የኢትዮጵያ ኢኮኖሚ ከጎረቤቶቿ ድምር ይበልጣል?

የኢፌዴሪ ጠቅላይ ሚኒስትር አብይ አህመድ ከአምስት አመት በፊት ከምስራቅ አፍሪካ በምጣኔ ሀብት ሁለተኛ ደረጃ ላይ የነበረችው ኢትዮጵያ  አሁን ከጎረቤቶቿ ሀገራት ኢኮኖሚ ድምር የላቀ ኢኮኖሚ አላት በማለት ተናግረዋል።

ጠቅላይ ሚኒስትሩ እአአ በመጋቢት 2018 ሰፊ ህዝባዊ ተቃውሞን ተከትሎ ወደ ስልጣን ከመጡ በኋላ ብልጽግናን እና ዲሞክራሲን ለማጎልበት ኢኮኖሚያዊ እና ፖለቲካዊ ማሻሻያዎችን ቃል ገብተዋል። በብልጽግና ፓርቲ የሚመራው የኢትዮጵያ መንግስትም ማሻሻያው ሀገሪቱን በከፍተኛ ደረጃ አሻሽሏል ሲል ይገልጻል።

ጠቅላይ ሚኒስትሩ ኢትዮጵያ በትክክለኛው የኢኮኖሚ አቅጣጫ ላይ እንደምትገኝ እና ኢኮኖሚዋም እያደገ መምጣቱን በተደጋጋሚ የተናገሩ ሲሆን  በቅርቡ፣ የኢትዮጵያ አጠቃላይ የሀገር ውስጥ ምርት (ጂዲፒ) ባለፉት አምስት ዓመታት በእጥፍ ጨምሯል ያሉትም ከነዚህ መካከል የሚጠቀስ ነው።

ጠ/ሚ ዶ/ር አብይ አህመድ በቅርቡ ለክረምት ተማሪዎች በአርቴፊሻል ኢንተለጀንስ ኢንስቲትዩት ባደረጉት ንግግር ኢትዮጵያ እያደገች መሆኗን የኢትዮጵያን ኢኮኖሚ ከጎረቤቶቿ ጋር በማነፃፀር ለተማሪዎቹ አብራርተዋል፡፡

ጠ/ሚንስትሩ  እንደተናገሩት፡ የኢትዮጵያ ኢኮኖሚ በአጠቃላይ የሀገር ውስጥ ምርት (ጂዲፒ) ልኬት ከአምስት ዓመታት በፊት ከኬንያ ቀጥሎ በምስራቅ አፍሪካ ሁለተኛው  ነበር። እ.ኤ.አ. በ2018 የኢትዮጵያ አጠቃላይ የሀገር ውስጥ ምርት መጠን 84.4 ቢሊዮን ዶላር ነበር፤ እንዲሁም የኬንያ ማዕከላዊ ባንክ እንደገለጸው፣ የሀገሪቷ አጠቃላይ የሀገር ውስጥ ምርት መጠን  91.2 ቢሊዮን ዶላር ነበር።

ከአምስት ዓመታት በኋላ እአአ በ2022 የኢትዮጵያ አጠቃላይ የሀገር ውስጥ ምርት መጠን 126.8 ቢሊዮን ዶላር ሲደርስ፤ የኬንያ ደግሞ 119.5 ቢሊዮን ዶላር ደርሷል። በዚህም የኢትዮጵያ አጠቃላይ የሀገር ውስጥ ምርት (ጂዲፒ) ከአምስት አመት በኋላ የኬንያን በልጦ ከምስራቅ አፍሪካ አንደኛ ሆኗል።

ሆኖም ጠቅላይ ሚኒስትር አብይ አህመድ የኢትዮጵያ ኢኮኖሚ ከጎረቤቶቿ ድምር እንኳን ይበልጣል ወይም የኢትዮጵያ ጎረቤት ሀገራት ኢኮኖሚ ተደምሮ ከኢትዮጵያ አንሷል በማለት ያስተላለፉት መረጃ ሀሰት ነው።

