢ የሆኑትን አቶ አሻግሬ ሀይሉን አነጋግሯል። እሳቸውም ቢቢሲ አማርኛው ይህን ዘገባ እንዳልሰራው እና መረጃውም የሀሰት ፈጠራ መሆኑን አሳውቀውናል።

አያይዘውም አንባቢዊች ዜናዎችን በቢቢሲ ስም ሲሰራጩ መረጃው ትክክለኛ መሆኑን ለማወለማወቅ ወደ ይፋዊ የቢቢሲ አማርኛ ድረ-ገጽ https://www.bbc.com/amharic የሚወስድ አገናኝ(link) እንዲፈልጉ መክረዋል።

ከላይ በተዘረዘሩት ምክንያቶች ሀቅቼክ ልጥፉን ሀሰት መሆኑን አረጋግጧል።

ይህ ቪዲዮ በቅርቡ የተመረጡት ፕሬዝደንት ዶናልድ ትራምፕ ስለ ዲቪ ያደረጉትን ንግግር ያሳያል?

በቅርቡ በDiversity Visa (ዲቪ) ላይ የሚጣሉ ገደቦችን በተመለከተ የተመራጩ ፕሬዝዳንት ዶናልድ ትራምፕ ንግግርን የሚያሳይ ቪዲዮ በቲክቶክ ላይ በመሰራጨት ላይ ይገኛል። ይህ ቪድዮ በቅርብ ከተካሄደው የ(ዲቪ) 2026 ፕሮግራም ጋር በማያያዝ የቀረበ ነው።


ከቲክቶክ ቪድዮው ላይ የተወሰደ ምስል

ነገር ግን ሀቅቼክ ይህን ቪዲዮ በፈረንጆቹ 2017 ፕሬዝደንት ዶናልድ ትራምፕ የዲቪ ፕሮግራምን ለማቋረጥ ያላቸውን ፍላጎት የገለፁበት ንግግር ሆኖ አግኝተነዋል።

ከNBC News (ኤንቢሲ ኒውስ) ዩቲዩብ ገጽ ቪድዮ ላይ የተወሰደ ምስል

NBC News ፖለቲካን ፣ ንግድን ፣ ጤናን ፣ ሳይንስን እና ባህልን ጨምሮ አጠቃላይ ሀገራዊ እና አለም አቀፍ ዜናዎችን የሚያቀርብ በአሜሪካ የሚገኝ ታዋቂ የዜና ድርጅት ነው። ይህ የዜና ተቋም በድህረ ገጽ ፣ በቲቪ ስርጭቶች እና በዲጂታል መድረኮች የተለያዩ ይዘቶችን ያቀርባል ፣ ይህም ተመልካቾች በቅርብ ወቅታዊ ትኩስ ዜናዎች ፣ ጥልቅ ትንታኔ እና ልዩ ዘገባዎች እንዲያገኙ ያደርጋል።

ዶናልድ ትራምፕ በፕሬዝዳንትነት ዘመናቸው በስደተኞች ላይ ባላቸው ጠንካራ አቋም ይታወቃሉ። ብዙውን ጊዜ ጥብቅ የድንበር ቁጥጥር እርምጃዎችን እና የኢሚግሬሽን ፕሮግራሞች ላይ ገደቦችን ይጥላሉ። የዳይቨርሲቲ ቪዛ ሎተሪ ጉዳይን በተመለከተ ትራምፕ ፕሮግራሙን በመቃወም ለሃገሪቷ ደህንነት ስጋት ሊሆን እንደሚችል በመግለጽ እና የአሜሪካን ጥቅም ማስከበር አልቻለም ብለው ተችተዋል።

በዳይቨርሲቲ ቪዛ ፕሮግራም ላይ የሰነዘሩት ትችት የአመልካቾችን የማጣራት ሂደት እና ተጠቃሚዎችን በመምረጥ ረገድ ብቃትን መሰረት ያደረገ መስፈርት አለመኖሩን ያነሳል።

ከTime (ታይም) ድህረ ገጽ ቪድዮ ላይ የተወሰደ ምስል

ትራምፕ በዳይቨርሲቲ ቪዛ ሎተሪ ላይ ያላቸው አቋም በፖለቲካ ዘመናቸው ሁሉ አከራካሪ የነበረ ሲሆን አንዳንዶች ለብሔራዊ ደኅንነት ሲባል የኢሚግሬሽን ገደቦችን ለማጠናከር የሚያደርጉትን ጥረት ሲደግፉ ፣ ሌሎች ደግሞ የአሜሪካ መንግስት ለረጅም ጊዜ ስትደግፍ የኖረችውን የብዝሃነት እና የመደመር እሴቶችን የሚጎዳ አድርገው ይመለከቱታል።

የዚህ ቪዲዮ አሳሳች ባህሪ በቅርቡ የተደረገ ንግግር መሆኑን በውሸት በመግለጽ መረጃን ስለመጠቀም እና በማህበራዊ ሚዲያ መድረኮች የተሳሳቱ መረጃዎችን በማሰራጨት ስጋትን ይፈጥራል።

አሳሳች ልጥፎች በስደተኞች ላይ ጎጂ ውጤት ሊኖራቸው ይችላል። እንዲህ ዓይነቱ ይዘት ስለ ኢሚግሬሽን ፖሊሲዎች እና ወደ አሜሪካ ለመሰደድ ለሚፈልጉ ግለሰቦች የተሳታቱ መረጃዎችን ያጋራል። 

ይህ የተሳሳተ መረጃ በማህበራዊ ሚድያ ላይ በቀላሉ ሊስፋፋ በሚችልበት በዚህ ወቅት እውነትን መፈተሽ እና ምንጮችን ማረጋገጥ አስፈላጊ ነው። 

ከላይ በተጠቀሱት ምክንያቶች አማካኝነት ሀቅቼክ ልጥፉን መርምሮ ሀሰት/አሳሳች መሆኑን አረጋግጧል።

ኢትዮጵያ በ2024 በመጸዳጃ ቤት እጥረት ከአለም ቀዳሚ ስፍራ ላይ ትገኛለች?

