ሀሰት፡ ምስሉ በሰሜኑ የኢትዮጵያ ክፍል ባለው ግጭት ምክንያት የተቃጠለ መኪናን አያሳይም

ከ140,000 በላይ ተከታይ ያለው የፌስቡክ ገጽ “የኢትዮጵያ መከላከያ ሰራዊት ድሮኖችን በመጠቀም የአየር ላይ ጥቃቶችን አካሄደ” በማለት አንድ ልጥፍ አጋርቷል።  ይህን ጽሁፉ በሰሜኑ የአገሪቷ ክፍል ያለውን ግጭት የሚያሳይ በማለት የሚቃጠል መኪናን አያይዞ ለጥፏል። ይህ ጽሁፍ ለንባብ እስከበቃበት ጊዜ ድረስ ይህ ልጥፍ ከ 55 ጊዜ በላይ ተጋርቷል። ነገር ግን ይህ ምስል በሰሜኑ የሃገሪቷ ክፍል በመከላከያ ሰራዊት የተወሰደን የአየር ላይ የድሮን ጥቃት ስለማያሳይ ሀሰት ነው።

የሕውሃት ሃይሎች በሰሜን ዕዝ የሚገኘውን ሰራዊት ካጠቁ በኋላ በፌደራሉ መንግስት እና በሕውሃት ሀይሎች መካከል የሚካሄደው ጦርነት ጥቅምት 24 ፣ 2013 ዓ.ም ጀምሮ እስከአሁን እንደቀጠለ ነው።

በሰኔ 2013 ዓ.ም መጨረሻ የፌደራሉ መንግስት ከክልሉ ጊዜያዊ አስተዳደር በቀረበለት ጥያቄ መሰረት የአንድ ወገን የተኩስ አቁም ስምምነት በማድረግ የመከላከያ እና የክልል ልዩ ሃይሎችን ከክልሉ ሙሉ በሙሉ አስወጣ። የፌደራሉ መንግስት ከክልሉ ለቆ ከወጣ በኋላ የሕውሃት ሃይሎች ራሳቸውን በማጠናከር እና ወደ አማራ እና አፋር ክልል አጎራባች አካባቢዎች ጥቃት በመፈጸም ግጭቱ እየተስፋፋ ሄዷል። ይህን ተከትሎም በፌደራል መንግስቱ የሚካሄዱ አዳዲስ የወታደራዊ እርምጃዎች እና የመልሶ ማጥቃት ሪፖርቶች በብዛት እየወጡ ይገኛሉ። የሕውሃት ቃል አቀባይ የሆነው አቶ ጌታቸው ረዳ የኢትዮጵያ መከላከያ ሰራዊት ከአማራ እና አፋር ክልል ልዩ ሃይሎች ጋር በመሆን የአየር እና የምድር ጥቃቶች እያደረጉባቸው እንደሆነ አረጋግጧል።

ሆኖም በጉግል ሪቨርስ ኢሜጅ የተገላቢጦሽ የምስል ፍለጋ ከላይ የተያያዘው ምስል በሰሜኑ የሃገሪቷ ክፍል የደረሰውን የመኪና ቃጠሎ እንደማያሳይ ለማረጋገጥ ተችሏል። ምስሉ ከዚህ ቀደም africanews.com በሚባል አንድ አፍሪካዊ እና አለማአቀፋዊ የሆኑ ዜናዎችን በሚያቀርብ የሚዲያ ተቋም “ለተቃውሞ በወጡ ሰዎች የዳንጎቴ ፋብሪካ ጥቃት ደረሰበት” በማለት ከአንድ ዜና ጋር ተያይዞ ተለቆ ነበር። መስከረም 24 ፣ 2009 ዓ.ም በኢሬቻ ክብረ በዓል ወቅት በኦሮሚያ ክልል አንዳንድ አካባቢዎች በደረሰው ግጭት ላይ ባለቤትነታቸው የዳንጎቴ ሲሚንቶ የሆኑ የተለያዩ መኪኖች እና ማሽነሪዎች አዳ በርጋ የሚባል አከባቢ ሲቃጠሉ ውድ የሆነው የሰው ህይወት እና ብዙ የህዝብ መገልገያ የሆኑ ተቋማት ወድመዋል። 

ናይጀሪያዊው የቢዝነስ ሰው አሊኮ ዳንጎቴ በስፋት በሲሚንቶ ኢንደስትሪው ዘርፍ ላይ ኢንቨስት በማድረግ የሚታወቅ ሲሆን ዳንጎቴ ሲሚንቶ ፋብሪካ በአፍሪካ ከሚገኙ ትልልቅ የሲሚንቶ ፋብሪካዎች አንዱ ነው። ፋብሪካዎቹም ኢትዮጵያን ጨምሮ በናይጄሪያ ፣ ሴኔጋል ፣ ጋና ፣ ካሜሮን ፣ ዛምቢያ ፣ ታንዛኒያ እና ሳውዝ አፍሪካ ውስጥ ይገኛሉ። 

በሰሜኑ የሃገሪቱ ክፍል በትግራይ ካለው ግጭት ጋር ተያይዞ ብዙ ምስሎች እየወጡ ቢሆንም በልጥፉ ላይ ለማሳየት የተሞከረው ምስል ግን አሁን በሰሜኑ ካለው ግጭት ጋር ምንም አይነት ግንኙነት ስለሌለው ምስሉ ሀሰት ነው።   

ሀሰት:ተንቀሳቃሽ ምስሉ አርቲስት ቴዎድሮስ ካሳሁን በጦላይ ማሰልጠኛ ተገኝቶ ወታደሮችን ሲያዝናና አያሳይም

በዩቱዩብ ፣ በድህረ ገጽ እንዲሁም ከ484,227 በላይ ተከታይ ባለው በፌስቡክ ገጽ ላይ  “ቴዲ አፍሮ ሰራዊቱን ስርፕራይዝ አደረገ” በማለት አንድ ተንቀሳቃሽ ምስልን አጋርቷል። 