ኢትዮጵያ በአለም አቀፍ ደረጃ እውቅና ባላቸው ስድስት ሀገራት ማለትም፡ ሶማሊያ፣ ኬንያ፣ ደቡብ ሱዳን፣ ሱዳን፣ ኤርትራ እና ጅቡቲ እና እውቅና ባላገኘችው ሃገር ሶማሊላንድ ትዋሰናለች።

እንደ አለም ባንክ ዘገባ የሱዳን አጠቃላይ የሀገር ውስጥ ምርት እ.ኤ.አ. በ2022 51.7 ቢሊዮን ዶላር ነበር። በዚህም መሰረት የኬንያ እና የሱዳንን የሀገር ውስጥ ምርት (ጂዲፒ) ተደምረው ከኢትዮጵያ (171.2 ቢሊዮን እና 126.8 ቢሊየን ሲነጻጸር) ይበልጣሉ።

የሱዳን፣ የደቡብ ሱዳን፣ የኤርትራ፣ የጅቡቲ፣ የሶማሌላንድ እና የሶማሊያ የቅርብ ጊዜ ኢኮኖሚ መረጃ በየራሳቸው ማዕከላዊ ባንኮች ወይም የስታስቲክስ ኤጀንሲዎች መረጃ ቋት ላይ አይገኝም። ስለዚህ እንደ አይኤምኤፍ ካሉ ሌሎች አለም አቀፍ የፋይናንስ ተቋማት ያወጡትን መረጃ አስደግፈን አቅርበናል።

የአለም አቀፉ የገንዘብ ድርጅት (አይኤምኤፍ) እ.ኤ.አ. በ2022 የበርካታ የአፍሪካ ቀንድ ሀገራት አጠቃላይ የሀገር ውስጥ ምርት (ጂዲፒ)  አሃዞችን የዘገበ ሲሆን እነዚህም  አሃዞች እንደሚከተለው ናቸው፡- የኢትዮጵያ አጠቃላይ የሀገር ውስጥ ምርት 120.37 ቢሊዮን ዶላር፣ የኬንያ 113.7 ቢሊዮን ዶላር፣ የሱዳን 33.75 ቢሊዮን ዶላር፣ የሶማሊያ 10.42 ቢሊዮን ዶላር፣ የደቡብ ሱዳን 8.54 ቢሊዮን ዶላር፣ እንዲሁም የጅቡቲ 3.66 ቢሊዮን ዶላር ደርሷል።  ይህ የአይኤምኤፍ መረጃ ግን ስለ ኤርትራ እና ሶማሌላንድ ለተጠቀሰው አመት መረጃን እንደማያጠቃልል ልብ ሊባል ይገባል።

ስለዚህ በ2022 የአምስቱ የኢትዮጵያ ጎረቤት ሀገራት (ኤርትራ እና ሶማሌላንድን ሳይጨምር) አጠቃላይ  ጠቅላላ የሀገር ውስጥ ምርት መጠን 170 ቢሊዮን ዶላር ሲሆን ይህም ከኢትዮጵያ ጠቅላላ የሀገር ውስጥ ምርት መጠን  120.37 ቢሊዮን ዶላር የሚበልጥ ነው።

ይህም ሲጠቃለል ኢትዮጵያ በምስራቅ አፍሪካ ትልቁ ጠቅላላ የሀገር ውስጥ ምርት (ጂዲፒ) ያላት ቢሆንም፣ ጠቅላይ ሚኒስትር አብይ አህመድ  የኢትዮጵያ ኢኮኖሚ ከጎረቤቶቿ ድምር የበለጠ ነው ማለታቸው እ.ኤ.አ. በ2022 የኢኮኖሚ መረጃን መሰረት በማድረግ ሀሰት ሆኖ ተገኝቷል።