ከሰሞኑን ከተካሄደው የ2024 የአለማቀፍ የመፀዳጃ ቤት ቀን ጋር በተያያዘ ኢዮጵያን የሚመለከቱ ዘገባዎች የቀረቡ ሲሆን በዚህም አንድ በቴሌግራም ላይ ዜናዎችን የሚያጋራ ቻናል ኢትዮጵያ በመጸዳጃ ቤት እጥረት ከአለም ቀዳሚዉ ስፍራ ላይ እንደምትገኝ የWaterAid (ዋተር-ኤይድ) ሪፖርት ያሳያል በሚል መረጃ አጋርቷል። ነገር ግን ሀቅቼክ ባደረገው ማጣራት በ2024 ይህን መሰል መረጃ በዋተር-ኤይድ ድህረ ገጽ ላይ አልተገኘም ፣ ይህም የዘገባውን ትክክለኛነት ጥያቄ ውስጥ እንዲገባ አድርጎታል።


የቴሌግራም ዘገባው ከፊል ገጽታ

Africa News (አፍሪካ ኒውስ) ቀደም ሲል እ.ኤ.አ. በ2018 ኢትዮጵያ በመጸዳጃ ቤት እጥረት ቀዳሚ ሀገር መሆኗን የሚያሳይ ሪፖርት ጽሁፍ አውጥቶ ነበር። ይህንንም መረጃ ከዋተር-ኤይድ 2018 አመታዊ ሪፖርት እንዳገኘው ገልጿል። እውነተኛነቱንም ሀቅቼክ ከዋተር-ኤይድ ሪፖርት ማረጋገጥ ችሏል። 

አፍሪካ ኒውስ ከአፍሪካ አህጉር የተውጣጡ ዜናዎችን እና መረጃዎችን ለማህበረሰብ በማድረስ ላይ የሚያተኩር ዲጂታል የዜና መድረክ ነው። እ.ኤ.አ. በ2016 ስራ የጀመረ ሲሆን ከዚያን ጊዜ ጀምሮ በወቅታዊ ጉዳዮች ፣ ፖለቲካ ፣ ንግድ ፣ ባህል ፣ ቴክኖሎጂ እና ስፖርትን ጨምሮ የተለያዩ ርዕሰ ጉዳዮችን የሚመለከቱ ዘገባዎችን በመስራት ላይ ይገኛል ። ድህረ ገፁ በአፍሪካ ጉዳዮች ላይ የማወቅ ፍላጎት ያላቸውን የአህጉሪቷን እና የአለም አቀፍ ታዳሚዎችን ለማስተናገድ የተነደፈ ነው።

ከአፍሪካ ኒውስ ድህረ-ገጽ የተወሰደ ምስል Nov 20,2018

ይህ መረጃ እንዳለ ሆኖ በ2024 በWorldpopulationreview (ዎርልድ ፖፑሌሽን ሪቪው) የወጣው ዘገባ የተለየ መረጃን ይዟል። በዚህ ወቅታዊ መረጃ መሰረት ኢትዮጵያ የንፅህና አጠባበቅ ሁኔታዋን በማሻሻል ረገድ ከፍተኛ እመርታ በማስመዝገብ በቂ መጸዳጃ ቤት ከሌላቸው 10 ሀገራት ዝርዝር ውስጥ ራሷን በተሳካ ሁኔታ ማውጣት ችላለች።


ከዎርልድ ፖፑሌሽን ሪቪው ገጽ የተወሰደ ምስል

WorldPopulationReview.com ስለ አለምአቀፍ የስነ-ህዝብ እና የህዝብ ስታቲስቲክስ ዝርዝር ግንዛቤዎችን በማቅረብ ላይ ያተኮረ የዲጂታል መድረክ ነው። እንደ የተባበሩት መንግስታት ድርጅት፣ የዓለም ባንክ እና ይፋዊ የስታቲስቲክስ ኤጀንሲዎች መረጃን በሚያካትት የመረጃ አሰባሰብ ሂደት ድህረ ገፁ በዓለም ዙሪያ ላሉ ሀገራት እንደ የህዝብ ብዛት ፣ የእድገት ደረጃዎች እና የከተሜነት ሁኔታዎችን የተለያዩ የስነ-ሕዝብ መረጃዎችን ያቀርባል። መረጃን በግራፎች ፣ ቻርቶች ፣ ትንተና እና ምስላዊ እይታዎች የበለጠ ተደራሽ ለማድረግ ወቅታዊውን የአለም ህዝብ መረጃ እና የስነ-ህዝብ መረጃ ለማቅረብ ቁርጠኛ የሆነ ራሱን የቻለ ለትርፍ የሚሰራ ድርጅት ነው።

ከ2024 ዎርልድ ፖፑሌሽን ሪቪው ድህረ ገጽ የተወሰደ ምስል

ይህ አስደናቂ እድገት መንግሥታዊ ተነሳሽነቶች እና ዓለም አቀፍ የእርዳታ ድርጅቶች በኢትዮጵያ ውስጥ የንጽህና መሠረተ ልማቶችን እና ተግባራትን ለማሳደግ ባደረጉት ትብብር ጥረት የተገኘ ተደርጎ ሊወሰድ ይችላል። የእነዚህ አካላት የተቀናጀ ጥረት ፍሬ አፍርቶ በሀገሪቱ የንፅህና አጠባበቅ ገጽታ ላይ ተጨባጭ መሻሻል አስገኝቷል።

ጠቅላይ ሚኒስትር አብይ አህመድ ዘመናዊ እና ፅዱ የህዝብ መጸዳጃ ቤቶችን ለመገንባት በማለም የ”ፅዱ ኢትዮጵያ” ፕሮጀክት ሚያዝያ 26 ቀን 2024 አስጀመሩ። ይህ ፕሮጀክት በግንባታው ሂደት ውስጥ የህብረተሰቡን ተሳትፎ አፅንዖት የሚሰጥ እና ለሁሉም ሰው ምቹ የሆኑ ከተሞችን ለመፍጠር ያለመ ነው። ይህ ፕሮጀክት “ንጹህ ከተሞች – ጤናማ ህይወት” በሚል መሪ ቃል የገንዘብ እና የአይነት መዋጮዎችን ማሰባሰብያ ፕሮግራምን ያካትታል።

ከፋና ብሮድካስቲንግ ኮርፖሬት ድህረ ገጽ የተወሰደ ምስል

ፕሮጀክቱ በከፍተኛ ተግባራዊ ሂደት ላይ የሚገኝ ሲሆን ለዚህም በከተማው ውስጥ እስካሁን ተገንብተው የቀረቡት መጸዳጃ ቤቶች ምስክር የሚሆኑ ናቸው። ለእነዚህ የህዝብ መጸዳጃ ቤቶች ዘላቂ የሆኑ ቁሳቁሶችን ለመጠቀም እና ጥራት ያለው የግንባታ አጨራረስን ለማረጋገጥ ጠቅላይ ሚኒስትሩ ያላቸውንም ቁርጠኝነትን ገልጸዋል። ይህ ፕሮጀክት ባካሄደው የገቢ ማሰባሰቢያ በ10 ሰአት ውስጥ ብቻ ከ154 ሚሊየን ብር በላይ በዲጂታል ቴሌቶን ገቢ ማግኘቱም ተገልጿል።

ከኢትዮጵያ ዜና አገልግሎት ድህረ ገጽ የተወሰደ ምስል 

ኢትዮጵያ በወታደራዊ አቅሟ ከአፍሪካ ሁለተኛ ናት?