ይህ ጽሁፍ ለንባብ እስከበቃበት ጊዜ ድረስ ተንቀሳቃሽ ምስሉ በድህረ ገጹ ላይ ከ20,900 ጊዜ በላይ የታየ ሲሆን፣ የፌስቡክ ልጥፉ ደግሞ 1,700 ያህል ሪአክሽን አግኝቶ ከ60 ጊዜ በላይ ተጋርቷል። ከድህረ ገጹ እና ከፌስቡክ ልጥፉ አስቀድሞ ተንቀሳቃሽ ምስሉ የተለቀቀው በመስከረም 6 ፣ 2014 ዓ.ም በዩቱዩብ ቻናሉ ላይ ሲሆን ከ1,120 በላይ ዕይታም አግኝቷል። 

ይሁን እንጂ ፣ የፌስቡክ ልጥፉ አርቲስት ቴዎድሮስ ካሳሁን በጦላይ ማሰልጠኛ ማዕከል ተገኝቶ ወታድሮችን ሲያዝናና ስለማያሳይ ልጥፉ ሀሰት ነው።

 

ከህዳር 2012 ዓ.ም ጀምሮ የትግራይ ህዝብ ነጻ አውጪ ግምባር(ትህነግ) ሃይሎች በሰሜኑ የኢትዮጵያ ክፍል ከኢትዮጵያ የፌደራሉ መንግስት ጋር ጦርነት ላይ ናቸው። የተለያዩ የሃገር ውስጥ ሚዲያዎች በኢትዮጵያ መከላከያ ሰራዊት የስልጠና ካምፖች ውስጥ በጣም ብዙ አዳዲስ ምልምል ሰልጣኝ ወጣቶች እየተቀላቀሉ እንደሆነ ዘግበዋል። ይህንንም በማስመልከት አርቲስቶች እንዲሁም ትላልቅ የመንግስት ባለስልጣናትን ጨምሮ ለአዳዲስ ምልምል እና ተመራቂ ወታደሮች ካምፖቻቸው ድረስ እንዲሁም የጦር ግምባሮች ድረስ በመሄድ ጎብኝተው አነቃቅተው እና አበረታተው ተመልሰዋል ተብሎ ሲዘገብ ሰንብቷል።

ቴዎድሮስ ካሳሁን ወይም በቅጽል ስሙ ቴዲ አፍሮ በኢትዮጵያ እና ኤርትራ ብዙ አድናቂዎች ያሉት ሙዚቀኛ ሲሆን “ኢትዮጵያ” የሚለው 5ተኛው አልበሙ በግንቦት 12 ፣ 2009 ዓ.ም በአለም የቢልቦርድ ሰንጠረዥን ተቆጣጥሮ ነበር። 

ይህን ተከትሎ የተሰራጨው ተንቀሳቃሽ ምስል የፊትለፊት ምስል  የተቀነባባረ እንደሆነ ለማውቅ ተችሏል። ምስሉ የድምጻዊውን ፊት በተሰበሰቡ የሰራዊት አባላቶች መካከል በማቀናበር የተሰራ ሲሆን ከዚያም ባላፈ ግን የተንቀሳቃሽ ምስሉ ይዘት በውስጡ የቴዎድሮስ ካሳሁን እና የሰራዊቱ የተለያዩ ምስሎች ለየብቻ የሚያሳይ ነው።  

ከዚህም በተጨማሪ የድምጻዊው ማናጀር ከሆኑትን አቶ ጌታቸው ማንጉዳይ በስልክ ባደረግነው ቆይታ መረጃው ፍጹም ሀሰት እንደሆነ እና አርቲስት ቴዎድሮስ ካሳሁንም በጦላይ ማሰልጠኛ እንዳልተገኘ አስረድተውናል።    

ስለዚህ በተለያዩ ማህበራዊ ሚዲያዎች ላይ አርቲስት ቴዎድሮስ ካሳሁን በጦላይ ማሰልጠኛ ተገኝቶ ሰራዊቱን አዝናና የሚለው መረጃ ሀሰት መሆኑ ትርጋግጧል።  

              

 

ሀሰት: ምስሎቹ የኢትዮጵያ መከላከያ ሰራዊት አዳዲስ ወታደራዊ ድሮኖችን መታጠቁን አያሳዩም

 “ደስ የሚል ዜና፤ መከላከያ VTOL ድሮን ታጠቀ” የሚል  የፌስቡክ ልጥፍ መስከረም 27፣ 2014 ዓ.ም ትጋርቷል። መረጃውን ያሰራጨው ገፅ ከ69,000 በላይ ተከታዮች ያሉት ሲሆን በልጥፉ ላይ አያይዞም “እነዚህ ድሮኖች ከራዳር ውጪ በመሆን ሞርታር ማስወንጨፍ የሚችሉ እና የጠላትን አቅጣጫ በማነፍነፍ ጥቃት ማድረስ የሚችሉ ድንቅ የቴክኖሎጂ ውጤት ናቸው” ሲል ይነበባል።

ይሁን እንጂ ልጥፉ ላይ ያለው መረጃ የተዛባ በመሆኑ እና ከልጥፉ ጋር የተያያዘው ምስል የተሳሳተ በመሆኑ ልጥፉ ሀሰት መሆኑ ተረጋግጧል።

በትግራይ ክልል ያለው ግጭት መቀጠሉን ተከትሎ የኢትዮጵያ መከላከያ ሰራዊት አየር ሀየሉ ዘመናዊ ድሮኖችን መታጠቁን እና በጦርነቱ ላይ መጠቀሙን አስታውቋል። ከዚህም ጋር ተያይዞ የኢትዮጵያ መከላከያ ሰራዊት የኢራን ድሮኖችን ታጥቋል የሚሉ የተለያዩ መረጃዎች ሲወጡ ቆይተዋል።

በልጥፉ የተጠቀሱት VTOL ድሮኖች ምንድን ናቸው?

