ቪዲዮው ዳግም በተቀሰቀሰው ጦርነት የተማረኩ የመከላከያ ሰራዊት አባላትን ያሳያል?

ከ 7 ሺ በላይ ተከታይ ያለው የትዊተር አካውንት መስከረም 3 ቀን 2015 ዓ.ም በስፋት ሲዘዋወር የነበረ አንድ ቪዲዮ አጋርቷል። ተንቀሳቃሽ ምስሉ ዳግም በተቀሰቀሰው ጦርነት ኢትዮጵያውያን የጦር እስረኞች ለሕዝባዊ ወያኔ ሓርነት ትግራይ (ህወሓት) ኃይሎች እጃቸውን ሲሰጡ እንደሚያሳይ በፅሁፍ መግለጫው ይናገራል።

ይህ ፅሁፍ ለንባብ እስከበቃበት ጊዜ ድረስ ይህ ቪዲዮ ከስድስት መቶ ጊዜ በላይ የተጋራ ሲሆን በትዊተር ላይ ብቻ ከ63 ሺህ በላይ ሰዎች ተመልክተውታል።

ይሁን እንጂ ቪዲዮው የቆየ እና በቅርቡ በቀጠለው ጦርነት በህወሓት ሃይሎች የተያዙ የመከላከያ ሰራዊት አባላትን እንደማያሳይ ማረጋገጥ ተችሏል።

መጋቢት 15 ቀን 2014 ዓ.ም በኢትዮጵያ መንግስት እና በህወሓት ሃይሎች መካከል ለሰብአዊ እርዳታ የተኩስ አቁም ስምምነት ተደርጎ የነበረ ቢሆንም ነሀሴ 18 ቀን 2014 ዓ.ም በሁለቱ ሀይሎች መካከል ዳግም ግጭት አገርሽቷል።

ነሀሴ 10 ቀን 2014 ዓ.ም ሕወሓት በመጋቢት ወር መጨረሻ በጋራ የታወጀውን ጦርነት ማቆም ቀድሞ የፌደራል መንግስት እንደጣሰ በመግለጽ የፌደራል መንግስት ሃይሎች በመድፍና በታንክ በመታገዝ ጥቃት መሰንዘራቸውን ተናግሯል።

ሕወሃት በበኩሉ በአሁኑ ወቅት በህወሓት ሃይሎች ተይዘው ወደሚገኙ ግዛቶች ለመዝመት የሞከሩ የኢትዮጵያ መከላከያ ሰራዊት እና የኤርትራ ጦር ክፍሎችን እንደደመሰሰ መስከረም 3 ቀን 2015 ዓ.ም ገልጿል።

ይህን ሁኔታ ታሳቢ በማድረግ የተማረኩ የጦር ምርኮኞችን እንደሚያሳይ በመግለጽ ቪዲዮው እንደገና በማህበራዊ ትስስር ገጾች ሊጋራ ችሏል።

ይህ ተንቀሳቃሽ ምስል ከዚህ ቀደም ግንቦት 11 ቀን 2014 ዓ.ም በአሜሪካ ድምጽ አማርኛ የፌስቡክ ገጽ ላይ “የትግራይ ክልል መንግሥት የጦር ምርኮኞች እንዲለቀቁ መወሰኑን አስታወቀ” በሚል ዜና ስር የተጋራ መሆኑን ሀቅቼክ አረጋግጧል። 

ስለሆነም ሀቅቼክ የትዊተር ፖስቱ መረጃውን እንዲደግፍለት የተጠቀመውን ቪዲዮ የቆየና ከተገለፀው ሁነት ጋር ተያያዥነት የሌለው በመሆኑ ሀሰት ብሎታል።

ሀሰት፡ ምስሉ በቅርቡ ኦሉሴጉን ኦባሳንጆ ከመራራ ጉዲና ጋር መገናኘታቸውን አያሳይም

ከ25ሺ በላይ ተከታይ ያለው የትዊተር አካውንት ግንቦት 25 ቀን 2014 ዓ.ም ላይ “ኦባሳንጆ ከታላቁ የፖለቲካ ልሂቅ ፕርፌሰር መራራ ጉዲና ጋርም ስለ ሰላም መክረዋል!” በሚል የፅሁፍ መግለጫ አንድ ምስል አጋርቶ ነበር።

