ምስሎቹ በህውሃት ሃይሎች ተመተው የወደቁ ድሮኖችን ያሳያሉ?

አንድ የትዊተር ገጽ በሰኔ 20 ፣ 2013 ዓ.ም ባጋራው ትዊት (የትዊተር ልጥፍ) በአማራ ክልል አከባቢ ተመተው የወደቁ ወታደራዊ ድሮኖች ስለመኖራቸው ሁለት ምስሎችን አያይዞ ልጥፏል። ከምስሎቹ ጋር ተያይዞ የተጻፈው ጽሁፉ “ከትግራይ ሀይሎች ባገኘውት መረጃ መሰረት የፌደራሉ መንግስት ሲጠቀምባቸው የነበሩ ድሮኖች በአማራ ክልል የግጭት ቀጠና ውስጥ በህውሀት ሃይሎች ተሞቶ ወድቋል” ሲል ይነበባል።

የትዊተር መረጃውም ይህ ጽሁፍ እስከተጻፈበት ጊዜ ድረስ ከ 375 ጊዜ በላይ ተጋርቷል። ሀቅቼክ መረጃውን መርምሮ ሀሰት ብሎታል።

ከህዳር 2012 ዓ.ም ጀምሮ በፌደራል መንግስቱ እና በሕውሃት ሀይሎች መካከል ወራት ያስቆጠረ ግጭት እየተካሄደ ነው። ጦርነቱ የጀመረው ትግራይ በሚገኘው የሰሜን ዕዝ ወታደራዊ ካምፕ ላይ ህወሀት ጥቃት ከፈጸመ በኋላ እንደሆነ የፌደራል መንግስቱ ተናግሯል። በግጨቱም ሂደት፤ የአየር ሀይሉ በዘመናዊ ድሮኖች (ሰው አልባ አውሮፕላኖች) ብቃት ያለው መሆኑን፤ እነዚህ ድሮኖችም በጦርነቱ ላይ ጥቅም ላይ እየዋሉ እንደሆኑ ከፍተኛ የመከላከያ ባለስልጣናት በተለያዩ ጊዜያት አሳውቀዋል። 

ሆኖም ሪቨርስ ኢሜጅ የተባለው የምስል ማጣሪያ እንደሚያሳየው ምስሎቹ አሁን በሰሜኑ የኢትዮጵያ ክፍል ካለው ወቅታዊ ሁኔታ ጋር ምንም ግንኙነት የላቸውም።

የመጀመሪያው ምስል ለመጀመሪያ ጊዜ የተጋራው ጥቅምት 10 ፣ 2013 ዓ.ም ሲሆን ምስሉ የሚያሳየው በአርሳክ ጦር አማካኝነት ጥቃት የደረሰበትን የቱርክ ሰው አልባ አውሮፕላን ነው። ምስሉ የተወሰደው በ2012 ዓ.ም በነበረው በናጎርኖ-ካራባክ ጦርነት ወቅት እንደሆነ ተገልፁአል።

 ትክክለኛ ምስል 1

ሁለተኛው ምስል ለመጀመሪያ ጊዜ የተጋራው ሃምሌ ፣ 9 2012 ዓ.ም ሲሆን ምስሉ የሚያሳየው በአዘርባጃን እና በአርሜንያ መካከል በነበረው ጦርነት በሃገራቱ ሰሜናዊ ድንበር አካባቢ በአዘርባጃን ጦር ተመቶ የወደቀ የአርሜንያ ድሮን ነው።

ትክክለኛ ምስል 2

ስለሆነም የትዊተር ልጥፉ በሕውሃት ሃይሎች ተሞቶ የወደቀን የኢትዮጵያ ድሮን የማያሳይ በመሆኑ ሀቅቼክ መረጃውን ሀሰት ብሎታል።    

               

ምስሉ ጠቅላይ ሚኒስትር ዶ/ር አብይ አህመድ በሰሜን ኮሪያ ያደረጉትን ጉብኝት ያሳያል?

ከ106,708 በላይ ተከታይ ያለው የፌስቡክ ገፅ ነሃሴ ፣ 19 2013 ዓ.ም ባጋራው የፌስቡክ ልጥፍ “ጠቅላይ ሚኒስትር አብይ አህመድ ለሁለት ቀናት የስራ ጉብኝት ወደ ሰሜን ኮሪያ አቅንተዋል” ከሚል ጽሁፍ ጋር ሁለት ምስሎችን አያይዞ አጋርቷል።

ይህ ጽሁፍ እስከተጻፈበት ጊዜ ድረስ ልጥፉ ከ730 ጊዜ በላይ ተጋርቷል። ሀቅቼክ ልጥፉን መርምሮ ሀሰት ብሎታል።

ከሳምንት በፊት ነሃሴ ፣ 12 2013 ዓ.ም ጠቅላይ ሚኒስትር ዶ/ር አብይ አህመድ ከአማካሪዎቹ ጋር በመሆን ለአንድ ቀን የስራ ጉብኝት ወደ ቱርክ አቅንቶ የቱርኩን ፕሬዝዳንት ረሲፕ ጣይብ ኤርዶጋንን አግኝተው ነበር። በውይይታቸውም በሁለትዮሽ እና በቀጠናው ጉዳይ ላይ ተወያይተው በመጨረሻም  የወታደራዊ ስምምነት ማድረጋቸው ተነግሯል።  

ይህንን ተከትሎም ሀቅቼክ በፌስቡክ ልጥፉ ላይ የያያዙትን ምስሎች በሪቨርስ ኢሜጅ በተባለው የምስል መፈለጊያ ተመልክቷል። ምስሎችሁ ለመጀመሪያ ጊዜ የተለጠፉት በኢትዮጵያ የጠቅላይ ሚኒስትር ጽ/ቤት ከሁለት አመት በፊት በተመሳሳይ ቀን (ነሃሴ 20 ፣ 2011 ዓ.ም) ነበር። ምስሎቹም የተወሰዱት ጠቅላይ ሚኒስትር አብይ አህመድ ለሁለት ቀናት ይፋዊ የስራ ጉብኝት ወደ ደቡብ ኮሪያ አቅንተው ከደቡብ ኮሪያ ፕሬዝደንት፤ ሙን ጄ ጋር በተገናኙበት ወቅት ነበር። 