VTOL የሚለው ቃል ሲተነተን (Vertical take-off and landing) ወይም ወደ ከፍታ በቀጥታ ተነስተው ማረፍ የሚችሉ ማለት ነው።

እነዚህ ድሮኖች ሰው አልባ ሲሆኑ እንደ ሄሊኮፕተር አቀባዊ በሆነ አቅጣጫ ተነስተው አኮብኩበው መልሰው ወደምድር መመለስ የሚችሉ ናቸው። ከVTOL ሰው አልባ ድሮኖች መካከል መልቲኮፕተር (Multicopter) የሚባሉት አንዱ ናቸው።

መልቲኮፕተር (Multicopter) የሚባሉት እነዚህ የድሮን አይነቶች ቀለል ያሉ የድሮን አይነቶች ሲሆኑ የግፊት ሞተራቸውን በመጠቀም ፍጥነታቸውን በመጨመር እና በመቀነስ መቆጣጠር ይቻላል።

VTOL የሚባሉት የድሮን አይነቶች በስፋት ጥቅም ላይ የሚውሉት በማዕድን ቁፋሮ፤ በኮንስትራክሽን ስራ፣ በነዳጅ ማምረቻ ድርጅቶች፤ ለአከባቢ ጥናት እና ካርታ ስራ እንዲሁም ለደህንነት እና መከላከያ ስራዎች ነው። በዚህም የሰፋፊ ቦታዎችን ምስል ለመውሰድ፤ መልክዓ ምድራዊ መረጃዎችን ለመሰብሰብ እንዲሁም የአየር ላይ ክትትል ወይም ስለላ ለማድረግ ይጠቅማሉ። በአጠቃላይ እነዚህ ሰው አልባ ድሮኖች በአይነቶቻቸው መሰረት ለተለያየ አላማ ይውላሉ።

ከላይ በቀረበው ጥቂት ገለፃ መሰረት እነዚህ VTOL ድሮኖች በፌስቡክ ልጥፉ እንደተገለፀው ከራዳር ውጪ በመሆን ሞርታሮችን ማስወንጨፍ የሚችሉ እንዳልሆኑ ተረድተናል። ይህም የፌስቡክ ልጥፉን ሀሰት ያደርገዋል።

በተጨማሪም በፌስቡክ ልጥፉ ላይ በተያያዙት ምስሎች ሪቨርስ ኢሜጅ የተገላቢጦሽ የምስል ፍለጋ መሰረት ምስሎቹ ለመጀመሪያ ጊዜ የተለቀቁት በሕዳር 15፣ 2011 ዓ.ም ዢኑዋ (Xinhua) በተባለ የዜና አውታር ላይ ነበር። የዜና ዘገባው የኢትዮጵያ መከላከያ ሰራዊት አባላት በቻይና ቤጂንግ በተዘጋጀው የድሮን ማብረር ስልጠና ላይ እንደተሳተፉ ዘግቧል።

ከዚህም ባሻገር የልጥፉን ሀሰተኛነት ከሚያሳዩት ውስጥ የኢትዮጵያ መከላከያ ሰራዊት አባላቱ የለበሱት ልብስ አሁን የተቀየረው እና ከ2012 ዓ.ም በፊት ሰራዊቱ ሲጠቀምበት የነበረው የደንብ ልብስ መሆኑ ነው።

ስለሆነም ከላይ በተጠቀሱት ምክንያቶች መሰረት የኢትዮጵያ መከላከያ ሰራዊት VTOL የተባሉ ከራዳር ውጪ በመሆን ሞርታሮችን መተኮስ የሚችሉ ድሮኖችን ታጥቋል የሚለው መረጃ ሀሰት መሆኑ ተረጋግጧል።

ሀሰት፡ምስሉ አሜሪካ በቅርቡ ለኢትዮጵያ የሰጠችውን የወታደራዊ እርዳታን አያሳይም

የአሜሪካ መንግስት በቅርቡ ለኢትዮጵያ መከላከያ ሰራዊት 2.9 ሚሊዮን ዶላር የሚገመት ወታደራዊ ቁሳቁሶች በእርዳታ መልክ ድጋፍ አደረገች በማለት አንድ የፌስቡክ ልጥፍ መስከረም 26፣ 2014 ዓ.ም አጋርቶ ነበር። ልጥፉ የተሽከርካሪ መኪኖችን የሚያሳይ ሁለት ምስሎችን አያይዟል። ድጋፉ የተደረገው ኢትዮጵያ በሶማሊያ አካባቢ የሚንቀሳቀሰውን የአልሸባብን እና ሌሎች የአሸባሪ ቡድኖችን ለመከላከል ለሚደረገው ጥረት መሆኑን አያይዞ ጽፏል።   

ይሁን እንጂ ምስሎቹ አሜሪካ በቅርቡ ለኢትዮጵያ መከላከያ ሰራዊት ያደረገችውን ድጋፍ እንደማያሳዩ ተረጋግጧል። በመሆኑም ልጥፉ ሀሰት ነው።  

የአሜሪካ መንግሰት ለኢትዮጵያ እርዳታ ከሚያደርጉ አካላት በቀዳሚነት ይጠቀሳል። ኢትዮጵያ ለአሜሪካ በንጉሳዊ አገዛዝ ጊዜ ፤ በቀዝቃዛው ጦርነት ጊዜ እንዲሁም ከመስከረም 11 ጥቃት በኃላ ዋና ስትራቴጂካዊ አጋር ሆና ቆይታለች። ኢትዮጵያም አሜሪካ በሶማሊያ የሚገኘውን አልሸባብን እና አሸባሪ ድርጅቶችን እንቅስቃሴ በመቆጣጠር በምታደርገው እርምጃ ዋነኛ አጋር ነች።

ይሁን እንጂ የተለጠፉት ምስሎች አሜሪካ በቅርቡ ለኢትዮጵያ የሰጠችውን የወታደራዊ ቁሳቁሶች አያሳይም። ምስሉ የሚያሳየው ከአመት በፊት አሜሪካ ለኢትዮጵያ ያደረገችውን የወታደራዊ መገልገያ መሳሪያዎች ድጋፍ ነው። 

በምስሉ ላይ የሚታዩት መኪኖች እና አምቡላንሶች በመስከረም 19፣ 2013 ዓ.ም በአሜሪካ የመከላከያ ዲፓርትመንት በኩል ለኢትዮጵያ መከላከያ ሰራዊት የተበረከተ ነበር። 2.9 ሚልዮን ዶላር የሚያወጣው ይህ ወታደራዊ ድጋፍ በቀጠናው አካባቢ በአልሸባብ አና በሌሎች አሸባሪ ድርጅቶች አማካኝነት በኢትዮጵያ ላይ ሊቃጡ የሚችሉ ጥቃቶችን ለመከላከል ታስቦ ነው። እርዳታውም አምቡላንሶችን ፣ ላንድ ክሩዘር መኪኖችን ፣ ከባድ ጭነት መኪኖችን የተለያዩ መሳሪያዎችን እና ወታደራዊ ስልጠናዎችን ያካተተ ነበር። 