ሀሰት፡ ይህ ምስል በደመራ ዕለት ከወላጆቿ ተነጥቃ የታገተች ልጅን አያሳይም

ከደመራ በዓል ጋር ተያይዞ ይህች ህጻን አረንጓዴ ቢጫ እና ቀይ ጥለት ያለው ቀሚስ ለብሳለች በሚል ከወላጆቿ ተነጥቃ በፌደራል ፖሊሶች ለ 10 ሰአታት ታግታለች በሚል የፅሁፍ መግለጫ አንድ የፌስቡክ አካውንት ይህንን ምስል አጋርቶት ነበር። ምስሉም በማህበራዊ ሚዲያ ላይ በሰፊው መሰራጨት ችሎ ነበር። 

ይሁን እንጂ ሀቅቼክ ምስሉ የቆየና እና ከዚህ በፊት የተጋራ መሆኑን አረጋግጧል። ምስሉም  በደመራ በዓል ላይ አረንጓዴ ቢጫ እና ቀይ ጥለት ያለው ቀሚስ ለብሳ በመገኘቷ ከወላጆቿ የተነጠቀች ልጅን አያሳይም፡፡ 

እንደ ጎርጎሮስያውያኑ አቆጣጠር በ1995 የወጣው የኢፌዲሪ ህገ መንግስት የኢትዮጵያ ሰንደቅ አላማ ሶስት አግድም ሰንሰለቶች አረንጓዴ ፣ ቢጫ እና ቀይ ሲሆኑ በሰማያዊ መደብ ላይ ኮከብ ያረፈበት ነው።

የኢትዮጵያ ሰንደቅ ዓላማ በተለይ በኮከብ አርማ አጠቃቀም  የግጭት፣ የአለመግባባትና የክርክር ምንጭ ሆኖ ቆይቷል። አንዳንድ ሰዎች የቀይ፣ ቢጫ እና አረንጓዴ ቀለም ባንዲራ ያለ የኮከብ አርማ ሲፈልጉ ሌሎች ደግሞ ይፋዊውን የኮከብ አርማ ይፈልጋሉ። የኮከብ አርማውን የማይፈልጉት ደግሞ በሌላ በኩል የኢትዮጵያን የተለያዩ ቡድኖች እና ህዝቦች የራስን ዕድል በራስ የመወሰን መብት ይጻረራሉ ተብለው ይተቻሉ።

በደመራ በዓል አከባበር ላይ ሰላምና ፀጥታን ለማስጠበቅ የኢፌድሪ  መንግስት እና የኢትዮጵያ ኦርቶዶክስ ተዋህዶ ቤተክርስትያን የቤተክርስትያኗን ምልክት ካላቸው ቀይ፣ ቢጫና አረንጓዴ ሰንደቅ አላማ ውጪ ምንም አይነት እውቅና የሌለውን ባንዲራ እና ምልክት ለብሰው በዓሉ ወደሚከበርበት ቦታ እንዳይመጡ አስጠንቅቀዋል። .

በበዓሉ ላይ ሰዎች ከደመራ በዓል ወይም የኢትዮጵያ ኦርቶዶክስ ተዋሕዶ ቤተ ክርስቲያን የማይወክሉ ሰንደቅ ዓላማዎች ወይም ምልክቶች ይዘው እንዳይመጡና መንግሥት ያወጣውን መመሪያ ማክበር እንዳለባቸው የፌዴራል ፖሊስ ኮሚሽን አስታውቆ ነበር።

ይህን ተከትሎ በደመራ በዓል ላይ አንድ ልጅ አረንጓዴ ቢጫ እና ቀይ ጥለት ያለው ቀሚስ ስለበሰች ከወላጆቿ ተነጥቃ በፌደራል ፖሊሶች ተወስዳለች በማለት በማህበራዊ ሚድያ ላይ ይህ ምስል ተጋርቷል።