ትክክለኛ ምስል

ምስል፡ ጠቅላይ ሚኒስትር አብይ አህመድ በ 2011 ዓ.ም ወደ ደቡብ ኮሪያ ባቀኑበት ጊዜ የተወሰደ።

ከዚህ በተጨማሪም ነሃሴ ፣ 20 2013 ዓ.ም የደቡብ ሱዳኑን ፕሬዝደንት ሳልቫ ኪር ማያርዲት ወደ እኢትዮጵያ በመጡበት ጊዜ ጠቅላይ ሚኒስትር አብይ አህመድ በአዲስ አበባ አቀባበል አድርገውላቸዋል። ይህም ጠቅላይ ሚንስተሩ ለስራ ጉብኝት ከሀገር እንዳልወጡ ያሳያል። ይህ ጽሁፍ እስከ ተጻፈበት ጊዜ ድረስ ስለ ጠቅላይ ሚኒስትሩ የሰሜን ኮሪያ ጉዞ ከሚመለከታቸው አካላት የወጣ ምንም መረጃ የለም። 

ስለሆነም ሀቅቼክ መረጃውን አጣርቶ ምስሎቹ የኢትዮጵያው ጠቅላይ ሚኒስትር በሰሜን ኮሪያ ጉብኝት ማድራጋቸውን የማያሳይ በመሆኑ መረጃውን ሀሰት ብሎታል። 

የቱርኩ ፕሬዝዳንት የትግራዩን ግጭት ለማስቆም የማደራደር ጥያቄ አቅርበዋል?

አልጀዚራ ነሃሴ 13 2013 ዓ.ም በፌስቡክ ገፁ ባጋራው ፅሁፍ “ኤርዶጋን በኢትዮጵያ ትግራይ ያለውን ግጭት ለማደራደር ጥያቄ አቅርበዋል” ብሏል።

ልጥፉ በ አርእስት ፅሁፉ “የቱርኩ ፕሬዝዳንት ከኢትዮጵያው ጠቅላይ ሚኒስትር አብይ አህመድ ጋር ተገናኝተዋል ነገር ግን ምንም አይነት ስምምነት ይፋ አልተደረገም” ይህ የፌስቡክ ልጥፍ ከ 437 በላይ በሆኑ ተጠቃሚዎች ተጋርቷል።

ሀቅቼክ በድረ-ገፁ ውስጥ ያለው ፅሁፉ መርምሯል። በፅሁፉ ውስጥም የቱርኩ ፕሬዝዳንት ረሲፕ ጣይብ ኤርዶጋን በኢትዮጵያና ትግራይ ያለውን ግጭት ለማደራደር ጥያቄ ስለማቅረባቸው የሚገልጽ መረጃ ሰላለመኖሩ አረጋግጧል። ሰለሆነም ሀቅቼክ በፌስቡክ ልጥፉ እና በድህረ ገፁ ባለው ፅሁፍ መካከል ምንም አይነት ግንኙነት እንደሌለ በማረጋገጥ ይህን የፌስቡክ ልጥፍ  አሳሳች አርእስት ብሎታል።

የኢትዮጵያው ጠቅላይ ሚኒስትር አብይ አህመድ ነሃሴ 13 2013 ዓ.ም በቱርክ አንካራ የአንድ ቀን የስራ ጉብኝት አድርገዋል። በጉብኝታቸውም ከቱርክ አቻቸው  ረሲፕ ጣይብ ኤርዶጋን ጋር በሁለትዮሽ እና በቀጠናው ጉዳይ ላይ ተወያይተዋል። ፕሬዝዳንት ኤርዶጋን በኢትዮጵያ ትግራይ ላለው ግጭት ሰላማዊ መፍትሄን እንደሚደግፉ  መናገራቸው ተዘግቧል።

በተጨማሪም ፕሬዝዳንቱ በኢትዮጵያና ሱዳን ድምበር መካከል ባለው የአልፋሻቅ መሬት ላይ ያለውን የድምበር ግጭት ለማደራደር ፍላጎት እንዳላቸው ተናግረዋል።

የኢትዮጵያውን ጠቅላይ ሚኒስትር በአንካራ የነበራቸውን ጉብኝት አያይዞ አል-አረቢያ እንግሊዝኛ ባሳተመው ጽሁፍ ፕሬዝዳንት ረሲፕ ጣይብ ኤርዶጋን በኢትዮጵያና ትግራይ ታጣቂዎች መካከል ያለውን ግጭት ለማደራደር ጥያቄ አቅርበዋል ሲል አስነብቧል።  

ቀጥሎም አልጀዚራ በፌስቡክ ገጹ ላይ “ኤርዶጋን በኢትዮጵያ ትግራይ ያለውን ግጭት ለማደራደር ጥያቄ አቅርበዋል” የሚል አርዕስት ያለው ጽሁፍ ለጥፏል።   

            ምስል፡ ከድህረ ገፁ ከተገኘ ፅሁፍ

ይሁን እንጂ በድህረ ገፁ ውስጥ ያለው ፅሁፍ ኤርዶጋን በኢትዮጵያ ትግራይ ያለውን ግጭት ለማደራደር ጥያቄ ስለማቅረባቸው ምንም አይናገርም። ፅሁፉ በፌስቡክ ላይ ካለው ልጥፍ ጋር በ ርዕስም ሆነ በይዘት ይለያያል።

በድህረ ገፁ ላይ ያለው ፅሁፍ አርዕስት ኤርዶጋን በኢትዮጵያ ትግራይ ላለው ግጭት ሠላማዊ መፍትሄ እንደሚፈልጉ የሚናገር ሲሆን በአስር ሺዎች ለሚቆጠሩ ሰዎች መፈናቀል እንዲሁም በሚሊየኖች ለሚቆጠሩ ሰዎች መራብ ምክንያት የሆነው ይህ ግጭት በሠላማዊ መንገድ እንዲፈታ ያላቸውን ፍላጎት መናገራቸውን ይነበባል። 

በተጨማሪም ፕሬዝዳንቱ በኢትዮጵያና ሱዳን ድምበር መካከል ያለውን የድምበር ግጭት ለማደራደር ቱርክ ፍላጎት እንዳላት መናገራቸውን ይገልጻል።

 ምስል፡ አሶሽየትድ ፕሬስ

ሰለሆነም በፌስቡክ ልጥፉ ላይ ያለው አርዕስት በድህረ ገፁ ካለው ፅሁፍ ጋር ሀሰተኛ ግንኙነት እንዳለው ሀቅቼክ ስላረጋገጠ የፌስቡክ ልጥፉ ላይ ያለውን መረጃ አሳሳች አርእስት ብሎታል።

ምስሉ በኢትዮጵያ አየር ሃይል የህወሃት ሃይል ላይ አርምጃ መወሰዱን ያሳያል?