ይህ ፅሁፍ ለንባብ እስከበቃበት ጊዜ ድረስ የትዊተር ፖስቱ ከ150 በላይ ግብረ መልሶችን ሲያገኝ ከ35 ጊዜ በላይ ሪትዊት ተደርጓል።

ይሁን እንጂ ሀቅቼክ ምስሉን መርምሮ ሀሰት ብሎታል።

በህወሓት እና በፌደራል መንግስት መካከል የተቀሰቀሰው ጦርነት እስካሁን ድረስ ያልተፈታ ችግር ሆኗል። 

ከጥቂት ወራት በፊት ለሰብዓዊ እርዳታ አቅርቦት በሚል በፌደራሉ መንግስት የቀረበው የተኩስ አቁም ስምምነት በህወሓት ዘንድ ተቀባይነትን አግኝቶ የነበረ ሲሆን ይህ ስምምነት ለሰላም ንግግር እና ግጭቱን ለማቆም ትልቅ ዕድል እንደሚፈጥር ተገምቶ ነበር። 

የቀድሞ የናይጄሪያ ፕሬዝዳንት የነበሩት ኦሉሴጉን ኦባሳንጆ ነሀሴ 20 ቀን 2013 ዓ.ም የምስራቅ አፍሪካ ከፍተኛ ተወካይ ሆነው መሾማቸውን የአፍሪካ ህብረት ሊቀ መንበር የሆኑት ሙሳ ፋኪ አሳውቀዋል። የምስራቅ አፍሪካ ከፍተኛ ተወካዩም በቀጠናው ዘላቂ ሰላም እና መረጋጋት ለማምጣት የሚሰሩ ይሆናል።

ኦሉሴጉን ኦባሳንጆ ከመንግስት ሀላፊዎችና ከህወሓት አመራሮች ጋር ሰላማዊ መፍትሄ ለማምጣት በተደጋጋሚ ተገናኝተዋል። በጦርነት ውስጥ የሚገኙት ሁለቱም አካላት ጦርነት እንዲያቆሙና ወደ ድርድር እንዲመጡ ሀላፊነት ወስደው እየሰሩ ይገኛሉ። 

ግንቦት 23 ቀን 2014 ዓ.ም በአፍሪካ ቀንድ የአፍሪካ ኅብረት ልዩ መልዕክተኛ ኦሉሴጉን ኦባሳንጆ ከህወሓት ሊቀመንበር ደብረፅዮን ገብረሚካኤል ጋር በመቀሌ ከተማ ተገኝተው ተነጋግረዋል። ከሁለት ቀናት በኋላም ለስራ ጉብኝት ከጠ/ሚ ዐቢይ አሕመድ ጋር ባሌ ሮቤ ተገኝተው ጉብኝት አድርገዋል። 

የትዊተር ፖስቱም ይህን አውድ ታሳቢ በማድረግ የተጋራ ነበር። 

ይሁን እንጂ ሀቅቼክ የፌስቡክ ገፁ የተጠቀመውን ምስል ትክክለኛነት ለማጣራት ባደረገው ምርመራ ምስሉ ከዚህ ቀደም የነበረና የቆየ  ሆኖ ያገኘው ሲሆን “የአፍሪካ ህብረት ምርጫ ታዛቢ ቡድን የበላይ ኦሉሴጉን ኦባሳንጆ ከኦሮሞ ፌዴራሊስት ኮንግረስ (ኦፌኮ) ሊቀ መንበር ዶ/ር መራራ ጋር ተገናኝተዋል።”በሚል በአፍሪካ ህብረት ይፋዊ ድረ ገጽ ላይ በሰኔ 14 ቀን 2013 ዓ.ም ተጋርቶ አግኝቶታል። 