ሀቅቼክ ይህን ፖስት መርምሮ ምስሉ የቅርብ ጊዜ እንዳልሆነ እና ተያይዞ የቀረበውን ሃሳብ የማይደግፍ መሆኑን አረጋግጧል።

በፖስቱ ላይ የሚታየው ምስል ከዚህ በፊት እ.አ.አ በጥር 2022 ትዊተር ላይ የተለጠፈ ሲሆን ምስሉ በመንግስት እና በህወሓት መካከል በተደረገው ጦርነት ወቅት የውጭ ሀገራት ጣልቃ ገብነትን በመቃወም በኢትዮጵያ በነበሩ ሰላማዊ ሰልፎች ጊዜ ተጋርቶ የነበረ እንደሆነ ታውቋል፡፡

ሀቅቼክ ጥቅም ላይ የዋለው ምስል ትክክለኛ ስላልሆነ ልጥፉ ሐሰት ብሎታል።

ሀቅቼክ ለተጨማሪ መረጃ ምስሉን ያጋራውን ግለሰብ ለማግኘት የሞከረ ሲሆን ነገር ግን ግለሰቡ ምንም አይነት ምላሽ አልሰጠም።

ፊልድ ማርሻል ብርሃኑ ጁላ የፋኖ ታጣቂዎች የመከላከያ ሰራዊት የጦር መሳሪያዎችን ማረኩ ብለዋል?

ከ5ሺህ በላይ ተከታዮች ያሉት አንድ የፌስቡክ ገፅ ኢታማጆር ሹም ፊልድ ማርሻል ብርሃኑ ጁላ የፋኖ ታጣቂዎች ታንኮችን ጨምሮ የኢ.ፌ.ዲ.ሪ መከላከያ ሰራዊት የጦር መሳሪያዎች ማርከዋል ብለዋል  በሚል አንድን ቪድዮ አጋርቷል።

ይህ ጽሁፍ እስከታተምበት ጊዜ ድረስ ፖስቱ​​​​ 1300 ግብረመልስን ስያገኝ  ከ90 ሺ በላይ ተጠቃሚዎች አይተውታል።

ይሁን እንጂ ሀቅቼክ ቪደዮው ፊልድ ማርሻል ብርሃኑ ጁላ የፋኖ ታጣቂዎች የመከላከያ ሰራዊት የጦር መሳሪያዎችን ማረኩ ማለታቸውን እንደማያሳይ አረጋግጧል። በዚህም የፌስቡክ ፖስቱ ሀሰት ተብሏል።

እ.አ.አ በየካቲት 2023 የኢትዮጵያ መንግስት የክልል ልዩ ሀይሎችን እንዲበተኑ እና ወደ መከላከያ ሰራዊት፣ ወደ ፌደራል ፖሊስ ወይም ወደ ክልል መደበኛ ፖሊስ እንዲቀላቀሉ ወስኗል። ይህም በአማራ ክልል የሚገኘውን ፋኖ በመባል የሚታወቁት ታጣቂዎች ያበሳጨና ተቃውሞ ያስነሳ ነው። ይህን ተከትሎ በፋኖ ታጣቂዎችና በመንግስት ወታደሮች መካከል ብዙ ግጭቶች ተካሂደዋል።

የአማራ ብልፅግና ፓርቲ ሀላፊ የነበሩት አቶ ግርማ የሺጥላ በሚያዝያ ወር መጨረሻ ላይ ማንነታቸው ባልታወቁ ሰዎች መገደላቸውን ተከትሎ የፌደራል መንግስት የኢትዮጵያ ብሔራዊ መከላከያ ሰራዊት በ”አክራሪ” ቡድኖች ላይ እርምጃ እንዲወስድ ባዘዘበት ወቅት የጸጥታው ቀውስ ተባብሷል።