ከ215,000 በላይ ተከታይ ያለው የፌስቡክ ገፅ ነሃሴ 5 2013 ዓ.ም ባጋራው  ልጥፍ ላይ መረጃውን “ሰበር ዜና” በማለት ያጋራ ሲሆን ሙሉ ትስሁፉም “በአማራ ክልል ልዩ ስሙ ገረገራ ትምሕርት ቤት ውስጥ በድብቅ ካንፕ ሰርቶ የመሽገው “የጁንታ ሐይል” ጥቃት ከመፈፀሙ በፊት በአየር ሐይላችን በተወስደ ኦፕሬሽን ሙሉ ለሙሉ ለመደምሰስ ተችሏል።’’ ሲል ይነበባል። በልጥፉ የተጠቀሰችው ገርገራ ከተማ በአማራ ክልል ሰሜን ወሎ ዞን ከላሊበላ 73.5 ኪሎ ሜትር ርቀት ላይ የምትገኘው ከተማ ናት።

በመሆኑ ምስሎቹ ከጉዳዩ ጋር ምንም ግንኙነት የሌላቸው ሰለሆኑ ሀቅቼክ መረጃውን ሀሰት ብሎታል።

ይህ ልጥፍ ከህዳር 2013 ጀምሮ በኢትዮጵያ ፌደራል መንግስት እና በትግራይ ህዝብ ነፃ አውጪ ግንባር (ህወሓት) ጦር መካከል እየተካሄደ ያለውን ግጭት ተከትሎ በማህበራዊ ሚዲያ እየተዘዋወሩ ከነበሩት መካከል አንዱ ነው። ጦርነቱ ከተጀመረ ከሶስት ሳምንት በኋላ የፌደራል መንግስት የክልሉን ዋና ከተማ መቀሌን እና አብዛኛዎቹን የክልሉን ክፍሎች ተቆጣጥሯል።

ይሁን አንጂ ጦርነቱ ከተጀመረ ከስምንት ወራት በኋላ የፌዴራሉ መንግሥት ወታደሮቹን ከክልሉ ለማውጣት ወስኛለው በማለት የአንድ ወገን ሰብዓዊ የተኩስ አቁም አዋጅ ማወጁ ተሰምቷል። ይህን ተከትሎ የቀድሞው የክልሉ እና የህወሓት አመራሮች የኢትዮጵያ ሰራዊት ከክልሉ መውጣቱ ተከትሎ  ሰኔ 21 ቀን 2013 የክልሉን ዋና ከተማ እና አብዛኞቹን የክልል ግዛቶች መልሰው ተቆጣጠሩ።

የህወሓት-ሀይሎች ከ መካከለኛው የትግራይ ክፍል እየወጡ ወደ ደቡብ እና ደቡብ ምስራቅ መገስገስ በመጀመራቸው ከቅርብ ጊዜ ወዲህ ትግራይን ፣ አማራ እና አፋር ክልልን በሚዋሰኑ የድንበር አካባቢዎች ግጭቶች መከሰታቸው ተዘግቧል። ሀምሌ 29 በአማራ ክልላዊ መንግስት ሰሜን ወሎ ዞን የላሊበላ ከተማን የህወሓት ሀይሎች  መቆጣጠራቸው ተዘግቧል። ያንን ተከትሎ የጠቅላይ ሚኒስትር ጽ/ቤት ነሐሴ 4 ኢትዮጵያውያን በህወሓት ኃይሎች ላይ በሚደረገው ዘመቻ ላይ እንዲሳተፉ ጥሪ አቅርቧል። በአማራ ክልል የአየር ኃይሉ በህወሓት ጦር ላይ ጥቃት ፈፀመ የሚለው የፌስቡክ ጽሑፍ በእነዚህ ሁኔታዎች ወቅት ተጋርቷል።

ሃቅቼክ ሪቨርስ ኢሜጅ በተባለ የምስል ማጣሪያ ገፅ ምስሉን ፈልጎ፤  ምስሉ ለመጀመሪያ ጊዜ የተለጠፈው ጥር 5 2012 መሆኑን አረጋግጧል። ምስሉ የተወሰደው በወቅቱ በባርሴሎና አቅራቢያ በሰሜን ምስራቅ ስፔን በሚገኝ የፔትሮኬሚካል ፋብሪካ ላይ ከተከሰተ ፍንዳታ ላይ ነው።

የመጀመሪያው ምስል

መንግስት በህወሓት ሀይሎች ላይ ጥቃት መጀመሩን የሚገልጹ ዘገባዎች ቢኖሩም ፣ ሃቅቼክ ምስሉ በገረገራ በህወሓት ሀይሎች  ላይ የተፈጸመ ጥቃት አለመሆኑን አረጋግጧል። ስለሆነም ምስሉ ከጉዳዩ ጋር  ምንም ግንኙነት የሌለው በመሆኑ ሀቅቼክ የፌስቡክ ልጥፉን ሀሰት ብሎታል።  

ምስሉ የሱዳን ወታደሮች ምዕራብ ጎንደርን እየተቆጣጠሩ መሆኑን ያሳያል?

በለሳ TV የተባለ ከ 47,000 በላይ ተከታዮች ያሉት የፌስቡክ ገፅ ሚያዚያ 29፣ 2013 ዓ.ም በለቀቀው የፌስቡክ ልጥፍ ወታደሮችን እና ፍንዳታን የሚያሳዩ ምስሎችን አጋርቷል። በትግርኛ የተጻፈው ጽሁፍ ሲተረጎም “የሱዳን ጦር ወደ ምዕራብ ጎንደር በመግባት አዳዲስ ግዛቶችን እየተቆጣጠረ መሆኑን የሱዳን የዜና አውታሮች ዘግበዋል …” ሲል ይነበባል። ሆኖም ሀቅቼክ መረጃውን መርምሮ ከልጥፉ ጋር የተያያዙት ምስሎች የሱዳን ጦረ ምዕራብ ጎንደር መግባቱን እና ግዛቶችን መቆጣጠሩን የማያሳዩ መሆኑን አረጋግጧል። ሰለሆነም ምስሎቹ ከጉዳዩ ጋር ምንም ግንኙነት የሌላቸው በመሆኑ ሀቅቼክ መረጃውን ሀሰተኛ ብሎታል።