የእርስ በእርስ ግጭቶችንና ጦርነቶች እያስተናገደች የምትገኝው ኢትዮጵያ፣ ከሌሎች ሀገራት ጋር ያላት የዲፕሎማሲያዊ ግንኙነቶች ያጋጠሙ ተግዳሮቶች ተከትሎ የወታደራዊ ወሬዎች ርዕስ እንድትሆን አድርጓታል። ይህን ተከትሎም በተለያዩ ጊዜያት የኢትዮጵያ ማህበራዊ ሚድያ ላይ የኢትዮጵያን ወታደራዊ አቅም ከሌሎች ጎረቤት ሀገራት ጋር እያወዳደሩ የተለያዩ ተንቀሳቀሽ ምስሎችን መልቀቅ እየተለመደ መጥቷል።

ከሰሞኑ በፌስቡክ ላይ ብዙ እይታዎችን ማግኘት የቻለ እና በብዙዎች ዘንድ እየተጋራ የሚገኝ አንድ መረጃ በስፋት ሲዘዋወር ቆይቷል።  ይህ በፌስቡክ ላይ በስፋት ሲጋራ የቆየው መረጃ በያዝነው የፈረንጆቹ 2024 የአፍሪካ ሀገራቶችን የወታደራዊ ጥንካሬን እና ደረጃን የሚያሳይ ነው።

በተለያዩ የፌስቡክ ገፆች እና አካውንቶች በህዳር 3 ቀን 2017 ዓ.ም የተጋራው ይህ መረጃ በወታደራዊ ጥንካሬ ኢትዮጵያ በደቡብ አፍሪካ ተቀድማ ፤  አልጄርያ ፤ ግብፅ እና ናይጄርያን አስከትላ ሁለተኛ ደረጃ መያዟን ይገልፃል። ተመሳሳይ መረጃዎችም የተለያዩ ገፆች ላይ ሲጋሩ ቆይተዋል። (ይመልከቱ ፤ ይመልከቱ ፤ ይመልከቱ ፡፡)

ይሁን እንጂ ሀቅቼክ መረጃውን እና የመረጃው ምንጭ የተባለውን ገፅ ያጋራውን መረጃ በማመሳከር እና በማጣራት መረጃውን ሀሰት ብሎታል።     

      ከተለያዩ የፌስቡክ ገፆች የተወሰዱ ምስሎች ፡ ህዳር 3 ቀን 2017 ዓም የተጋሩ 

የአንድ ሀገር ወታደራዊ ጥንካሬ የሚለካው በተለያዩ መመዘኛ ነጥቦች ሲሆን ከነዚህም መካከል አንድ ሀገር ያሉት ንቁ/Active እና ተጠባባቂ ወታደሮች ፤ ያሉት የመሳሪያ አቅም ማለትም ያለው ወታደር እና የወታደራዊ በጀት ፤ የሎጅቲክ አቅም ከግምት ውስጥ ይገባሉ።  

የአንድ ሀገር ወታደራዊ አቅም በምን ይለካል? 

ወታደራዊ አቅም የሚባለው ነገር ሰፊ እና የተለያዩ ፅንሰ ሀሳቦች በውስጡ የሚገኙ ሲሆን እነዚህ ነጥቦች አንድ ሀይሉን የማሳየት እና ሉአላዊነት እና ጥቅሙን ማስከበር የሚችልበትን ደረጃ ለመምዘን ይረዳሉ። አንድ ሀገር ያላት የወታደር ብዛት ብቻውን ሀገሪቱ ያላትን ወታደራዊ ጥንካሬ ለማሳየት መሆን አይችልም። ከዚህ በተጨማሪ የወታደር ብዛት ወታደራዊ ውጤታማነት ላይ የሚያመጣው ጥሩ እና መጥፎ ነገሮች ከግምት ውስጥ መግባት አለባቸው።       

ይህ ብቻ ሳይሆን ወታደራዊ መሳርያዎቹ ያላቸው ጥራት እና ከዘመኑ ጋር አብሮ መሄዳቸው ፤ ሀገሪቱ ያላት ስትራቴጂካዊ አቀማመጥ እና ለመከላከያ የሚመደበው በጀት ከግምት ውስጥ ይገባሉ።

በ2024 የአፍሪካ ሀገራቶች ወታደራዊ ደረጃ

በአለም ላይ ያሉ ሀገራቶችን ወታደራዊ አቅም የሚለኩ እና ደረጃ የሚሰጡ አንዳንድ ድርጅቶች እና ተቋማቶች አሉ።  ይህ የደረጃ አሰጣጥ የተለያዩ ሁኔታዎችን ከግምት ውስጥ ያስገባ ሲሆን ይህም የወታደር ብዛት ፣ የጦር መሳሪያዎች ፣ ወታደራዊ በጀት ሎጂስቲክ እና አጠቃላይ ስልታዊ ችሎታዎችን ከግምት ውስጥ ያስገባ ነው።

ከነዚህ ተቋማት መካከል ግሎባል ፋየርፓወር (Global Firepower ) የተሰኘው ተቋም በአለም ላይ ተቀባይነት ያለው እና በአለም ላይ ያሉ ሀገራቶች ወታደራዊ አቅም እና መከላከያው ያለው ሀብቶች ላይ አጠቃላይ ግምገማዎችን ያደርጋል። ግሎባል ፋየርፓወር የተሰኘው ይህ ተቋም በአለም ላይ ያሉ ሀገራት ያላቸውን የመከላከያ ሀይል ጥንካሬ በቁጥር እና ጥራት ላይ መሰረት በማድረግ ልዩ የሆነ የደረጃ አሰጣጥ ስርዓትን ተጠቅሞ ደረጃ ይሰጣል።   ይህ ተቋም በየአመቱ  የሚወጣው ሪፖርት እና የደረጃ አስጣጥ ከ60 በላይ መለኪያዎችን ከጥቅም ላይ ያውላል። 

በፈረንጆቹ 2024 የወጣው ግሎባል ፋየርፓወር ሪፖርትም ከ145 በላይ ሀገራቶችን ከግምት እና ደረጃ ውስጥ ማስገባት ችሏል። በዚህ ዝርዝር ሪፖርት መሰረት ግብፅ ከአፍሪካ ሀገራት በወታደራዊ ጥንካሬ በአንደኝነት ስትቀመጥ አልጄሪያ፣ ደቡብ አፍሪካ፣ ናይጄሪያና ኢትዮጵያ ከሁለተኛ እስከ አምስተኛ ያለውን ደረጃ በቅደም ተከተል ይይዛሉ፡፡

 
ከግሎባል ፋየርፓወር እ.ኤ.አ የ2024 ሪፖርት የተወሰደ ምስል 

ሌላው ሀቅቼክ የተመለከተችው ወታደራዊ መረጃዎችና ንፅፅሮችን በማቅረብ የሚታወቀው ስታቲስታ (Statista) የተባለ ተቋም ሲሆን ድርጅቱ ስታቲስቲካዊ መረጃዎችን በመጠቀም ግላጭ ምስሎችን የሚያቀርብ፣ ከ80,000 በላይ ርዕሰ ጉዳዮችን በተመለከተ ሰፊ የስታቲስቲክስ ሪፖርቶች እና ግንዛቤዎች በመብሰብሰብ መረጃ የሚሰጥ መካነ ድር ነው። ይህም ተቋም የ2024 የአፍሪካ ሀገራት ወታደራዊ ደረጃዎች ላይም መረጃዎችን አውጥቷል።  በዚህም ሪፖርቱም የኢትዮጵያን ሁለተኛነት አያሳይም፡፡