በነሀሴ 2023 እ.አ.አ በአማራ ክልል የፋኖ ታጣቂዎች በርካታ የክልሉን ትላልቅ ከተሞች ለመቆጣጠር ችለው ነበር። ለዚህ ምላሽ የኢትዮጵያ መንግስት የአስቸኳይ ጊዜ አዋጅ በማወጅና የጸጥታ ሃይሎችን በማሰማራት ሁኔታውን መቀልበስ ችሏል። መንግስት ትላልቅ ከተሞችን ጨምሮ ብዙ ቦታዎችን መልሶ ቢቆጣጠርም፣ በክልሉ የነበሩት ግጭቶች ግን ተባብሰው ቀጥለዋል።

ሀቅቼክ የፋኖ ታጣቂዎች መሳሪያ እየማረኩ ነው የሚሉ የተለያዩ የማህበራዊ ሚዲያ ዜናዎችንም ተመልክቷል። ሆኖም ከእነዚህ ልጥፎች መካከል አንዳንዶቹ በውሸት እና በአሮጌ ምስሎች የታጀቡ ነበሩ።

ይህንኑ መነሻ በማድረግ አንድ  የፌስቡክ ገፅ ፊልድ ማርሻል ብርሃኑ ጁላ “ታንክን ጨምሮ ስፍር ቁጥር የሌላቸውን የጦር መሳሪያዎቻችንን ወስደውብናል” ሲሉ የሚሰሙበት አጭር ቪዲዮ በማጋራት፤ እነዚ በኢታማጆር ሹሙ የተጠቀሱ መሳሪያዎች በፋኖ የተፋረኩ እንደሆኑ አመላክቷል።ነገር ግን ሀቅቼክ የቪዲዮ ክሊፑ ይህንን እንደማያሳይ አረጋግጧል። ቪድዮው የተወሰደው እ.አ.አ በጥቅምት 2021 በዩቲዩብ ላይ በኢትዮጵያ ሳተላይት ቴሌቪዥን (ኢሳት) ከታተመው ቪዲዮ ሲሆን፤ ይህም በህዝባዊ ወያነ ሓርነት ትግራይ (ህወሓት) እና በኢትዮጵያ መንግስት መካከል ስለነበረው  ግጭት ከፊልድ ማርሻል ብርሃኑ ጁላ ጋር የተደረገ ቃለ መጠይቅ ውስጥ ተቆርጦ የተወሰደ ነው። በቪዲዮው ላይ ፊልድ ማርሻል ብርሃኑ ጁላ የህወሓት ሃይሎች ከኢ.ፌ.ዴ.ሪ መከላከያ ሰራዊት ታንኮችና ሌሎች መሳሪያዎችን መውሰዳቸውን ይናገራሉ።

ስለዚህ ሀቅቼክ  ይህ የፌስቡክ ፖስት የቆየና ትክክለኛ ያልሆነ ቪዲዮን በመጠቀሙ ምክንያት ሀሰት ብሎታል።

አለምን ያወዛገቡ አስር የሀሰተኛ መረጃ ዘመቻዎች እና ጉዳታቸው

በታሪክ አጋጣሚዎች ውዝግብ ለመፍጠር፣ የህብረተሰቡን አስተሳሰብ ለመቀየር፣ እንዲሁም ማህበራዊ እና ፖለቲካዊ አለመረጋጋትን ለመፍጠር በማሰብ ሀሰተኛ መረጃዎች ሆን ተብለው ይሰራጫሉ።

እስቲ በታሪክ አጋጣሚ የተሰራጩ ታዋቂ ሀሰተኛ መረጃዎች እና ዘመቻዎችን እንመልከት፦

  1. የጽዮን (አይሁድ) ሽማግሌዎች ሰነድ

ይህ ፅሁፍ ፀረ አይሁድ እና ሆን ተብሎ የተፈጠረ ሲሆን አይሁዶች አለምን ለመቆጣጠር እያሴሩ እንደሆነ የሚገልፅ ነው። ሰነዱ ለመጀመሪያ ጊዜ የታተመው በፈረንጆቹ 1903 በሩሲያ ውስጥ ነበር። ከዚያ በኋላ ይህ ፅሁፍ አሁን ድረስ ሰዎች አይሁዶች ላይ ጥላቻ እና አመፅ እንዲቀሰቅሱ እያደረገ ይገኛል። በዚህ መፅሀፍ ውስጥ ያለው መረጃ ሀሰተኛ መሆኑ ቢረጋገጥም አሁንም ድረስ በአንዳንድ የአለማችን ክፍሎች ዘንድ ይታመናል።