በኢትዮጵያ እና በሱዳን ድንበር አከባቢ ከህዳር 2013 ጀምሮ ግጭት ነበር። የሱዳን የመከላከያ ሰራዊት በኤል ገዳርፍ በሰላም በር እና ማሃጅ አከባቢ ያሉ ግዛቶችን ከኢትዮጵያ ጦር እና ከታጠቁ ሚሊሻዎች ማስመለስ መቻሉን ገልፁአል። ታህሳስ 22 2012 የሱዳኑ የውጭ ጉዳይ ሚኒስትር ኦማር ካማረዲን ከኢትዮጵያ አርሶ አደሮች በተረከበው የኢትዮ-ሱዳን ድንበር ዙሪያ ያሉትን ሁሉንም ግዛቶች መልሶ ማቋቋም እና ሙሉ ቁጥጥር ማድረጉን አስታውቀዋል። ሀገራቱ ጉዳዩን ለመፍታት እና ድንበሩን ለማካለል ውይይት እና ድርድር ሲያደርጉ ቆይተዋል። በቅርቡም ሱዳን በሚያከራክሩ ግዛቶች ዙሪያ ከኢትዮጵያ ጋር እንድትደራደር በተባበሩት አረብ ኤምሬቶች የቀረበውን ጥያቄ ተቀብላለች።

ሆኖም ሪቨርስ ኢሜጅ የተባለ የምስል ማጣሪያ እንደሚያሳየው ከልጥፉ ጋረ የተያያዘው የመጀመሪያው ምስል የተወሰደው በፈረንሳይኛ ተፅፎ ከታተመ ፅሁፍ ላይ ሲሆን ግንቦት 2006 ዓ.ም ነበር የተነሳው። ሁለተኛው ምስል የተወሰደው በአረብኛ ተጽፎ ከተለቀቀ የፌስቡክ ልጥፍ ጋር ሲሆን መጋቢት 2009 ዓ.ም ላይ መለቀቁን ያሳያል።

በኢትዮጵያ እና ሱዳን መካከል የድንበር ግጭት መኖሩ እውነት ነው። ሆኖም በፊስቡክ ላይ የተሰራጨውን ልጥፍ ሀቅቼክ መርምሮ ምስሎቹ የሱዳን ጦረ ምዕራብ ጎንደር መግባቱን እና ግዛቶችን መቆጣጠሩን የማያሳዩ መሆኑን አረጋግጧል። ሰለሆነም ምስሎቹ ከጉዳዩ ጋር ምንም ኝኙነት የሌላቸው በመሆናቸው የፌስቡክ ልጥፉን ሀሰት ብሎታል።  

አጣሪ፡ ሓጎስ ገብረአምላኽ

ተርጓሚ፡ ርሆቦት አያሌው

ይህ ፅሑፍ በአዲስ ዘይቤ የምርምርና ተቋም ግንባታ ቢሮ (Addis Zeybe Research & Development Department) በሚመራው ፤ ሀቅቼክ የተዘጋጀ ሲሆን ሀቅቼክ በአምስት ቋንቋዎች (አማርኛ፣ ኦሮምኛ፣ ትግርኛ፣ ሶማልኛ እና እንግሊዘኛ ቋንቋዎች)  እየተዘጋጀ የሚቀርብ የተለያዩ መረጃዎችን ሀቅነት የሚመረምር የአዲስ ዘይቤ መርሀ ግብር ነው። 

አቶ ኃይለማሪያም ደሳለኝ የኦሮሚያ ብልጽግና ፓርቲን አስጠንቀዋል?

በ5 የካቲት 2013 ዓ.ም Gonder tube/ጎንደር የተባለ (ከ 141,693 በላይ ተከታዮች ያሉት) የፌስቡክ ገፅ የቀድሞው የኢፌዴሪ ጠቅላይ ሚኒስትር አቶ ኃይለማርያም ደሳለኝን ምስል በመለጠፍ  ከ CJTN ጋር ባደረገው ቃለ መጠይቅ ወቅት ለኦሮሚያ ብልጽግና ፓርቲ ማስጠንቀቂያ ሰጥቷል በማለት አጋርቷል። ጓደኞቹም መረጃውን እንዲያካፍሉ ጥያቄ አቅርቧል። በአማርኛ የተፃፈው ፅሁፍ “… የኦሮሞ ብልፅግና ያልተረዳው ሀቅ ቢኖር ጀዋርም ሆነ ቄሮ የሚባለው ቡድን ለእኔ ስልጣን መልቀቅ ቅንጣት ሚና አልነበራቸውም እኔ ስልጣኔን ያስረከብሁት ህወሃትን የአማራ ህዝብ መፈናፈኛ ስላሳጣ ነበር የኦሮሞ ብልፅግና ከህወሓት መማር ይኖርበታል ሲሉ ለሲጅቲኤን ተናግረዋል…” ሲል ይነበባል። ሆኖም ሀቅቼክ ጉዳዩን በመመርመር የቀድሞው ጠ / ሚ ኃይለማሪያም የኦሮሚያን ብልጽግና ፓርቲን እንዳላስጠነቀቁ እንዲሁም በቅርቡ ከ ሲጂቲኤን (CJTN) ጋር ቃለ ምልልስ እንዳላደረጉ አረጋግጧል። ሰለዚህ መረጃውን ሀሰት በማለት በይኖታል።

 

የደርግ ስርዓት ካለቀበት 1983 ዓ.ም ጀምሮ የኢህአዲግ ጥምረት / ፓርቲ ለሁለት አስርት ዓመታት ኢትዮጵያን ገዝቷል። ህወሃት በጥምረቱ ውስጥ እስከ 2010 ዓ.ም ድረስ የበላይነት የነበረው ሲሆን የቀድሞው ጠ/ሚኒስትር መለስ ዜናዊ ከሞቱ በኋላ የኢኮኖሚ ማሽቆልቆል እና ሕዝባዊ አመጾች በመላ አገሪቱ ተከስቶ ነበር። ከመንግስት ተቃዋሚዎች መካከል የብዙሃን የተቃውሞ ሰልፎች መሐንዲስ  የነበረው አንዱ መሪ ጃዋር መሃመድ በኦሮሚያ ቄሮ የሚባለውን የኦሮሞ ወጣቶች አደረጃጀት በመመስረት መንግስት በብዙ ዘርፎች ማሻሻያዎችን እንዲያደርግ ተጽዕኖ አርጓል። እነዚህ እንቅስቃሴዎች የቀድሞው ጠቅላይ ሚኒስትር ኃይለማርያም ደሳለኝ በሚያዚያ 2010 ዓ.ም ስልጣናቸውን እንዲለቁና በጠቅላይ ሚኒስትር ዐቢይ አህመድ አሊ (ፒኤችዲ) እንዲተኩ አስተዋትጾ አርጓል። 