እነዚህ ምስሎች መስከረም 19 ፣ 2013 ዓ.ም መቀመጫውን በተባበሩት አረብ ኤሚሬትስ ባደረገ አል-አይን በተባለ የሚዲያ ተቋም ታትመው ነበር። ምስሉን አና ጽሁፉን ለመመልከት እዚህ ጋር ይጫኑ ። 

ምንም እንኳን ኢትዮጵያ ከአሜሪካ መንግስት የተለያዩ ወታደራዊ ድጋፎችን አግኝታ የነበር ቢሆንም እነዚህ ምስሎች ግን ኢትዮጵያ በቅርቡ ከአሜሪካ ያገኘችውን ወታደራዊ ድጋፎችን አያሳይም።ስለዚህ ሀቅ-ቼክ ልጥፉን መርምሮ እና አገናዝቦ ሀሰት ብሎታል።

ሀሰት፡ ምስሉ የኢትዮጵያ አየር ኃይል በግዳጅ ላይ መሆኑን አያሳይም

ከ100 ሺህ በላይ ተከታይ ያለው የፌስቡክ ገጽ “የኢትዮጵያ አየር ሃይል በግዳጅ ላይ!!” በማለት ሁለት ተመሳሳይ ምስሎችን በመስከረም 2 ፣ 2014 ዓ.ም አጋርቷል። ይህ ጽሁፍ እስከተጻፈበት ጊዜ ድረስ የተለያዩ የፌስቡክ ግሩፖችን ጨምሮ ልጥፉ ከ160 ጊዜ በላይ ተጋርቷል። ይሁን እንጂ ሃቅቼክ ምስሎቹን አጣርቶ ሀሰት መሆኑን አረጋግጧል።

ከህዳር 2012 ዓ.ም አንስቶ በፌደራል መንግስቱ እና በህወሃት መካከል በተከሰተው ግጭት ምክንያት በማህበራዊ ድህረ ገጾች ላይ ሲዘዋወሩ ከነበሩ ልጥፎች መካከል ይህ አንዱ ነው። ጦርነቱ የተጀመረው የሕውሃት ሃይሎች በሰሜን ዕዝ ላይ ጥቃት ማድረሳቸውን ተከትሎ የፌደራል መንግስት ራሱን የመከላከል እርምጃ በማለት የመልሶ ማጥቃት እርምጃ በመወሰዱ ነው። ግጭቱ መቀጠሉን ተከትሎ የኢትዮጵያ መከላከያ ሰራዊት ድሮኖችን መጠቀም መጀመሩን እንዲሁም የመከላከያ ሰራዊቱ አየር ሃይል ዘመናዊ የጦር ድሮኖችን እየተጠቀመ መሆኑን አስታውቋል። ግጭቱ ባለባቸው አካባቢዎችም የወታደራዊ እርምጃዎች እንደቀጠሉ ይገኛሉ።

ሆኖም የጉግል ሪቨርስ ኢሜጅ የተገላቢጦሽ ምስል ፍለጋ እንደሚያሳየው ምስሉ ሰኔ 8 ፣ 2009 ዓ.ም በተለቀቀ የዩቲዩብ ቪዲዮ ላይ ይገኛል። ቪዲዮው “የኔቶ ሃይሎች በምን ያህል ፍጥነት ግዳጃቸውን ይፈጽማሉ? የኔቶ ሃይሎች በሮማኒያ  ወታደራዊ ልምምድ ሲያደርጉ” የሚል አርዕስት ያለው ሲሆን ከ15 ሚሊዮን ጊዜ በላይ ታይቷል።

ተንቀሳቃሽ ምስሉ የተቀረጸው በሮማኒያ ውስጥ “Exercise noble jump 17” በተባለ የወታደራዊ ልምምድ ወቅት ነው።

ምንም እንኳን የኢትዮጵያ መከላከያ ሰራዊት እና አየር ሃይል በሕውሃት ሃይሎች ላይ እርምጃ እየወሰዱ መሆኑን የተለያዩ መረጃዎች ቢያሳዩም ይህ ምስል የኢትዮጵያ አየር ሃይል እርምጃ ሲወስድ አያሳይም። ስለሆነም በፌስቡክ ገጹ ጥቅም ላይ የዋለው ምስል ሀሰት ነው።  

ሀሰት፡ ተንቀሳቃሽ ምስሉ በአፋር ግምባር የተደረገን ወታደራዊ እርምጃ አያሳይም

መስከረም 7 ፣ 2014 ዓ.ም ከ 35ሺህ በላይ ተከታይ ባለው የፌስቡክ ገጽ ላይ አንድ ተንቀሳቃሽ ምስል  ተሰራጭቷል። ከተንቀሳቃሽ ምስሉም ጋር  “የአፋር ጀግኖች እና የመከላከያ ሰራዊት የሕውሃት ሃይሎችን ሲያባርሩ የሚያሳይ ተንቀሳቃሽ ምስል ደርሶናል…” የሚል ጽሁፍ ተያይዟል። ይህ ጽሁፍ እስከተጻፈበት ጊዜ ድረስ ልጥፉ ከ 3800 ጊዜ በላይ ተጋርቷል።

ይሁን እንጂ በፌስቡክ ገጹ ላይ የተለቀቀው ተንቀሳቃሽ ምስል በአፋር ግምባር የተደረገን ወታደራዊ እርምጃ እንደማያሳይ እና ልጥፉ ሀሰት እንደሆነ ተረጋግጧል።