    ከስታቲስታ የ2024  እ.ኤ.አ ሪፖርት የተወሰደ ምስል 

በማኅበራዊ ሚዲያ የተጋሩት የኢትዮጵያን ሁለተኛነት የሚያሳዩት ምስሎች የተጠቀሙት ምስል ላይ ስታቲሴንስ (Statisense)  እንደምንጭነት የተጠቀሰ ሲሆን ሀቅቼክ ይህ ተቋም ማነው የሚለውን ለማጣራት ባደረገው ሙከራ ድርጅቱ በዋናነት በአፍሪካ በትምህርት፣ ጤና፣ ማኅበራዊና ኢኮኖሚያዊ ጉዳዮች ላይ መረጃ በመተንተን እና የአቅም ግንባታ ስራዎች አገልገሎት እንደሚሰጥ ተረድቷል፡፡  ይህ ተቋም የንግዶች ተቋማቶች እንዴት እንደሚገናኙ እና የፋይናንሺያል መረጃቸውን በመተንተን ላይ ያተኮረ ሲሆን ለዚህም ስራ የሰው ሰራሽ አስተውሎት (AI) በዋናነት እንደሚጠቀም ማወቅ ተችሏል።

                 
          Screenshot of በማህበራዊ ሚድያ ከተሰራጩት ምስሎች የተወሰደa የStatisense አርማ

ሀቅቼክ በስታቲሴንስ የማህበራዊ ሚዲያ አማራጮች ላይ የተጋራውን ትክክለኛ እና ያልተቀናበረውን የመረጃ ፖስት ማገኘት ችሏል። ሀቅቼክ ትክክለኛውን ፖስት በስታቲሴንስ ይፋዊ የX ገፅ በጥር 28 ቀን 2016 ዓ.ም ላይ ተጋርቶ አግኝቶታል። በግምገማችን መሰረት በኢትዮጵያ ማህበራዊ ድረ-ገጽ ላይ ሲሰራጩ የነበሩት ምስላዊ መረጃዎች ተቀይረው እንደተጋሩ መረዳት ችሏል። በተለይም የአንዳንድ ሀገራቶችን ባንዲራ ቦታውን በመቀያየር በ2024 የአፍሪካ ሀገራት ወታደራዊ ጥንካሬ ደረጃ የተለየ እንዲሆን ለማድረግ ሞክረዋል።


                                  የተቀናበረ እና ትክክለኛ መረጃ የሚገኝበት ፖስቶች የተወሰደ ምስል

ስለዚህ መረጃ እንዲነግሩን እና ተጨማሪ መረጃዎችን እንዱያጋሩን ወደ ስታቲሴንስ የኢሜይል መልዕክትን የላክን ሲሆን ይህ ፅሁፍ እስከተጋራበት ጊዜ ድረስ መልስ ማግኘት አልቻልንም።


ማጠቃለያ/ውሳኔ

ኢትዮጵያ በአፍሪካ በወታደራዊ ጥንካሬ ከአፍሪካ በሁለተኛ ላይ ትገኛለች የሚለው መረጃ በስፋት ሲጋራ ቆይቷል፡፡ ይሁን እንጂ ሀቅቼክ ወታደራዊ ጥንካሬን በመረጃ በመመዘን እና በማንፃፀር የሚታወቁ ምንጮችን ዋቢ በማድረግና እንደምንጭነት የተጠቀሰው ተቋም ያጋራውን ትክክለኛ መረጃ መሰረት በማደረግ መረጃው ሀሰት እንደሆነ ማረጋግጥ ችሏል። 

መንግስት ዜጎች የገንዘብ እርዳታ ለማግኘት እንዲመዘገቡ ጥሪ አቅርቧል?

በቅርቡ በፌስቡክ ላይ የወጣ አንድ ልጥፍ የብዙ ኢትዮጵያውያንን ቀልብ መሳብ የቻለ ሲሆን ይህም መንግስት ከ18 አመት በላይ ለሆኑ ዜጎች የታለመ የ35,000ብር የገንዘብ ድጋፍ ለማድረግ በምዝገባ ላይ ነው የሚል መረጃ ነው።ነገር ግን ይህ መረጃ ህብረተሰቡን ለማጭበርበር የተነደፈ ፈጠራ እንጂ እውነት አይደለም።

ሊንክ

በርካታ ግለሰቦች በአስተያየቶች መስጫ ክፍል ላይ ፍላጎታቸውን ሲገልጹ ነበር። በዚህ በፌስቡክ ላይ በተጋራው መረጃ ሰዎች የግል መረጃቸውን ማለትም ስም እና የባንክ አካውንት ቁጥሮችን እንዲመዘግቡ ሲደረግ ተመልክተናል።
ለመመዝገቢያ በማለትም የተመለከተው ድረ-ገፅ ሊንክ የማይሰራ ሆኖ አግኝተነዋል።

ሊንክ

የመንግስት ኤጀንሲዎች ለየትኛውም አይነት አገልግሎት ምዝገባ የግል መረጃ በሚፈልጉበት ግዜ በዘፈቀደ በግለሰብ በተከፈቱ የፌስቡክ ገጾች ላይ ሳይሆን ጉዳዩ በሚመለከተው መስሪያ ቤት የተረጋገጠ የሚድያ አውታር እንዲሁም በህጋዊ መደበኛ የሚድያ ተቋማት ብቻ ማስታወቂያዎችን ያሰራጫሉ። 

እንደዚህ አይነት ሀሰተኛ የማህበራዊ ሚድያ ልጥፎች ለአጭበርባሪዎች ሰፊ የማጭበርበሪያ መንገድን ይሰጣል። ለምሳሌ በዚህ ልጥፍ ስር ባለው የአስተያየት መስጫ ክፍል ላይ የመጀመሪያው ሰው አስተያየት በመጀመሪያ 1000ብር ማስገባት እንዳለባቸው ከዚያም ገንዘቡ ከአንድ ወር በኋላ እንደሚለቀቅላቸው እና ይህንን መስፈርት የሚቀበሉ ሰዎች በውስጥ የመልዕክት መስመሩ (inbox) እንዲገናኙ ይጋብዛል። ይህ መልዕክት ይኑር እንጂ በዚህ መንገድ ሰዎች 1000ብር አስገብተው ቃል የተገባውን ገንዘብ ከአንድ ወር በኋላ አያገኙም።

ሊንክ

እንደዚህ አይነት ማጭበርበሮች እና የማጭበርበሪያ ድርጊቶች በማህበራዊ ሚዲያ ላይ እየተስፋፉ መጥተዋል። በዚህ ምክንያት ብዙ ሰዎች ገንዘብ ንብረቶቻቸውን አጥተዋል። እነዚህ አጭበርባሪዎች ግለሰቦቹን የግል እና የፋይናንስ መረጃዎችን እንዲገልጹ ለማታለል እንደ ኢሜይል ፣ ሀሰተኛ ድረ-ገጾች ፣ ሀሰተኛ ማገናኛዎች እና የማህበራዊ ሚዲያ ማስታወቂያዎች ያሉ ቴክኒኮችን ይጠቀማሉ።