በ 2012 ዓ.ም ኢህአዴግ አንድ ፓርቲ በመሆን ስሙን ወደ ብልጽግና ፓርቲ ቀይሯል። ህወሃትም ፓርቲውን ለመቀላቀል የቀረበትንን ጥሪ ውድቅ በማድረግ ወደ ትግራይ ክልል ተመልሷል። ከዛም በኋላ 25 ጥቅምት 2013 ዓ.ም በሰሜን እዝ ላይ በተደረገው ጥቃት በሕወሃት በሚመራው የትግራይ ክልል ኃይል እና በፌዴራል መንግሥት በሚመራው ኃይል መካከል የትጥቅ ትግል ተካሂዷል። በፌዴራሉ መንግስት የሚመራው ኃይል የህወሃት ኃይል እና ዋና አመራሩን አፍርሷል ቢባልም በትግራይ ክልል ውስጥ ያለው አለመረጋጋት ቀጥሏል።

የቀድሞው ጠቅላይ ሚኒስትር ለኦሮሚያ ብልጽግና ፓርቲ አስጠነቀቀ በማለት በፌስቡክ ላይ የተለቀቀው ልጥፍ በሰፊው እየተሰራጨ ሲሆን በሌሎች ተጠቃሚዎች ከ147 ጊዜ በላይ ተጋርቷል። ሆኖም የቀድሞው ጠቅላይ ሚኒስትር በቅርቡ ከሲጄቲኤን ጋር ቃለ ምልልስ አለማረጋቸውን እና ለኦሮሚያ ብልጽግና ፓርቲ ምንም አይነት ማስጠንቀቂያ በቪዲዮም ሆነ የጽሑፍ ቃለ ምልልስ እንዳልሰጡ የመገናኛ ብዙሃኑ ሁሉም ገፆች ላይ በተደረገ ምርመራ ለማወቅ ተችሏል። በእርግጥ በፌደራል መንግስቱ እና በህወሃት ኃይሎች መካከል እየተካሄደ ያለውን የትጥቅ ግጭት አስመልክቶ በውጭ ፖሊሲ ላይ የአስተያየት መጣጥፍ ፅፈዋል ፡፡

ስለሆነም ሀቅቼክ ጉዳዩን መርምሮ የቀድሞው የኢትዮጵያ ጠቅላይ ሚኒስትር አቶ ኃይለማሪያም ደሳለኝ የኦሮሚያን ብልጽግና ፓርቲን እንዳላስጠነቀቁ እና ልጥፉን ለመደገፍ የተጠቀሙት ማጣቀሻ ትክክለኛ አለመሆኑን ሰላገኘ መረጃው ሀሰት መሆኑን አረጋግጧል ፡፡

አጣሪ፡ ሓጎስ ገብረአምላኽ

ተርጓሚ፡ ርሆቦት አያሌው

አርታኢ፡ ብሩክ ነጋሽ

ይህ ፅሑፍ በአዲስ ዘይቤ የምርምርና ተቋም ግንባታ ቢሮ (Addis Zeybe Research & Development Department) በሚመራው ፤ ሀቅቼክ የተዘጋጀ ሲሆን ሀቅቼክ በአምስት ቋንቋዎች (አማርኛ፣ ኦሮምኛ፣ ትግርኛ፣ ሶማልኛ እና እንግሊዘኛ ቋንቋዎች) እየተዘጋጀ የሚቀርብ የተለያዩ መረጃዎችን ሀቅነት የሚመረምር የአዲስ ዘይቤ መርሀ ግብር ነው። 

ምስሉ ደብረፅዮን ገ/ሚካኤል እና ጌታቸው ረዳ ሞተው መገኘታቸውን ያሳያል?

በ 5 የካቲት 2013 ዓ.ም ወንድዬ ያለው የተባለ የፌስቡክ ተጠቃሚ ሰበር- ዜና በተባለ ከ 157,000 በላይ አባላት ባለው የፌስቡክ ግሩፕ ላይ “ደብረጺዮን ገ/ሚካኤል እና ጌታቸው ረዳ ሞተው ተገኝተዋል” በማለት አጋርቷል። ከልጥፉ ጋር ተያይዞም ቃሬዛ የያዙ ወታደሮች ምስል እና ሙሉ ቪዲዮ ለመመልከት ያስችላል የተባለ የተሌግራም ማስፈንጠሪያ ይገኛል። ሆኖም ሀቀቼክ ልጥፉን መርምሮ ምስሉ የደብረፅዮን ገ/ሚካኤል እና የጌታቸው ረዳን አስከሬን እንደማያሳየው እና ሀሰት መሆኑን አረጋግጧል።

 

 

ከ25 ጥቅምት 2013 ዓ.ም ጀምሮ በሕወሃት በሚመራው የትግራይ ልዩ ኃይል እና በፌዴራል መንግሥት በሚመራው ኃይል መካከል የትጥቅ ትግል ተካሂዷል። 19 ህዳር 2013 ዓ.ም የፌዴራል መንግስት የክልሉን ዋና ከተማ መቐለ ከተማ መቆጣጠሩ ተዘግቧል። ከቅርብ ጊዜ ወዲም የህወሓት ከፍተኛ ሃላፊዎች እና ወታደራዊ መኮንኖች በቁጥጥር ስር እያዋሉ መሆኑንም ተስተውሏል። በቁጥጥር ስር ከዋሉት መካከል የህወሃት የጀርባ አጥንት የሚባሉት ስብሃት ነጋ ፣ የቀድሞው የትግራይ ፕሬዝዳንት አባይ ወልዱ ፣ የትግራይ ምክትል ፕሬዝዳንት አቶ አብርሃም ተከስተ (ፒ.ኤች.ዲ) እና ሌሎችም ይገኙበታል። 6 ጥር 2013 ዓ.ም የኢትዮጵያ መከላከያ ሰራዊት በሰጠው መግለጫ ሶስት የህወሃት ባለስልጣናት፤ የህወሃት የፖለቲካ መሪ የነበሩት አባይ ፀሃዬ  ፣ የቀድሞው የውጭ ጉዳይ ሚኒስትር ስዩም መስፍን እና የህወሃት ስራ አስፈፃሚ ኮሚቴ አባል የነበሩት አቶ አስመላሽ ወልደስላሴ እና ሌሎች የቀድሞ ወታደራዊ አባላት መገደላቸው ተነግሯል።