በጥቅምት 2013 ዓ.ም ሕውሃት በሰሜን ዕዝ የኢትዮጵያ መከላከያ ሰራዊት ላይ የፈጸመውን ጥቃት ተከትሎ በኢትዮጵያ ፌደራል መንግስት እና ሕውሃት ጦርነት መጀመሩ ይታወሳል። ጦርነቱ ከተጀመረ ከሶስት ሳምንታት በኋላ የፌደራሉ መንግስት መቀሌን ጨምሮ አብዛኛውን የክልሉን ከተሞች ተቆጣጥሯል። ነገር ግን ስምንት ወራትን ከፈጀው ጦርነት በኋላ የፌደራሉ መንግስት የተናጥል የተኩስ አቁም ስምምነትን በማወጅ በክልሉ የነበሩትን የመከላከያ እና የክልል ልዩ ሃይሎችን ከክልሉ እና ከአካባቢው አስውጥቷል።

በ ሰኔ 21 2013 ዓ.ም የፌደራል መንግስቱ የተናጥል የተኩስ አቁሙን ስምምነት  ይፋ አድርጎ ከክልሉ ለቆ መውጣት ከጀመረበት ጊዜ አንስቶ የሕውሃት ሃይሎች የክልሉ ዋና ከተማ የሆነችውን መቀሌን መቆጣጠር ችለዋል። በአሁኑ ሰዓት ግጭቱ ወደ አማራ እና አፋር ክልል አጎራባች አካባቢዎች ተስፋፍቷል። 

ይህ የፌስቡክ ልጥፍም ይህን በክልሉ እና አካባቢው ባለው ሁኔታ ላይ ተመስርቶ ሲዘዋወር የነበረ ነው።  

ይሁን እንጂ ፣ ከተንቀሳቃሽ ምስሉ ላይ በተወሰደ ምስል የጎግል ሪቨርስ ኢሜጅ የተገላቢጦሽ ምስል ፍለጋ እንደሚያሳየው ተንቀሳቃሽ ምስሉ በኢትዮጵያ ውስጥ ወይም አሁን በሰሜኑ የሃገሪቷ ክፍል ካለው ግጭት ጋር ምንም ግንኙነት የለውም። ተንቀሳቃሽ ምስሉ የተወሰደው ግንቦት 21 2013 በሳውዲ አረብያ ድንበር ላይ ጂዛን አክሲስ ተብላ በምትጠራው አካባቢ በሳውዲ እና በየመን ጦር መካከል የተደረገን ጦርነት የሚያሳይ ነው።  

ተንቀሳቃሽ ምስሉ 

ስለዚህ መረጃውን ስናጣራ ባገኘነው መረጃ መሰረት በአፋር አካባቢ ከሕውሃት ሃይሎች ጋር የተደረገ ጦርነት ያሳያል ተብሎ የተስራጨው ተንቀሳቃሽ ምስል ሀሰት ነው።

ትክክል፡ ደቡብ ግሎባል ባንክ ለቴሌግራም ተጠቃሚዎች ሽልማቶችን አቅርቧል

ከዚህ በፊት ሃቅ ቼክ ባስነበበው ጽሁፍ ፣ በአንዳንድ የቴሌግራም ቻናሎችና ግሩፖች ላይ ባንኮች አጓጊ ሽልማቶችን አዘጋጅተዋል በማለት ቻናሎቹን እንዲቀላቀሉ እና ማስፈንጠሪያዎቹን ለብዙ ሰዎች እንዲያጋሩ በማድረግ እንደሚያታልሉ አጋርቷል ።

የገጻችን ተከታታዮች ባቀረቡልን ጥያቄ መሰረት በቴሌግራም ላይ ሽልማቶችን ያቀረበ እና ተመሳሳይ ይዘት ያለውን ቻናል አጣርተናል። ይህ በደቡብ ግሎባል ባንክ ስም የተከፈተው ቻናል ባስተላለፈው መልዕክት “ደቡብ ግሎባል ባንክ አዲሱን ዓመት ምክንያት በማድረግ እስከ መስከረም 30/2014 ዓ.ም የሚቆይ የቴሌግራም ገፅ ማነቃቂያ የሚሆን ሽልማቶች አዘጋጅቷል” ሲል ይነበባል።

ከዚህ በፊት ከነበሩት የቴሌግራም ማላለሎች በተለየ ሃቅቼክ መልዕክቶቹ በትክክልም የተላኩት ከባንኩ መሆኑን አረጋግጧል።   

        

ልጥፉ አራት የተለያዩ የሽልማት አይነቶችን አስቀምጧል። የመጀመሪያው ሽልማት ለ ሶስት እድለኛ አሸናፊዎች ዘመናዊ የሞባይል ቀፎዎችን ሲያስቀምጥ ካሉት ሌሎች የሽልማት አይነቶች መካካል ለአንድ ወር የሚቆይ የ ዲኤስቲቪ ዲኮደር ፓኬጅ ፣ የባንኩ የጎልደን ሜምበርሺፕ አካውንት እንዲሁም የ100 ብር የሞባይል ካርዶች ይገኙበታል።

ታድያ ይህን እድል መጠቀም የሚፈልጉ ሰዎች በመጀምሪያ ቻናሉን መቀላቀል ሲኖርባቸው በመቀጠልም ማስፈንጠሪያውን ለ50 ሰዎች በማጋራት ቻናሉን እንዲቀላቀሉ ማድረግ እንደሚኖርባቸው ምልክቱ ያስነብባል።

ይህን ነገር ለማጣራት ባደረግነው ጥረት መሰረት የደቡብ ግሎባል ባንክ ማርኬቲንግ እና ብራንድ ሲንየር ኦፊሰር የሆኑትን አቶ ተመስገን ፍቃዱን አነጋግርን “ የቴሌግራም ቻናሉ ትክክለኛ መሆኑን እና ለቴሌግራም ተጠቃሚዎችም የ100 ብር የሞባይል ካርድ ፣ የሞባይል ቀፎዎችን እና የዲኤስቲቪ ዲኮደሮችን እየሸለምን ነው” በማለት ገልጸውልናል።

በተጨማሪም የባንኩን የማርኬቲንግ እና የብራንድ ኦፊሰር የሆኑትን አቶ አስናቀ ወርቁ ሽልማቱ ትክክለኛ መሆኑን አረጋግጠውልናል። ወደተለያዩ የባንኩ ቅርንጫፎች በመደወል የመረጃውን ትክክለኛነት አረጋግጠናል።