ብዙ ሰዎች በተጭበረበሩ የመገናኛ ዘዴዎች ምክንያት አሳማኝ ባህሪ ምክንያት የእነዚህ ማጭበርበሮች ሰለባ ይሆናሉ። የኦንላይን ላይ ማጭበርበሮች ፣ አጭበርባሪዎች ማንነታቸው ሳይታወቅ ድርጊቶችን የማከናወን ዕድላቸው ሰፊ በመሆኑ እና በይነመረቡ በሚሰጠው ሰፊ ተደራሽነት አማካኝነት እጅግ እየተስፋፋ መጥቷል። 

እየጨመረ የመጣውን ስጋት በኢትዮጵያ ውስጥ ያሉ የፋይናንስ ተቋማት እና የህግ አስከባሪ ኤጀንሲዎች ህዝቡ ጥንቃቄ እንዲያደርግ ሲናገሩ ይታያሉ። እነዚህ ተቋማት በኦንላይን ላይ የግል መረጃን አለማጋራት፣ የጥያቄዎችን ትክክለኛነት ማረጋገጥ እና አጠራጣሪ ድርጊቶችን ወዲያውኑ ሪፖርት ማድረግ አስፈላጊ መሆኑን ይገልጻሉ።

ሊንክ    

ሊንክ

እነዚህ ጥረቶች ቢኖሩም ፣ የአጭበርባሪዎች መበራከት እና በሚጠቀሟቸው የተለያዩ አጓጊ ስልቶች ህብረተሰቡን አሁንም ድረስ በማታለል ላይ ይገኛሉ። ለዚህም የተሻሻሉ እና ተደራሽ የሆኑ የግንዛቤ ማስጨበጫ ፕሮግራሞችን በማዘጋጀት ማህበረሰቡን በደንብ ማስተማር ያስፈልጋል። ከዚህም በተጨማሪ ህዝቡ እነዚህን መሰል ሀሰተኛ መረጃዎችን የሚያረጋግጡበትን መንገዶች ማሳወቅ ወሳኝ ሚና ይጫወታል። 

አምስቱ የአፍሪካ ሀገሮች ግማሽ ያህል የሚሆነውን የአፍሪካ የሀገር ውስጥ ምርት ይሸፍናሉ?

ከሰሞኑ በአንድ የx ወይም በቀድሞ ስሙ ትዊተር ላይ የተጋራ ፖስት በያዝነው ዓመት በፈረንጆቹ 2024 ግማሽ የሚሆነውን የአፍሪካ የሀገር ውስጥ ምርትን (GDP) የሚመጣው ከአምስት ሀገሮች እንደሆነ በመግለፅ እነሱም አልጄርያ ፤ ግብፅ ፤ ኢትዮጵያ ፤ ናይጄርያ እና ደቡብ አፍሪካ እንደሆኑ ይናገራል።ሀቅቼክ መረጃ እና ምንጮችን አመሳክሮ ይህ መረጃ እውነት እንደሆነ ማረጋገጥ ችሏል።    ሊንክዓለም አቀፉ የገንዘብ ፈንድ (IMF) በቅርቡ ባወጣው ሪፖርት መሰረት ከአፍሪካ የሀገር ውስጥ ምርት ትልቁን ኢኮኖሚ የሚይዘው ከአልጄርያ ፤ ግብፅ ፤ ኢትዮጵያ ፤ ናይጄርያ እና ደቡብ አፍሪካ የሚገኘው ምርት (GDP) እንደሆነ ገልጿል። 

ሊንክ

ሀገራትየአሜሪካ ዶላር (በቢልዮን) 
ደቡብ አፍሪካ373.233
ግብፅ347.594
አልጄርያ266.780
ናይጄርያ 252.738
ኢትዮጵያ 205.130

የ2024 የሀገራት GDP ሰንጠረዥ

በፈረንጆቹ ሚያዝያ 2024 እንደተለቀቀው የአለም ኢኮኖሚ ሪፖርት ከሆነ ከእነዚህ አምስት ሀገሮች የሚመረተው ምርት የአህጉሪቱን ግማሽ የሚሆነውን ምርት (GDP) እንደሚይዝ ያስቀምጣል። በፈረንጆቹ 2024 ከኤርትራ እና ከምዕራብ ሰሀራ ውጭ የአህጉሪቱ አጠቃላይ GDP 2,819.317 ቢልዮን የአሜሪካን ዶላር ሲሆን እነዚህ አምስት ሀገራቶች ከዚህ ውስጥ 1,445.475 ቢልዮን የአሜሪካን ዶላር የሚሆነውን ይሸፍናሉ።


ሊንክ

አለም አቀፉ የገንዘብ ፈንድ (IMF) ባስቀመጠው ትንተናም የአፍሪካን ኢኮኖሚ በመምራት ዘንድ እነዚህ የአፍሪካ ሀገራቶች ትልቁን ድርሻ እንደሚወስዱ አጽኖት ስጥቶ ገልፆታል። አልጄርያ ፤ ግብፅ ፤ ኢትዮጵያ ፤ ናይጄርያ እና ደቡብ አፍርካን በተለያዩ አለም አቀፍ እና አህጉራዊ ፈተናዎች ውስጥ ሆነው በአህጉሪቱ በሚታዩ የኢኮኖሚ ምህዳር ውስጥ ትልቅ እና ቁልፍ ተዋናዮች በመሆን ጠንካራ እድገትን አሳይተዋል።    

እነዚህን መረጃዎች ስናጠናክር ይህ በX ወይም በቀድሞ መጠሪያው ትዊተር ላይ ምንጭ በመጥቀስ የተጋራው መረጃ ትክክል መሆኑን ሀቅቼክ ማረጋገጥ ችሏል።

         

ኢትዮጵያ የመገበያያ ገንዘቧን በሀገር ውስጥ ማተም ልትጀምር ነው?

እንደ ዩቲዩብ ባሉ የኦንላይን መድረኮች ላይ ከዘጠኝ ሺህ በላይ እይታዎች እንዲሁም በቲክቶክ ላይ ከሶስት ሺህ በላይ እይታዎችን በማግኘት በከፍተኛ ሁኔታ እየተሰራጨ ያለው ይህ ቪዲዮ ኢትዮጵያ በአዲስ አበባ ቦሌ ለሚ ኢንዱስትሪ ፓርክ ትልቅ መሠረተ ልማት ለመገንባት ከጃፓን ኩባንያ TOPPAN GRAVITY ጋር ስምምነት መፈራረሟን ይገልፃል። ከዚህ በተጨማሪም ይህ ቪዲዮ በዚህ ስምምነት ኢትዮጵያ የመገበያያ ገንዘቧን ሀገር ውስጥ ማትም እንደሚያስችላት ይናገራል።

ሊንክ

ቪዲዮው መግለጫውን ለመደገፍ የተለያዩ የመንግስት ባለስልጣናትን እና የTOPPAN GRAVITY አስተዳዳሪዎችን ምስል ከቪዲዮው ጋር በማያያዝ ተጠቅሟል።