ሆኖም ሪቨርስ ኢሜጅ የተባለ የምስል ማጣሪያ እንደሚያሳየው ምስሉ ለመጀመሪያ ጊዜ የታተመው በ24 የካቲት 2012 ዓ.ም አርሚ ታይምስ (Army times) በተባለ የወታደራዊው ማህበረሰብ ዜና እና መረጃ ምንጭ በሆነ ድረ ገፅ። ምስሉ ጥቅም ላይ የዋለው በስልጠና ወቅት ሰለሚደርስ አደጋ በተፃፈ ጽሑፍ ላይ ሲሆን “18 ጥር 2012 ዓ.ም ወታደራዊ ስልጠና በሚሰጥበት ወቅት የበረራ ፓራሜዲክሶች አስቸኳይ የቀዶ ህክምና ጥሪ ደረሳቸው” ሲል ይነበባል። ምስሉ የተነሳው የአሜሪካ ጦር ፎቶግራፍ አንሺ በሆነው የመጀመሪያ ክፍል ሳጅን ጋሪክ ሞርገንዌክ (Sgt. 1st Class Garrick W. Morgenweck) ነበር።

ዋናው ምስል

 

በተጨማሪም በልጥፉ ላይ “ሙሉ ቪዲዮ በቴሌግራም ተለቋል፤ ሊንኩን ተጭነው ይግቡ” የሚል ፅሁፍ ከቴሌግራም ማስፈንጠሪያ ጋር የሚገኝ ሲሆን በቴለግራም ቻናሉ ውስጥ አለ የተባለው ቪዲዮም ይሁን ከጉዳዩ ጋር ግንኙነት ያለው ምንም አይነት መረጃ አይገኝም። 

ምንም እንኳን በቁጥጥር ስር የዋሉ እና የተገደሉ የህወሃት ባለስልጣናት ቢኖሩም ደብረጺዮን ገ/ሚካኤል እና ጌታቸው ረዳ ስላሉበት ሁኔታ የሚታወቅ መረጃ የለም። ስለሆነም ሀቅቼክ ባደረገው ምርመራ ምስሉ የደብረጺዮን ገ/ሚካኤል እና ጌታቸው ረዳን አስክሬን የማያሳይ በመሆኑ እና ከመረጃው ጋር ምንም ግንኙነት የሌለው በመሆኑ ሀሰት መሆኑን አረጋግጧል። 

አጣሪ፡ ርሆቦት አያሌው

ተርጓሚ፡ ርሆቦት አያሌው

አርታኢ፡ ብሩክ ነጋሽ

ይህ ፅሑፍ በአዲስ ዘይቤ የምርምርና ተቋም ግንባታ ቢሮ (Addis Zeybe Research & Development Department) በሚመራው ፤ ሀቅቼክ የተዘጋጀ ሲሆን ሀቅቼክ በአምስት ቋንቋዎች (አማርኛ፣ ኦሮምኛ፣ ትግርኛ፣ ሶማልኛ እና እንግሊዘኛ ቋንቋዎች) እየተዘጋጀ የሚቀርብ የተለያዩ መረጃዎችን ሀቅነት የሚመረምር የአዲስ ዘይቤ መርሀ ግብር ነው። 

 

ምስሉ ጠ/ሚ አብይ አሕመድ ታመው በሆስፒታል ውስጥ ሲታከሙ ያሳያል?

በ16 ጥር 2013 ዓ.ም ታጅዲን አህማዲ(Taajudin Ahamadi) የተባለ (ከ 3,900 በላይ ጓደኞቹ ያሉት) የፌስቡክ ተጠቃሚ ከዚህ በታች ያለውን ምስል የኢትዮጵያ ጠቅላይ ሚኒስትር አብይ አህመድ (ዶ/ር) በጠና ታመው በሆስፒታል ውስጥ ህክምና እየተደረገላቸው ነው በማለት አጋርቶ ነበር። ልጥፉ የወጣው የጠቅላይ ሚኒስትሩን ከሚዲያ መጥፋት ተከትሎ ስለደህንነቱ ጥርጣሬዎች እና የተለያዩ ግምታዊ አስተያየቶች እየተሰራጩ ባለበት ወቅት ነበር። ልጥፉ በተለያዩ ተጠቃሚዎች ሲሰራጭ ተስተውሏል። ሆኖም ሀቅቼክ ጉዳዩን መርምሮ ምስሉ ጠ/ሚ አብይ አሕመድ መታመማቸውን እና በሆስፒታል ውስጥ እየታከሙ መሆኑን የማያሳይ እና ቅንብር መሆኑን አረጋግጧል።

 

ከቅርብ ጊዜያት ወዲህ የጠ/ሚ ዐብይ አህመድ (ዶ/ር) ከሚዲያ መጥፋት ተከትሎ ስለደህንነቱ ጥርጣሬዎች እና የተለያዩ ግምታዊ አስተያየቶች እየተሰራጩ ይገኛል። አንዳንዶች ጠቅላይ ሚኒስትሩ በጠና መታመማቸውን ሌሎች ደግሞ ሞተዋል በማለት ገምተዋል። ነገር ግን የጠቅላይ ሚኒስትር ጽህፈት ቤት በጠቅላይ ሚኒስትሩ ደህንነት ዙሪያ የሚነሱ ግምቶች ሐሰት መሆናቸውን አስታውቋል።  እነዚህ ያልተረጋገጡ ግምቶች እየተሰራጩ ባሉበት መካከል በ20 ጥር 2013 ዓ.ም ጠቅላይ ሚኒስትሩ ለተጎዱ ወታደሮች እና ሲቪሎች የሰው ሰራሽ አካላት ማምረቻን ሲጎበኙ ታይተዋል።