ስለዚህ ሀቅቼክ የቲዉተር ገፁ የተጠቀመውን ምስል መርምሮ ሀሰት ብሎታል።

ሀሰት: ምስሉ ደምቢዶሎ ዩኒቨርስቲን አያሳይም

ከ500 ሺህ በላይ ተከታይ ያለው የፌስቡክ ገፅ ሚያዚያ 28 ቀን፣ “የኦሮሞ ነፃነት ሰራዊት ደምቢ ዶሎን መቆጣጠሩን ገለፀ” የሚል የፅሁፍ መግለጫ ያለው አንድ ምስል አጋርቶ ነበር። መረጃውንም ለመደገፍ ከተቀመጡ ሦስት ምስሎች መሀል በአንደኛው ላይ “ደምቢዶሎ ዩኒቨርሲቲ” በሚል በቀይ ቀለም ተፅፎበታል።

ይህ ፅሁፍ ለንባብ እስከበቃበት ጊዜ ድረስ ይህ የፌስቡክ ፖስት ከ3ሺ በላይ ግብረ መልስ ሲያገኝ ከ 950 ጊዜ በላይ ተጋርቷል።

ቢሆንም ሀቅቼክ በቀይ ቀለም “ደምቢ ዶሎ ዩኒቨርሲቲ” ተብሎ የተፃፈበትን ምስል ለማጣራት ባደረገው ምርመራ ምስሉ ደምቢዶሎ ዩንቨርሲቲን እንደማያሳይ አረጋግጧል።

ይህም በመሆኑ ሀቅቼክ የፌስቡክ ፖስቱ መረጃውን ለመደገፍ የተጠቀመውን ምስል ትክክለኛነት አጣርቶ ሀሰት ብሎታል።

የኦሮሞ ነፃ አውጪ ሰራዊት፣ የኦሮሞ ነፃ አውጪ ግንባር (ኦነግ) ወታደራዊ ክንፍ የነበረ ሲሆን ሚያዚያ 23 ፣ 2013 ዓ.ም ለሁለት ተከፍሏል። በኢትዮጲያ መንግስት “ኦነግ ሸኔ” እየተባለ የሚጠራው የኦሮሞ ነፃ አውጪ ሰራዊት በፓርላማ በአሸባሪነት ተፈርጇል።

የኦሮሞ ነፃ አውጪ ሰራዊት ከመንግስት ጋር በጦርነት ላይ ከሚገኘው ሕወሃት ጋር ጥምረት መፍጠሩን በነሀሴ 2012 አሳውቋል። 

የመንግስት ኮምኒኬሽን አገልግሎት ሚኒስትር አቶ ለገሰ ቱሉ መጋቢት 24 ቀን 2014 ዓ.ም የኦሮሚያ ክልልና የፌደራል የፀጥታ ኃይሎች በተቀናጀና ህብረተሰቡን ባሳተፈ መልኩ በኦነግ ሸኔ ላይ እርምጃ እየወሰዱ እንደሚገኙ ገልፀዋል።

በተጨማሪም መንግስት በምዕራብ ወለጋ በሚገኙት በነቀምት፣ በደምቢዶሎ እና በሌሎችም አከባቢዎች በኦነግ ሸኔ ላይ ጥቃት እየፈፀመ እንደሚገኝ የኮምኒኬሽን ሚኒስትሩ ገልፀዋል። 

ይህ የፌስቡክ ፖስትም ይህን ሁኔታ እና ወቅት በመጠቀም መረጃውን እንዲደግፍለት የኦሮሞ ነፃ አውጪ ሰራዊት በምዕራብ ወለጋ የሚገኘውን ደምቢዶሎ ከተማን መቆጣጠሩን ለማሳየት “ደምቢዶሎ ዩኒቨርስቲ” የሚል በምስል ላይ የተፃፈ ፅሁፍ አጋርቷል።

ይሁን እንጂ ሀቅቼክ የፌስቡክ ገፁ የተጠቀመውን ምስል ትክክለኛነት ለማጣራት ባደረገው ምርመራ የዩኒቨርሲቲ መግቢያ በር የሚያሳየውን ምስል ከዚህ ቀደም ታህሳስ 12 ቀን 2010 ዓ.ም ላይ በቢቢሲ አማርኛ ዜና ‘በወለጋ ዩኒቨርሲቲ ሁለት ተማሪዎች ሞቱ’ በሚል ተጋርቶ አግኝቶታል። 