ሊንክ

ነገር ግን ሀቅቼክ መረጃውን ለማጣራት ባደረገው ጥረት ስምምነቱ ለገንዘብ ህትመት ሳይሆን እንደ ፓስፖርት ፤ ብሄራዊ መታወቂያ ፤ ኤቲኤም ካርዶች ፤ የማስተርካርድ ምርቶች እና ሌሎች የመንግስት ሰነዶችን የመሳሰሉ ከፍተኛ የደህንነት ሰነዶችን ለማምረት እንደሆነ አረጋግጧል። 

በሚያዝያ 30 ቀን 2012 ዓ.ም ፋና ብሮድካስቲንግ ኮርፖሬት እንደዘገበው በኢትዮጵያ እና በTOPPAN GRAVITY መካከል የተደረገው ስምምነት ደህንነታቸው የተጠበቀ ሰነዶችን በማዘጋጀት ላይ ያተኮረ ሲሆን ከእነዚህም መካከል ፓስፖርት፡  ለዜጐች ደህንነቱ የተጠበቀ የጉዞ አገልግሎት መስጠት ለማስቻል ፤ የብሔራዊ መታወቂያ ካርዶች፡ የማንነት ማረጋገጫ እና የደህንነት እርምጃዎችን ለማሳደግ ፤ ኤቲኤም ካርዶች፡ ደህንነቱ የተጠበቀ የፋይናንስ አገልግሎት ተደራሽነት ለማረጋገጥ ፤ ማስተር ካርድ ምርቶች፡ ደህንነቱ የተጠበቀ እና አስተማማኝ የክፍያ ግብይቶችን ለማስቻል ሲሆን እነዚህ ሰነዶች በውስጣቸው ማይክሮ ቺፖችን በማካተት ደህንነታቸውን እና ትክክለኛነትን የበለጠ እንዲያሳድጉ ተደርገው የሚመረቱ ይሆናል።

ከፋና ዘገባ በተጨማሪ TOPPAN GRAVITY በድህረ-ገጹ ስለ ስምምነቱ እንደገለፀው “በኢትዮጵያ የሚገነባው የህትመት ፋብሪካ እንደ መጀመሪያ እርምጃ የቶፓን ግሩፕ ቴክኖሎጂዎችን በመጠቀም በኢትዮጵያ የተሟላ አቅርቦት አቅም ለመፍጠር አቅዷል። ለወደፊቱ ለኢትዮጵያ ጎረቤት ሀገሮች መታወቂያ እና ፓስፖርት በማምረት በአፍሪካ ገበያ መፍትሄዎችን ይዞ የመምጣት ትልቅ ሃሳብ እንዳለውም ጠቁሟል። የኢትዮጵያ መንግስት በበኩሉ የፓስፖርት እና የመታወቂያ ደንቦችን በማውጣት ከአካባቢው ፍላጎቶች ጋር የተጣጣመ የአሰራር ዲዛይን የማረጋገጥ ስራ ይሰራል።”

በተጨማሪም የኢትዮጵያ ብሔራዊ ባንክ ገዥ አቶ ማሞ ምህረቱ ስምምነቱ የኢትዮጵያን ገንዘብ ማተምን እንደማይጨምር ለሀቅቼክ አረጋግጠዋል።

ኢትዮጵያ በዘመናት ውስጥ የመገበያያ ገንዘብ ለውጥ ስታደርግ ከተለያዩ የገንዘብ ማተሚያ ድርጅቶች ጋር ስምምነቶችን ተፈራርማለች። ኢትዮጵያ ለብዙ ዓመታት የገንዘብ ኖት ላይ  የተለያዩ ለውጦችን ብታደርግም፣ ስለ ገንዘብ ህትመት ይህን ያህል ሰፊ መረጃ ማግኘት ቀላል አይደለም።

ኢትዮጵያ በቅርቡ ካደረገችው የገንዘብ ኖት ቅያሪ ባለፈ በታሪክ ባለፉት ዓመታት በርካታ ግዜ የገንዘብ ኖት ለውጦችን አድርጋለች።

የኢትዮጵያ ዘመናዊነት ጉዞ በ1895 ዓ.ም ሲጀምር ፣ 200,000 ዶላር ዋጋ ያለው አዲስ የመገበያያ ገንዘብ ሥርዓት በ1886 ዓ.ም  በፓሪስ ሚንት ለዳግማዊ አፄ ምኒልክ እንደተመረተ መረጃዎች ያሳያሉ።

በኢትዮጵያ የቅርብ ጊዜ ታሪክ የመጀመሪያዎቹ የባንክ ኖቶች ወይም የወረቀት ገንዘቦች በ1907 ዓ.ም በአቢሲኒያ ባንክ ነበር የተዋወቁት ፣ ይህም ሳንቲሞችን እንደ መገበያያ ከመጠቀም ባሻገር የተደረገ ለውጥ ነው ። የአቢሲኒያ ባንክ በ5፣ 10 ፣ 100 እና 500 ዋጋ የመጀመሪያዎቹን የባንክ ኖቶችን አስተዋቆ ነበር።

በህዳር ወር 1990 ዓ.ም በሃገሪቱ ስልጣን ላይ የነበረው የኢህአዴግ መንግስት በደርግ ዘመን የነበረው ገንዘብ ላይ ጥቃቅን ለውጦችን እና የቀለም ማሻሻያዎችን አድርጎ ነበር። ከዚህ በተጨረማሪ የከፍተኛ ደረጃ ኖቶች በተለይም የ50 እና 100 ብር ሂሳቦች ላይ የተሻሻሉ የደህንነት ማረጋገጫዎች እና የተለየ ዲዛይንን አካቷዋል።

በመስከረም 4 ቀን 2013 ዓ.ም የኢትዮጵያ ብሄራዊ ባንክ የተሻሻሉ የደህንነት ባህሪያትን እና ሌሎች ልዩ ክፍሎችን የያዘ አዳዲስ የገንዘብ ኖቶች አስተዋውቋል። አዲስ የተዋወቁት የገንዘብ ኖቶች ላይ ከ10 ፣ 50 እና 100 ቢል ኖቶች በተጨማሪ የ200 ብር ኖቶች እንዲቀርቡ ተደርገዋል። 

ምስል

ብሔራዊ ባንክ በግንቦት ወር 2000 ዓ.ም ዓለም አቀፍ የገንዘብ ማተሚያ ድርጅቶችን በመጋበዝ ከ1.1 ቢሊዮን የኢትዮጵያ ብር በላይ ለማምረት ጨረታ አቅርቧል።

በ2001 ዓ.ም የኢትዮጵያ ብሔራዊ ባንክ ለሁለት ዓለም አቀፍ የገንዘብ ማተሚያ ኩባንያዎች – ጂሴኬ እና ዴቭሪየንት ጂም ኤች (ጀርመን) እና ደላሩ (ዩኬ) – የተለያዩ የኢትዮጵያ ብር ኅትመቶችን ለማተም የብዙ ሚሊዮን ዶላር ውል ሰጥቶ እንደነበር መረጃዎች ያሳያሉ። 