ስለዚህ በደቡብ ግሎባል ባንክ ስም የቀረበው የአዲስ አመት የቴሌግራም መልዕክት ትክክል መሆኑን እንግልጻለን።           

ሀሰት፡ ምስሉ በቅርቡ በመቀሌ ከተማ የተደረገን የከባድ መሳሪያ ጥቃት አያሳይም

ጳጉሜ 3 2013 ዓ.ም ከ11 ሺህ በላይ ተከታይ ያለው የፌስቡክ ገጽ  በከባድ መሳሪያ የታገዘ የተኩስ ድምጽ በመቀሌ ከተማ ተሰምቷል በማለት አንድ ምስል አጋርቷል።

በተጨማሪም ልጥፉ “ከመቀሌ 49 ኪ.ሜ  ርቃ በአፋር ክልል በምትገኘው እና  አብላ ተብላ የምትጠራው ከተማ ድረስ የተኩስ ድምጽ ይሰማ እንደነበረ ጽፏል”።

ይሁን እንጂ ምስሉ በቅርቡ በከተማዋ የተከሰተ ሁኔታን የሚያሳይ ባለመሆኑ ሀሰት ነው።

በጥቅምት 2013 ዓ.ም ሕውሃት በሰሜን ዕዝ የኢትዮጵያ መከላከያ ሰራዊት ላይ የፈጸመውን ጥቃት ተከትሎ በኢትዮጵያ ፌደራል መንግስት እና ሕውሃት ጦርነት መጀመሩ ይታወሳል። ጦርነቱ ከተጀመረ ከሶስት ሳምንታት በኋላ የፌደራሉ መንግስት መቀሌን ጨምሮ አብዛኛውን የክልሉን ከተሞች ተቆጣጥሯል። ነገር ግን ስምንት ወራትን ከፈጀው ጦርነት በኋላ የፌደራሉ መንግስት የተናጥል የተኩስ አቁም ስምምነትን በማወጅ በክልሉ የነበሩትን የመከላከያ እና የክልል ልዩ ሃይሎችን ከክልሉ እና ከአካባቢው አስውጥቷል።

በ ሰኔ 21 2013 ዓ.ም የፌደራል መንግስቱ የተናጥል የተኩስ አቁሙን ስምምነት  ይፋ አድርጎ ከክልሉ ለቆ መውጣት ከጀመረበት ጊዜ አንስቶ የሕውሃት ሃይሎች የክልሉ ዋና ከተማ የሆነችውን መቀሌን መቆጣጠር ችለዋል። በአሁኑ ሰዓት ግጭቱ ወደ አማራ እና አፋር ክልል አጎራባች አካባቢዎች ተስፋፍቷል። 

ይህ በእንዲህ እንዳለ የፌስቡክ ልጥፉ ከባድ መሳሪያ ጥቃት የሚመስል ፍንዳታን የሚያሳይ ምስልን አጋርቷል።

ሆኖም ሪቨርስ ኢሜጅ የተባለው የተገላቢጦሽ የምስል ፍለጋ እንደሚያሳየው ምስሉ ለመጀመሪያ ጊዜ የተለቀቀው ሕዳር 7 2013 ዓ.ም በቪኦኤ አማርኛ ድህረ-ገጽ ላይ ነው። ምስሉም የተለቀቀው ድህረ-ገጹ በትግራይ ወቅታዊ ሁኔታ ላይ ባወጣው ዘገባ ላይ ነበር። ዘገባውም ባሰፈረው ጽሁፍ በመቀሌ ከተማ በደረሰ የአየር ጥቃት አንድ ሰው ላይ ጉዳት መድረሱንና የመኖሪያ ቤቶች መፍረሳቸውን አመላክቷል።

ስለዚህ በፌስቡክ ልጥፉ የተመለከተው ምስል በቅርቡ በከተማዋ መቀሌ ደረሰ የተባለውን የተኩስ ድምጽ እና በከባድ መሳሪያ የታገዘ ጥቃትን የሚያሳይ ስላልሆነ ምስሉ ሃሰት ነው።   

ከበይነ መረብ ላይ ማጨበርበሮች እራስን መጠበቅ

ሀቅቼክ ግንቦት 2013 ዓ.ም ላይ በኢሜል፣ በማህበራዊ ድር ገፆች እና በመልዕክት መለዋወጫዎች ላይ ሲዘዋወሩ የነበሩ ሀሰተኛ አታላይ መልዕክቶችን አስመልክቶ ማሳሰቢያ ጽፎ ነበር። ከመልዕክቶቹ ጋር የተያያዙት ማስፈንጠሪያዎች (ሊንክ) የተለያዩ ሽልማቶችን ለማግኘት የግል መረጃዎን በቅጽ ላይ እንዲሞሉ የሚጋብዙ ናቸው።

ፊሺንግ (phishing) አንደኛው የሳይበር (የበይነ መረብ) ወንጀል አይነት ሲሆን ሰዎች የግል መረጃዎቻቸውን፣ የባንክ መረጃዎቻቸውን እንዲሁም የይለፍ ቃላቸውን አሳልፈው እንዲሰጡ ታልሞ ትክክለኛ እና ተዓማኒ የሆኑ አካላትን በማስመሰል በኢሜል፣ በስልክ፣ ወይም በአጭር መልዕክት መልክ የሚላኩ መልዕክቶች ናቸው።

ይህን መሰል ማጭበርበሮች እና ማታለያዎች እየተበራከቱ መምጣቱን ተከትሎ ሰወች ምን አይነት ጥንቃቄ ማድረግ እንዳለባቸው ሀቅቼክ እንደሚከተለው ይዳስሳል።  

አብዛኛውን ጊዜ እንደዚህ አይነት አጭበርባሪዎች የሚፈልጉትን የግል መረጃ ለማግኘት የተለያዩ የበይነ መረብ ቅጾችን (online survey) ይጠቀማሉ። ይህ መረጃ የማንነት ስርቆት (identity theft) ለማድረግ ወይም መረጃውን ለሌላ ሶስተኛ አካል ለመሸጥ ሊውል ይችላል። ለማጨበርበር፣ ለመመዝበር እና ጥቃት ለመፈፀም አታላይ ማስፈንጠሪያዎችን (Malicious links) የሚጠቀሙት እነዚህ መልዕክቶች አንደኛው ግባቸው ገንዘብ ማግኘት ነው።