ሆኖም ሪቨርስ ኢሜጅ የተባለ የምስል ማጣሪያ እንደሚያሳየው ምስሉ ለመጀመሪያ ጊዜ የታተመው ጎፈንድሚ በተባለ የበይነ መረብ የገንዘብ ማሰባሰቢያ ሲሆን ቢድሃን ታፓ የተባለ ሰው በደረሰበት የልብ ምት ማቋረጥ (cardiac arrest) ምክንያት ሲረዳበት በነበረው ጆን ሆፕኪንስ ሆስፒታል መሞቱን ተከትሎ የቢድሃን ታፓ ሚስት ፕሪስኪላ ራይን ለመርዳት ምስሉን በመጠቀም ገንዘብ ለመሰብሰብ በድረ ገፁ ላይ ተለጥፏል። 

የተቀናበረው ምስል

የመጀመሪያው ምስል

ከቅርብ ጊዜያት ወዲህ በጠ/ሚ ዐብይ አሕመድ ደህናነት እና የጤና ሁኔታ ላይ የተለያዩ ጥያቄዎች እና መላምቶች ሲነሱ ይስተዋላል። ሆኖም ሀቅቼክ ልጥፉን ከመረመረ በኋላ ምስሉ ጠቅላይ ሚኒስትሩ መታመማቸውን እንዲሁም በሆስፒታል ውስጥ በመታከም ላይ መሆናቸውን የማያሳይ እና ቅንብር መሆኑን አረጋግጧል።

 

አጣሪ፡ ሓጎስ ገብረአምላኽ

 

ተርጓሚ፡ ርሆቦት አያሌው

አርታኢ፡ ብሩክ ነጋሽ

ይህ ፅሑፍ በአዲስ ዘይቤ የምርምርና ተቋም ግንባታ ቢሮ (Addis Zeybe Research & Development Department) በሚመራው ፤ ሀቅቼክ የተዘጋጀ ሲሆን ሀቅቼክ በአምስት ቋንቋዎች (አማርኛ፣ ኦሮምኛ፣ ትግርኛ፣ ሶማልኛ እና እንግሊዘኛ ቋንቋዎች) እየተዘጋጀ የሚቀርብ የተለያዩ መረጃዎችን ሀቅነት የሚመረምር የአዲስ ዘይቤ መርሀ ግብር ነው። 

ምስሉ የግብፅ ወታደሮች ከሱዳን ጋር መሰማራታቸውን ያሳያል?

በ12 ጥር 2013 ዓ.ም Afmeer tv. የተባለ (ከ237,000 በላይ ተከታዮች ያሉት) የፌስቡክ ገፅ በርከት ያሉ ወታደራዊ ተሽከርካሪዎችን ከወታደሮች ጋር የሚያሳይ አንድ ምስል አጋርቷል። በፌስቡክ ልጥፉ ላይ በሶማሊኛ የተፃፈው ጽሑፍ “5000 የሚደርሱ የግብፅ መከላከያ ሠራዊት የሱዳን ጦርን ለማገዝ ሱዳን መድረሳቸውን የተለያዩ ዘገባዎች አትተዋል። ከዚህ በተጨማሪም በሱዳንና ኤርትራ ድንበር አከባቢዎች ከ3000 በላይ የሚሆኑ የሱዳን ጦር ሠራዊት እየገሰገሱ ሲሆን ጉዳዩ እየተባባሰ ነው።” ሲል ይነበባል። ሆኖም ሀቅቼክ ጉዳዩን መርምሮ ምስሉ በሱዳን የተሰማሩ 5,000 የግብፅ ወታደሮችን ስለማያሳይ እና መረጃውን ለመደገፍ ትክክለኛ ያልሆነ ምስል በመጠቀሙ ልጥፉን ሀሰት መሆኑን አረጋግጧል። 

ከቅርብ ጊዜ ወዲህ በኢትዮ-ሱዳን ድንበር ዙሪያ የታጠቁ ግጭቶች መኖራቸው እውነት ነው። በድንበር አካባቢ የኢትዮጵያ ኃይሎች እና ሚሊሻዎች በሱዳን ጦር ላይ ያደረጉት ጥቃት “ተገቢ ያልሆነ ጥቃት” ስትል ግብፅ አውግዛለች። ከዚህም በተጨማሪ ግብፅ ለሱዳን ሙሉ አጋርነቷን እና አገሪቷ ግዛቷን የመጠበቅ መብቷን መደገፏን አረጋግጣለች። ሱዳን ተጨማሪ ወታደሮችን ወደ ድንበር አከባቢዎች መላኳን እና ውጥረቱ እየጨመረ መምጣቱን የሚገልጹ መረጃዎችም እየወጡ ይገኛሉ።

ሆኖም ሪቨርስ ኢሜጅ የተባለ የምስል ማጣሪያ እንደሚያመለክተው በልጥፉ ጥቅም ላይ የዋለው ምስል የሱዳንን ሀይሎች ለመደገፍ በሱዳን ድንበር ላይ ተሰማርተው ያሉ የግብፅ ወታደሮችን አያሳይም። ምስሉ ለመጀመሪያ ጊዜ በ7 የካቲት 2010 ዓ.ም አህራም ኦንላይን (Ahram Online) በተባለ ድረ ገፅ ላይ የተለጠፈው ሲሆን በሲና በረሃ በአሸባሪዎች እና በወንጀል ቡድኖች ላይ ወታደራዊ ዘመቻ መወሰዱን ለማሳየት ጥቅም ላይ ውሏል። አህራም ኦንላይን ምስሉን የወሰደው ከግብፅ መከላከያ ሚኒስቴር ነበር።

በቅርቡ በሱዳን እና በኢትዮጵያ መካከል ያለው የድንበር ውዝግብ እየጨመረ መምጣቱ እና ሱዳን ተጨማሪ ወታደሮችን ወደ ድንበሩ አካባቢዎች ማሰማራቷ እየተዘገበ ይገኛል። ሆኖም ሀቅቼክ ባደረገው ማጣራት ምስሉ ሱዳንን ለመደገፍ በድንበሩ ዙሪያ የመጡ የግብፅ ወታደሮችን የማያሳይ በመሆኑ እና መረጃውን ለመደገፍ ትክክለኛ ያልሆነ ምስል በመጠቀሙ ልጥፉን ሀሰት በማለት ፈርጆታል።

አጣሪ፡ ሓጎስ ገብረአምላኽ

ተርጓሚ፡ ርሆቦት አያሌው

አርታኢ፡ ብሩክ ነጋሽ

ይህ ፅሑፍ በአዲስ ዘይቤ የምርምርና ተቋም ግንባታ ቢሮ (Addis Zeybe Research & Development Department) በሚመራው ፤ ሀቅቼክ የተዘጋጀ ሲሆን ሀቅቼክ በአምስት ቋንቋዎች (አማርኛ፣ ኦሮምኛ፣ ትግርኛ፣ ሶማልኛ እና እንግሊዘኛ ቋንቋዎች) እየተዘጋጀ የሚቀርብ የተለያዩ መረጃዎችን ሀቅነት የሚመረምር የአዲስ ዘይቤ መርሀ ግብር ነው። 

ጥር 13 በደጀን ወረዳ በተከሰተ የመኪና አደጋ የ39 ሰዎች ህይወት አልፏል?