ሐምሌ 24, 2005 ዓ.ም በሚዲያዎች የኢትዮጵያ ብሄራዊ ባንክ በሱዳን የብር ኖቶችን ለማሳተም እያሰበ እንደሆነ ዘገባዎች ወጥተው የነበረ ሲሆን የባለሙያዎች ቡድንም ወደ ሱዳን በመጓዝ በ1986 የተቋቋመውን የሱዳን ገንዘብ ማተሚያ (ኤስ.ፒ.ፒ.) የተባለውን የግል ድርጅት ጎበኝተዋል። በሪፖርቱ መሠረት የብርሃንና ሰላም ማተሚያ ድርጅት ባለሙያዎች ወደ ሱዳን ሄደው ኤስ.ፒ.ፒ. ማሽኖች እና የኩባንያውን አቅም እንደገመገሙ መረጃዎች ያሳያሉ።

ታህሳስ ወር, 2007ዓ.ም አዲስ ፎርቹን የተባለው ጋዜጣ የኢትዮጵያ ብሔራዊ ባንክ በአገር ውስጥ ጥሬ ገንዘብ እና በተጨማሪም የተለያዩ የደኅንነት ሰነዶችን ለማተም የሚያስችለውን ማተሚያ ፋብሪካ የማቋቋም ሂደት ላይ እንደሆነ አሳውቆ ነበር።

ነገር ግን ዶቼ ቬለ መጋቢት 5 ቀን, 2014 ዓ.ም ባወጣው ፅሁፍ መሰረት ኢትዮጵያ ገንዘቧን እንድትታትም ከብሪታኒያ ግዙፉ የብር ኖት ማተሚያ ዴላሩ ጋር ስምምነት እንዳደረግች ገልፆ ነበር።

ምስል

ግንቦት 21 ቀን ,2016 ዓ.ም በወጣው ሌላ ዘገባ ኢትዮጵያ እና ሌሎች በርካታ የአፍሪካ ሃገራት ገንዘባቸውን በአውሮፓ እና በሰሜን አሜሪካ እንደሚያሳትሙ ተገልጿል። ከዚህ ዘገባ በተጨማሪም ኢትዮጵያ የመገበያያ ገንዘቧን ዴላሩ በተባለ የእንግሊዝ አታሚ እንደምታሳትም የሚገልፁ መረጃዎች ይገኛሉ።

በኢትዮጵያ ምንዛሪ ህትመት ላይ የተለያዩ ሃሳቦች ቢነሱም እስካሁን ከመንግስትም ሆነ ከብሄራዊ ባንክ የተገኘ ይፋዊ መረጃ የለም። ነገር ግን አሁን ላይ ኢትዮጵያ ‘ገንዘብ ማተሚያ ማዕከል’ ልትገነባ ነው እየተባለ የሚናፈሰው ወሬ ሃሰተኛ ሲሆን በኢትዮጵያ እና በ TOPPAN GRAVITY መካከል የተደረገው ስምምነት የገንዘብ ህትመትን አይጨምርም።

የቪዲዮው አሳሳች መልዕክት የስምምነቱን ወሰን ካለመረዳት የመነጨ ሊሆን ቢችልም መረጃዎችን ከማሰራጨት በፊት ታማኝ ከሆኑ ምንጮች ማረጋገጥ አስፈላጊ ነው።  ከፍተኛ የደህንነት ሰነዶች ላይ የተደረገውን ስምምነት ብር ለማተም በማለት በተሳሳተ መንገድ ተተርጉሟል።

ኢትዮጵያ ከTOPPAN ግራቪቲ ጋር ገንዘብ ለማተም ስምምነት ተፈራረመች የሚለው ቪዲዮ ሀሰት ነው። 

ሀሰት፡ ይህ ቪድዮ በጎፋ ዞን የደረሰውን የመሬት መንሸራተት አደጋ አያሳይም

በሐምሌ ወር 2016 ዓ.ም በጎፋ ዞን, ኢትዮጵያ የደረሰውን ከባድ የመሬት መንሸራተት ያሳያል በሚል የመግለጫ ፅሁፍ የተጋራ አንድ የቲክቶክ ቪዲዮ ከመቶ ሺህ ጊዜ በላይ ሲጋራ ከሶስት ሚሊዮን በላይ እይታዎችን ማግኘት ችሏል።

በሐምሌ ወር ቲክቶክ ላይ የተጋራው ቪዲዮው የሚያሳየው የመሬት መንሸራተት ሲሆን ፍርስራሾች ፣ ዛፎች እና አቧራ እንደጎርፍ ሲወርድ የሚያሳይ ነው። ከዚህ በተጨማሪ ይህ ቪድዮ ከሰሞኑ በኢትዮጵያ ደቡብ ክልል ጎፋ ዞን ውስጥ የተከሰተ እንደሆነ እና በአደጋው የሞቱ ሰዎች ቁጥር 300 እንደደረሰ ይገልፃል።

እንደ ቢቢሲ እና ሌሎች የዜና ምንጮች እንደዘገቡት ፤ በጎፋ ዞን ገዜ ጎፋ ወረዳ ኬንቾ ሻቻ ጎዝዲ ቀበሌ እሁድ ሐምሌ 14 ቀን 2016 ዓ.ም አመሻሽ እና ሰኞ ሐምሌ 15 ቀን 2016 ዓ.ም ማለዳ ላይ የመሬት መንሸራተት ተከስቷል።

ቪዲዮ

አልጄዚራ በመቶዎች የሚቆጠሩ ሰዎች በቦታው ተሰብስበው እና ሌሎች ከሥሩ በአደጋው ወቅት ፍራሹ የተጫነባቸውን ሰዎች ፍለጋ አፈር ውስጥ ሲቆፍሩ የሚያሳይ ቪዲዮም አጋርቷል።

እሁድ እለት የጣለው ከባድ ዝናብ የመሬት መንሸራተትን ሲያስከትል በአቅራቢያው ካሉ መንደሮች የመጡ የፖሊስ መኮንኖች፣ መምህራን እና ነዋሪዎች በሰኞ ዕለት ነፍስ የማዳን እና የሞቱ ሰዎችን አስከሬኖች የማውጣት ስራዎችን እያከናወኑ በነበሩበት ወቅት ሁለተኛ የመሬት መንሸራተት ተከስቷል።

እንደተባበሩት መንግስታት ድርጅት የሰብአዊ ጉዳዮች ማስተባበሪያ ቢሮ (UNOCHA) መረጃ ከሆነ በመሬት መንሸራተት አደጋው የሟቾች ቁጥር ወደ 257 ከፍ እንዳለ እና ቁፋሮው ሲጠናቀቅ ቁጥሩ እስከ 500 ሊደርስ ይችላል የሚል ግምትን አስቀምጧል። ከሟቾች በተጨማሪም በአደጋው ከ15,500 በላይ ሰዎች የተጎዱ ሲሆን ከነዚህም መካከል ቢያንስ 1,320 ከአምስት አመት በታች የሆኑ ህጻናት እና 5,293 ነፍሰ ጡር እና የሚያጠቡ እናቶች ይገኙበታል።

ሀቅቼክ በቲክቶክ ላይ የተሰራጨውን ይህን ቪድዮ በቅርበት ሲመረመር መግለጫው እንደሚያትተው በኢትዮጵያ ፣ ጎፋ ዞን የተከሰተውን ሳይሆን በፈረንጆቹ 2022 በህንድ, ሜጋላያ ግዛት የተከሰተውን የመሬት መንሸራተት አደጋ የሚያሳይ ነው።