    2. ኤድስ በአሜሪካ እንደተፈጠረ

በፈረንጆቹ 1980ዎች የሶቭየት ህብረት ሀሰተኛ መረጃን ኦፕሬሽን ኢንፌክሽን (Operation INFEKTION) በሚል ዘመቻ አሜሪካ የኤች አይቪ ቫይረስን ለጦር መሳሪያነት በማሰብ በቤተሙከራ ፈጥራዋለች በማለት አሰራጭታ ነበር።

ይህ መረጃ በተለያዩ የሚድያ አማራጮች ላይ በስፋት መነገሩን ተከትሎ ኤች አይ ቪ ኤድስ ያለባቸው ሰዎች ላይ ትልቅ ጭንቀትና መገለል ፈጥሮ ነበር።

   3. የኢራቁ ሳዳም ሁሴን ጅምላ ጨራሹ መሳርያ

በፈረንጆቹ 2003 በኢራቅ ላይ በተደረገው ወረራ የአሜሪካ መንግስት እና አጋሮቿ ኢራቅ የጅምላ ጨራሽ መሳሪያዎች አላት ብለው ነበር። ይህ መረጃ ኢራቅን ለመውረር እና የሳዳም ሁሴን መንግስት ለመገርሰስ እንደ ምክንያት ቀርቦ ነበር። በኋላ ምንም አይት የጅምላ ጨራሽ መሳሪያዎች አለመገኘታቸውን ተከትሎ መረጃው በአለም አቀፍ ደረጃ ውግዘትን እና በመንግስት ላይ ያለን እምነት መሸርሸር እስከትሎአል።

  4. የራሽያ ጣልቃ ገብነት በ2016 የአሜሪካ ምርጫ

የአሜሪካ የደህንነት ተቋማቶች በ2016ቱ የአሜሪካ ፕሬዝደንታዊ ምርጫ የሩሲያ መንግስት የተለያዩ ዘመቻዎችን በማዘጋጀት በምርጫው ላይ ጣልቃ ገብቶ እንደነበር ይገልፃሉ። ይህም የተለያዩ የማህበራዊ ሚድያ ቦቶችን በመጠቀም ሀሰተኛ መረጃዎችን ማሰራጨት፣ የዲሞክራት ፓርቲ የኢሜል መልዕክቶችን በመጥለፍ ወዘተ ተሳትፏል ተብሏል። ይህ የራሽያ ጣልቃ ገብነት በምርጫ ሂደቱ ላይ የነበረውን እምነት ከመሸርሸሩም ባለፈ በአሜሪካ ውስጥ ፅንፈኝነት እንዲነግስ አድርጓል።

  5. የኮሮና ቫይረስን በተመለከተ የተሰራጩ የውሸት መረጃዎች

በኮቪድ 19 ወረርሽኝ ወቅት ስለ ቫይረሱ ምንጭ ፤ ስለክትባቱ እና ስለበሽታው አደገኛነት የሚመለከቱ የተለያዩ ሀሰተኛ መረጃዎች ሲሰራጩ ቆይተዋል። ይህም በማህበረሰቡ እና በህክምና ባለሙያዎች ዘንድ መወዛገብና አለመተማመን አስከትሏል። ታድያ እነዚህ ሀሰተኛመረጃዎች የኮሮና ቫይረስን ለመቆጣጠር የሚደረገውን ጥረት በእጅጉ ጎድቶታል።