ስለዚህ ሀቅቼክ የፌስቡክ ገፁ የተጠቀመውን ምስል መርምሮ ሀሰት ብሎታል።

ሀሰት: ምስሉ በቅርቡ በህገወጥ የመሬት ወረራ ተወስዶ ለእርሻ ስራ የዋለ ቦታን አያሳይም

ከ 2 ሚሊዮን በላይ ተከታይ ያለው የፌስቡክ ገፅ መጋቢት 26 ቀን፣ “በህገወጥ የሚወረረው ቦታ እያለቀ ሲመጣ በለሚ ኩራ ክፍለ ከተማ የወጣቶች ማዘውተርያ የሆኑ ሜዳዎችን ለገበሬ በሚል ሰበብ ለልዩ ጥቅመኞች እየታደለ ነው። ይሄ ሀያት አካባቢ ልጆች ሲጫወቱበት የነበረ ሜዳ ነው በንጋታው ሲመጡ ታርሶ ጠብቋቸዋል” የሚል የፅሁፍ መግለጫ ያለው አንድ ምስል አጋርቶ ነበር።  

ይህ ፅሁፍ ለንባብ እስከበቃበት ጊዜ ድረስ ይህ የፌስቡክ ፖስት ከ1500 በላይ ግብረ መልስ ሲያገኝ ከ 156 ጊዜ በላይ ተጋርቷል።

ነገር ግን የፌስቡክ ፖስቱ ፅሁፉን ለመደገፍ የተጠቀመውን ምስል ትክክለኛነት አጣርቶ ሀሰት ሀቅቼክ ብሎታል።    

የቅርብ መረጃዎች በአዲስ አበባ ከተማ መጠነ ሰፊ ህገወጥ የመሬት ወረራ እንዳለ የጠቆሙ ሲሆን፤ በቃሊቲ ፣ በለሚ ኩራ፣ በቦሌ እና በንፋስ ስልክ ክፍለ ከተሞች ላይ በስፋት መስተዋሉንም ገልፀዋል።

በአንድ ተቃዋሚ ፓርቲ በጉዳዩ ላይ የሰራው ጥናት ግኝቶች መሰረት የመሬት ወረራው ግንባር ቀደም ተሳታፊዎች “ቦታዎቹ ከዚህ ቀደም የቤተሰቦቻችን መሬቶች በመሆናቸው በቂ ካሳ ሳይከፈለን ከቦታችን ተነስተናል” የሚሉ ግለሰቦች እና ወረራ በተፈፀመባቸው ቦታዎች አካባቢ የሚገኙ የክፍለ ከተማና የወረዳ ኃላፊዎችና ፈፃሚዎች አንደሆኑ በመጥቀስ ፣ “ጉዳዩን በማፋጠን ሕገ-ወጥ ደላላዎችም ተሳታፊዎች ነበሩ” ብሏል።

በፌስቡክ ገፁ የቀረበው መረጃም ይህን ሁኔታ መሰረት አድርጎ የቀረበ ነው። 

ሀቅቼክ የምስሉን ትክክለኛነት ለማጣራት ጥረት ያደረገ ሲሆን ምስሉ ከዚህ ቀደም ግንቦት 21 ቀን 2011 ዓ.ም “አዲስ አበባ የእግር ኳስ ሜዳዎቿ በ “ባለ ጊዜ ነን” ባዮች ወደ እርሻ ማሳነት እየተቀየሩ ነው” በሚል ርዕስ የወጣ ፅሁፍ አካል ሆኖ አግኝቶታል። 

ሀቅቼክ የፌስቡክ ፖስቱ ፅሁፉን ለመደገፍ የተጠቀመው ምስል የቆየ እና ከመረጃው ጋር ምንም አይነት ግንኙነት የሌለው መሆኑን አረጋግጧል።

ይህም በመሆኑ የፌስቡክ ፖስቱ መረጃውን ለመደገፍ የተጠቀመውን ምስል አጣርቶ ሀቅቼክ ሀሰት ብሎታል።  

Exit mobile version