ብሩክ አይናለም የተባለ የፌስቡክ ተጠቃሚ በ13 ጥር 2013 ዓ.ም የጨዋዎች ግሩፕ በተባለ (ከ142,000 በላይ አባላት ባሉት) የፌስቡክ ግሩፕ ላይ በአማራ ክልል የመኪና አደጋ ደርሶ 39 ሰዎች መሞታቸውን የሚገልፅ መረጃ አጋርቷል። በልጥፉ ላይ የተፃፈው ፅሁፍ “… ከአዲስ አበባ ወደ በባህርዳር 65 ሠዎችን አሳፍሮ ሲጓዝ የነበረ የህዝብ ማመላለሻ አውቶብስ ተገልብጦ የ39 ሠዎች ህይወት አልፏል። አደጋው የደረሰው ዛሬ (13 ጥር 2013 ዓ.ም) ከቀኑ 5:35 አውቶብሱ በአማራ ክልል፤ ደጀን ወረዳ፤ ባልበሌ ቀበሌ አካባቢ በሚገኝና 50ሜትር ጥልቀት ባለው ገደል ገብቶ ነው። ማንነታቸው ስላልታወቀ ከቤተሰቦቻቸው እናገናኛቸው አስክሬናቸው በደጀን ሪፈራል ሆስፒታል ይገኛል…” ሲል ይነበባል። ልጥፉ በሌሎች የተለያዩ የፌስቡክ ግሩፖች ውስጥ እየተሰራጨ እና በብዙ የፌስቡክ ተጠቃሚዎች የተጋራ ይገኛል። ሆኖም ሀቅቼክ ባደረገው ምርመራ በምስሉ ትክክለኛ ያለመሆን እና በልጥፉ ላይ በተገለፁት ማስረጃዎች ምክንያት ልጥፉ ሀሰት መሆኑን አረጋግጧል.

በዓለም ላይ ከፍተኛ የመኪና አደጋዎች ካሉባቸው አገሮች መካከል አንዷ ኢትዮጵያ እንደሆነች የሚታወቅ ነው። ባለፈው የበጀት ዓመት (2012 ዓ.ም) በመላው አገሪቱ በትራፊክ አደጋ የ4,133 ሰዎች ህይወት ማለፉም የሚታወቅ ነው። ስለዚህም አማራ ክልልንም ጨምሮ በመላው የሀገሪቱ ክፍሎች የትራፊክ አደጋ ከባድ እና አሳሳቢ ችግር መሆኑ እርግጥ ነው።

ሆኖም አዲስ ዘይቤ የአማራ ክልል መንገድና ትራንስፖርት ቢሮ የህዝብ ግንኙነት ባለሙያ አናግራ በ13 ጥር 2013 ዓ.ም በደጀን ወረዳ 39 ሰዎችን የገደለ የመኪና አደጋ አለመኖሩ አረጋግጣለች። የህዝብ ግንኙነት ባለሙያው “መረጃው በፍፁም ከእውነት የራቀ ነው” ሲሉም አረጋግጠዋል። ይህ በእንዲህ እንዳለ በፌስቡክ ልጥፉ ላይ የሟቾቹ አስከሬን በደጀን ሪፈራል ሆስፒታል ውስጥ እንደሚገኝ የተገልፀ ቢሆንም በወረዳው ሪፈራል ሆስፒታል እንደሌለ እና በአቅራቢው ያለው ሪፈራል ሆስፒታል የሚገኘው ከደጀን በ61.5 ኪ.ሜ ርቀት በምትገኘው ደብረ ማርቆስ ከተማ መሆኑን ለማረጋግጥ ተችሏል።

በተጨማሪም ሪቨርስ ኢሜጅ የተባለ የምስል ማጣሪያ እንደሚያሳየው መረጃውን ለመደገፍ ጥቅም ላይ የዋለው ምስል የተነሳው በ8 መጋቢት 2011 ዓ.ም የኢትዮጵያ አየር መንገድ ንብረት የሆነው ቦይንግ 737 ማክስ 8 (Boeing 737 MAX 8) አውሮፕላን በተከሰከስ ወቅት ለአደጋው ሰለባዎች በተደረገው የቀብር ሥነ ሥርዓት ላይ መሆኑን ያሳያል። አደጋው የተከሰተው 1 መጋቢት 2011 ዓ.ም ላይ አውሮፕላኑ ወደ ኬንያ ናይሮቢ ለማቅናት እንደተነሳ ብዙም ሳይቆይ ሲሆን ተሳፍረው የነበሩ 157 ሰዎች ህይወታቸው ማለፉ የሚታወስ ነው።

በመጨረሻም ሀቅቼክ ጉዳዩን መርምሮ በአማራ ክልል በደጀን ወረዳ በደረሰ የመኪና አደጋ የ39 ሰዎች ህይወት ማለፉን እና የሟቾች አስከሬን በደጀን ሪፈራል ሆስፒታል እንደሚግኝ የሚገልፀው የፌስቡክ ልጥፍ ትክክለኛ ያልሆነ እና ሀሰት መሆኑን አረጋግጧል።

 

አጣሪ፡ ርሆቦት አያሌው

ተርጓሚ፡ ርሆቦት አያሌው

አርታኢ፡ ብሩክ ነጋሽ

ይህ ፅሑፍ በአዲስ ዘይቤ የምርምርና ተቋም ግንባታ ቢሮ (Addis Zeybe Research & Development Department) በሚመራው ፤ ሀቅቼክ የተዘጋጀ ሲሆን ሀቅቼክ በአምስት ቋንቋዎች (አማርኛ፣ ኦሮምኛ፣ ትግርኛ፣ ሶማልኛ እና እንግሊዘኛ ቋንቋዎች) እየተዘጋጀ የሚቀርብ የተለያዩ መረጃዎችን ሀቅነት የሚመረምር የአዲስ ዘይቤ መርሀ ግብር ነው። 

 

Exit mobile version