  6. የራሽያው የቀድሞ ሰላይ መመረዝ

በፈረንጆቹ 2018 የቀድሞ የሩሲያ ሰላይ የነበረ ሰርጌ ስክሪፓል እና ሴት ልጁ ዩሊያ በእንግሊዝ ሳሊስበሪ ከተማ በነርቭ ጋዝ ተመርዘው ነበር። የእንግሊዝ መንግስት ለጥቃቱ የሩሲያን መንግስት የወነጀለ ሲሆን በተቃራኒው ሩሲያ ይህንን ጥቃት የፈፀመው የእንግሊዝ መንግስት መሆኑን ገልፆ ነበር።

  7. የካታሎንያ የነጻነት ሪፈረንደም

በፈረንጆቹ 2017 በስፔን የምትገኘው ካታሎኒያ የመገንጠል /ህዝበ ውሳኔ/ ጥያቄ  አቅርባ ነበር። የስፔን መንግስት ይህን የመገንጠል ጥያቄ /ህዝበ ውሳኔው/ ህገወጥ ነው በማለት ተናግሮ ነበር። ይህንን ተከትሎ በሁለቱም ወገኖች ሀሰተኛ መረጃዎች ሲሰራጩ ነበር። የመገንጠል ጥያቄ ደጋፊዎች መንግስት ሀሰተኛ መረጃን እያሰራጨ ነው ቢሉም በምላሹ የስፔን መንግስት እነዚህ የመገንጠል ጥያቄውን የሚደግፉ አካላት ሀስተኛ መረጃን እና አመፅን የሚቀሰቅሱ መረጃዎችን በማህበራዊ ሚድያ ላይ እያጋሩ ነው በማለት ገልፆ ነበር።

  8. የእንግሊዝ ከአውሮፓ ህብረት የመውጣት ህዝበ ውሳኔ

በፈረንጆቹ 2016 የእንግሊዝ መንግስት ከአውሮፓ ህብረት ለመውጣት ህዝበ ውሳኔን አካሂዶ ነበር። ይህንን ተከትሎ የተለያዩ ሀሰተኛ መረጃዎች ሲሰራጩ ቆይተዋል። ከነዚያም መካከል እንግሊዝ ህብረቱን ለቃ ከወጣች በሳምንት እስከ 350 ሚልዮን ፓውንድ ታተርፋለች የሚሉ መረጃዎች ሲሰራጩ ነበር። በሌላ በኩል እንግሊዝ ህብረቱን ለቃ ከወጣች የኢኮኖሚ ቀውስ ይከሰታል የሚሉ የተጋነኑ ዘመቻዎችም ነበሩ። የሀሰተኛ መረጃ አስተዋፅኦ ለዚህ ህዝበ ውሳኔ እስካሁን ድረስ ለቀጠሉ ውዝግቦች መንስኤ ሆኗል።

  9. የ2015ቱ የስደተኞች ቀውስ

በፈረንጆቹ 2015 ግሪክ ለስደተኞች ወደ አውሮፓ መግቢያ ዋነኛ ቦታ ሆና ነበር። ይህንን ከፍተኛ የሆነ የስደተኛ ቁጥርን ተከትሎ በስደተኞቹ ላይ ያነጣጠሩ ሀሰተኛ መረጃዎች ሲሰራጩ ነበር። ከዘመቻዎቹ መካከል የወንጀል ቁጥር ጨምሯል ፣ የሽብር ስጋቶች በርትተዋል የሚሉ ይገኙበታል።

  10. የዩክሬን ጦርነት

ከፈረንጆቹ 2014 ጀምሮ በሩሲያ እና ዩክሬን መካከል ግጭት እና የሀሰተኛ መረጃ ዘመቻዎችን ነበሩ።  የሩሲያ መገናኛ ብዙሃን ጣቢያዎች የዩክሬንን መንግስት ፋሽሽታዊ አገዛዝ ነው ሲሉ ነበር። እነዚህ ዘመቻዎች ግጭቱን ሲያባብሱ እና በዩክሬንና ራሽያ ህዝቦች መካከል የጥላቻ ስሜት ሲቀሰቅሱ ኖሯል።

Exit mobile version