የተበከሉ ማስፈንጠሪያዎችን በመጫን (በመክፈት) ትሮጃን እና ቫይረሶችን የመሳሰሉ ግዑዛን ስልክዎትን ወይም ኮምፒውተርዎትን ይቆጣጠሩታል። በሀሰተኛ ድረ ገፅ ላይ መረጃዎን እንዲያስገቡም ሊገፋፉ ይችላሉ።

የሳይበር ደህንነት ባለሞያ እና በደቡብ ኮሪያ ዶንጉክ ዩኒቨርስቲ የፒኤችዲ እጩ የሆነው ህዝቂያስ ደንገቶ ፊሺንግን በአጭሩ ሲገልጸው “አንድን ተጠቃሚ ለማታለል ወይም የግል መረጃውን ለማግኘት የሚፈጠሩ የሀሰት ድረ ገፆች” ይላቸዋል።

እንደ ህዝቂያስ ማብራሪያ አጨበርባሪዎች የአንድን ትክክለኛ ወይም ተዓማኒ አካል ድረ ገፅ በማስመሰል በሌላ URL አዲስ የተሟላ የድር አድራሻ ይፈጥራሉ። “የግል መረጃዎን (ኢሜል፣ የይለፍ ቃል እና የመሳሰሉትን) ከሰጧቸው በኋላ ለራሳቸው ጥቅም ይጠቀሙበታል” አክሎም “ይህ ሰዎችን ለምጥቃት ቀላሉ መንገድ ነው” ይላል።  

እንደዚህ አይነት ማጨበርበሮችን እንዴት መለየት ይቻላል?

  • የፊሺንግ ወይም የማታለያ መልዕክቶች፤ የሚያውቁትን ወይም የሚያምኑትን ድርጅት ሊመስሉ ወይም ሊያስመስሉ ይችላሉ
  • እውነት መሆናቸውን ለማመን በሚያዳግት መልኩ የተጋነኑ ናቸው፤ ለአይን የሚማርኩ እና ቀልብን የሚገዙ ሆነው ይቀርባሉ
  • ማስፈንጠሪያውን እንዲጫኑ ለማድረግ ሽልማት አለው በማለት ይገፋፋሉ
  • በአብዛኛው አስቸኳይ ናቸው፣ በአፋጣኝ እርምጃ እንዲወስዱ ይጠይቃሉ፣ አንዳንዴም የማብቂያ ሰአት ወይም ገደብ ያስቀምጣሉ
  • የባንክ እና የመሳሰሉትን አካላት ነን በማለት የአገልግሎት ተጠቃሚዎቻቸው መሆንዎትን ይገልፃሉ (ነገር ግን ተጠቃሚ አይደሉም)

እራስን ከእንደዚህ አይነት ማጨበርበሮች እንዴት መጠበቅ ይቻላል?

  • የማስፈንጠሪያውን ወይም የድር አድራሻውን በደንብ መመልከት፤ ከትክክለኛው ድረ ገፅ ጋር ማስተያየት
  • መልዕክቶቹን በጥርጣሬ መመርመር
  • የግል መረጃዎን ከመስጠት መቆጠብ
  • ከመቸኮል እና አፋጣኝ እርምጃ ከመውሰድዎ በፊት ተረጋግቶ ለማጣራት መሞከር
  • ከማያውቁት ምንጭ የሚላኩ ማስፈንጠሪያዎችን በችኮላ አለመጫን
  • አብዛኞቹ አጭበርባሪዎች መረጃዎን ለምን ጥቅም እንደሚያውሉት በግልጽ ሰለማይገልጹ፤ የገፁን የግላዊነት ፖሊሲ መመልከት
  • ስሙ የተጠቀሰውን ድርጅት መጠየቅ እና ከሚመለከተው አካል ማረጋገጥ

ከላይ ከተገለፁት በተጨማሪም ድረገጹ ከHTTP እና HTTPS የፍለጋ ጣቢያ የትኛውን እንደሚጠቀም ማስተያየት እንደሚያስፈልግ ህዝቂያስ ይመክራል። 

HTTPS ከHTTP የሚለየው HTTPS ደህንነቱ የተጠበቀ እና በአሁን ጊዜ ተዓማኒ የሆኑ ትቋማት የሚጠቀሙበት በመሆኑ ነው።

በመጨረሻም  “በአሳሽዎ (browser) ፍለጋ ሲያደርጉ የአድራሻ ማስገቢያው ላይ የተቆለ ቁልፍ ምልክት መኖሩን ያጢኑ። ምልክቱም ድረ ገፁ የሚጠቀመው HTTPS መሆኑን እና ደህንነቱ የተጠበቀ መሆኑን ያሳያል።”  በማለት ባለሞያው ያስረግጣል።

እውን ባንኮች በቴሌግራም ላይ የበዓል ሽልማት አዘጋጅተዋል?

የተለያዩ የቴሌግራም ገፆች የኢትዮጵያ ንግድ ባንክን ፣ አባይ ባንክን እና የአማራ ባንክን ስምና ሎጎ በመጠቀም የተለያዩ መልዕክቶችን ሲያጋሩ ተስተውለዋል። በገፆቹ ውስጥ ያሉት መልዕክቶችም ባንኮቹ ለመጪው የኢትዮጵያ አዲስ ዓመት የቴሌግራም ገፆች እንዲነቃቁ ለባለ ዕድሎች ሽልማት ማዘጋጀታቸውን ይገልፃሉ፡፡

የቴሌግራም ገፆቹም ይህ ፅሁፍ እስከተፃፈበት ጊዜ ድረስ እንደየቅደም ተከተላቸው 52,350 ፣ 7,733 እና 67,480 ተከታዮች አሏቸው፡፡

ሃቅቼክ ልጥፎቹን በመመርመር አታላይ መልዕክቶች መሆናቸውን አረጋግጧል፡፡

         

    

 

 

የመጀመሪያው የቴሌግራም ገፅ “እንኳን ደስ አላቸችሁ የኢትዮጵያ ንግድ ባንክ ሀብት 1.1 ትሪሊየን ትርፍ ምክንያት በማድረግ  የባንካችን ፕሬዝዳንት አቶ አቢ ሳኖ እስከ መስከረም 5 ብቻ የሚቆይ የቴሌግራም ገፅ ማነቃቂያ የሚሆን ሽልማቶች ተዘጋጅቷል።” ካለ በኃላ ለዕድለኞች የሚሸልመውን ዝርዝር ያስቀምጣል፡፡