ቪዲዮ

CNN-News18 የተሰኘው የህንድ ሚድያ እንደዘገበው ከሆነ በሰሜን ምስራቅ ህንድ ሜግሃልያ ግዛት የመሬት መንሸራተት አደጋ በሰኔ 21 ቀን 2014 ዓ.ም ተከስቶ ነበር። ይህ የዜና ተቋምም ይህን ክስተት የሚያሳይ ቪድዮ ብማህበራዊ ገፁ ላይ አጋርቶ ነበር።

ምንም እንኳን ቪዲዮው በተፈጠረው መሬት መንሽራተት አደጋ ክስተት ላይ መሰረት አድርጎ ቢሰራጭም ሀቅቼክ ይህ ቪድዮ በሀገራችን የተከሰተውን ሁኔታ ስለማያሳይ ሀሰት ብሎታል።

ይህ ቪዲዮ በትግራይ የተከሰተ ረሃብ ያሳያል?

ህዳር 18 2016 አንድ የፌስቡክ ገጽ በትግራይ የተራበ ጨቅላ ህጻን ነው በማለት ይህንን ቪድዮ አጋርቷል። ይህ ጽሁፍ እስከታተመበት ጊዜ ድረስ ቪዲዮው ወደ 8,000 የሚጠጋ እይታን ያገኘ ሲሆን ከ121 ጊዜ በላይም ተጋርቷል።

ከዚሁ ቪዲዮ ጋር ተመሳሳይ የሆኑ ልጥፍች በሌሎች የፌስቡክ ገጾች ላይም ተጋርተዋል። ተመሳሳይ ቪዲዮ በሌላ የፌስቡክ ገጽ ላይ ወደ 5,000 የሚጠጋ እይታን ያገኘ ሲሆን ከ80 ጊዜ በላይም ተጋርቷል።

በኢትዮጵያ ትግራይ ክልል ከፍተኛ ድርቅ እና የረሃብ ቀውስ መከሰቱን መረጃዎች ያመለክታሉ። በአበርገለ ወረዳ ብቻ ከ19,000 ሄክታር ሰብል 17,000 ሄክታር ሰብል ለድርቅ መጋለጡን የትግራይ ክልል ግዝያዊ መንግስት አስታውቋል።

የአሜሪካ ዓለም አቀፍ ልማት ኤጀንሲ (ዩ ኤስ ኤድ) እና የተባበሩት መንግስታት የአለም የምግብ ፕሮግራም (ዳብልዩ ኤፍ ፒ) በመንግስት ባለስልጣናት የእርዳታ ስርቆትን ክስ በመጥቀስ ዕርዳታውን አቁሟል።

በህዳር 3፣ 2016 ዩናይትድ ስቴትስ ዓለም አቀፍ ልማት ኤጀንሲ (USAID) ከስድስት ወራት እገዳ በኋላ በኢትዮጵያ የምግብ ዕርዳታ ስርጭትን በታህሳስ ወር እንደሚቀጥል አስታውቋል።

በ2016 ጥቅምት 20 የወጣው የኦቻ ዘገባ ከ5 ሚሊዮን በላይ ሰዎች በአማራ እና በትግራይ ክልል በድርቅ መሰል ሁኔታዎች ተጎጂ ሆነዋል ብሏል።

በተጨማሪም የትግራይ ክልል አስተዳደር በወጀራትና አጽቢ ወረዳ ድርቅና ረሃብ መከሰቱን ገልጿል።

ከሰሞኑ በትግራይ ክልላዊ መንግስት አበርገሌ ወረዳ ከፍተኛ ረሃብ እንዳለ በማህበራዊ ድረ-ገጾች ላይ አየተጋራ ቆይቷል።

በተጨማሪ እነዚህ ልጥፎች በትግራይ ክልል ለሚኖሩ ሰዎች የገንዘብ ማሰባሰብያ የማህበራዊ ሚዲያ ዘመቻዎችን ጀምረዋል።

በረሃብ የገንዘብ ማሰባሰብያ ዘመቻ መካከል አንድ የተራበ ጨቅላ ሕፃንን የሚያሳይ ቪዲዮ በማህበራዊ ሚዲያ በሰፊው ሲጋራ ነበር።

ነገር ግን ትክክለኛው ቪዲዮ ከሶስት ሳምንት በፊት ማለትም ህዳር 2፣ 2016 በቲክቶክ ላይ ተጋርቶ ተገኝቷል። 

የተጋራው ቪዲዮ በመጀመሪያ ካቶ ኒኮደም በተባለ የቲክ ቶክ አካውንት ላይ ተጋርቶ ተገኝቷል። ይህ የቲክ ቶክ አክውንት 1.8 ሚሊዮን ተከታዮች ሲኖሩት 34.5 ሚሊዮን የሚሆን ግብረመልስን አጊንቷል።

ይህ ኒኮደም የተባለ ግለሰብ በዩጋንዳ ወላጅ አልባ ህጻናትን የሚረዳ ለትርፍ ያልተቋቋመ ድርጅት መሪ እንደሆነ ይገልጻል። ለዚህ ሃሰተኛ መረጃ ጥቅም ላይ የዋለውን ቪዲዮ ጨምሮ ሌሎችም በዚህ ግለሰብ የቲክቶክ አካውንት ላይ እንክብካቤ እያገኙ ያሉ ሕፃናትን የሚያሳዩ ተመሳሳይ ቪዲዮዎችን በተደጋጋሚ ይጋራሉ።

ይህንኑ ህጻን ልጅ የሚያሳዩ ሌሎች ቪዲዮዎች እንዲሁ በዚሁ የቲክቶክ አካውንት ላይ ተጋርተዋል።

ኒኮደም በ ጎፈንድሚ ላይ ባወጣው የገቢ ማሰባሰቢያ ልጥፍ ላይ “ሴቭ አፍሪካን ቻይልድ 254 ሚኒስትሪ (Save African Child 254 Ministry)” የተባለ በኡጋንዳ ወላጅ አልባ ሕፃናትን የሚረዳ ድርጅት እና “ኪንደር ሂልፈዘንትረም (Kinderhilfezentrum)” የተባለ ሌላ ግበረ-ሰናይ ድርጅት መስራች እንደሆነ ገልጿል።

በተጨማሪም “ኒኮላስ ሰቡፉ” ትክክለኛ ስሙ እንደሆነ እና “ካቶ ኒቆዲም” ቅፅል ስሙ መሆኑን ገልጿል።

በትግራይ ክልል ድርቅና የረሃብ ችግር መከሰቱን ዘገባዎች ቢያመለክቱም ይህ ቪዲዮ ግን በትግራይ የተራበ ሕፃንን የሚያሳይ አይደለም። 

ስለዚህም ሀቅቼክ ይህን የፌስቡክ ፖስት ትክክል ያልሆነ ቪዲዮ በመጠቀሙ ሀሰት ብሎታል።

Exit mobile version