ሽልማቶቹም “1ኛ” ብሎ ካስቀመጠው  ለ200 እድለኞች ከ300,000 ብር በላይ ዋጋ የሚያወጡ ባለ 3 እግር ተሽከርካሪዎችና እያንዳንዳቸው ከ50,000 ብር በላይ ግምት ያላቸው ሙሉ የቤት እቃዎች እስከ 5ኛው ለ 100 ዕድለኞች 5ሺ ብር እና የሞባይል ቀፎች ድረስ ይዘረዝራል፡፡

በመጨረሻም ዕድለኞቹ የሚሸለሙበትን መስፈርት “መጀመርያ የቴሌግራም ቻናላችንን ይቀላቀሉ። በመቀጠል ይህንን መልዕክት ከ50 በላይ ለሆኑ ሰዎች በፍጥነት ሼር ያድርጉ፡፡” የሚል ማሳሰቢያ አያይዟል፡፡ 

ሁለተኛው ገፅም “ዕድልዎን ይሞክሩ። በአዲስ አመት ልዩ የ500,000 ብር ስጦታ ከአባይ ባንክ” በሚል አጓጊ ርዕስ ከጀመረ በኃላ ባንኩ ለሽልማት አዘጋጅቷል ያላቸውን ሽልማቶች እስከ ስድስተኛ ደረጃ ድረስ ይገልፃል፡፡ ሽልማቶች የተባሉትም 1ኛ ላይ ካስቀመጠው “ለ50 እድለኞች 500,000 ብርና እያንዳንዳቸው ከ40,000 ብር በላይ ግምት ያላቸው ማቀዝቀዣ ፊሪጆች” አንስቶ ስድስተኛ ላይ እስካስቀመጠው ለ50 እድለኞች 5,000 ብር ድረስ ሰዎችን ሊያጓጉ የሚችሉ የተለያዩ ደረጃዎችን በረድፍ ሰድሯቸዋል፡፡

ለመሸለምም የቴሌግራም ቻናሉን መቀላቀል ፣ መልዕክቱን ለ50 ሰው ማጋራትና በባንኩ ስም ወደተከፈተው የቴሌግራም ግሩፕ መቀላቀልን እንደመስፈርት አያይዟል፡፡

ሶስተኛው ገፅም የቴሌግራም ቻናሉን በመቀላቀልና ለ50 ሰው በማጋራት ለ200 ዕድለኞች ከሚሰጠው ከ300,000 ብር በላይ ዋጋ የሚያወጡ ባለ 3 እግር ተሽከርካሪዎች እስከ ለ 100 እድለኞች 5ሺ ብር እና የሞባይል ቀፎ ድረስ መሸለም እንደሚችሉ ልጥፍ አጋርቷል፡፡ ገፁ የሽልማቱን ምክንያትም “አማራ ባንክ በ2014 መባቻ ሥራ ለመጀመር ሙሉ ዘግጅቱን አጠናቋል! … ሥራ ሲጀምር በመላ ሐገሪቱ ለሚከፈቱ ከ200 በላይ ቅርንጫፎች ደንበኞችን በቀላሉ ለማሰባሠብ የቴሌግራም ቻናል ከፍቶ እያስተዋወቀ ይገኛል፡፡” በማለት ገልፆአል፡፡

ሃቅቼክ የመረጃውን ሃቀኝነት ለማጣራት የአማራ ባንክ የቦርድ አባል የሆኑትን ዶ/ር ለጤናህ እጅጉን አነጋግሯል፡፡ የቦርድ አባሉም “በአማራ ባንክ ስም የሚወጡት የቴሌግራም መልዕክቶች የፈጠራ ወሬዎች  ናቸው” ያሉ ሲሆን አያይዘውም “ባንካችን እስካሁን ምንም አይነት የማህበራዊ ሚዲያ ገፅ ስለሌለው ደንበኞቻችን ራሳቸውን ከተመሳሳይ የሃሰተኛ መረጃዎች ይጠብቁ፡፡” ሲሉም አሳስበዋል፡፡

በሌላ በኩል ከስድስት ሳምንታት በፊት የኢትዮጵያ ንግድ ባንክ በይፋዊው የፌስቡክ ገጹ ላይ ደንበኞቹ ራሳቸውን በተቋሙ ስም ከተከፈቱ ሃሰተኛ የማህበራዊ ሚዲያ ገፆች እንዲጠብቁ ያሳሰበ ሲሆን ድርጅቱ የሚጠቀምባቸውን የማህበራዊ ሚዲያ ገፆችም በዝርዝር አስቀምጧል፡፡ 

በተያያዘም የኢትዮጵያ ንግድ ባንክንና የአባይ ባንክን ይፋዊ ድረ ገፆች ላይ የተቀመጡት የቴሌግራም አድራሻዎች ለቴሌግራም ተጠቃሚዎች ለበዓል ስለሚሰጡ ስጦታዎችም ሆነ ሽልማቶች የሚዘግቡ መረጃዎች እንደሌሉ ተመልክተናል፡፡

በመሆኑም ሃቅቼክ በቴሌግራም ላይ የተዘዋወሩት መልዕክቶች በባንኮቹ ዕውቅና የሌላቸው አታላይ መልዕክቶች እንደሆኑ ማረጋገጥ ችሏል፡፡

ተጠቃሚዎች እንዲህ አይነት መረጃዎችን በሚመለከቱበት ጊዜ፡

  • የድረ ገፁን ስም እና አድራሻ በሚገባ ማጤን
  • መረጃዎችን እንደመጡ ከማመን ይልቅ በጥንቃቄ መመልከት፣ የላኪውን ትክክለኛ አድራሻ ማረጋገጥ
  • በፍጥነት እርምጃ ከመውሰድ መቆጠብ፣ ጊዜ ወስዶ መመርመር
  • የተጠቀሰውን አካል (ድርጅት) በቀጥታ መጠየቅ ይመከራል።

Exit mobile version