ምስሉ የፋኖ ታጣቂዎች የመከላከያን ሄሊኮፕተር መትተው እንደጣሉ ያሳያል?

አንድ የፌስቡክ ገፅ  ይህንን (ከታች ያለው) ምስል  የመከላከያ ጦር ሄሊኮፕተር በፋኖ ታጣቂዎች ተመቶ መውደቁን  ያሳያል በማለት አጋርቷል። ይህ ጽሁፍ እስከታተምበት ጊዜ ድረስ ፖስቱ ከ21 ጊዜ በላይ በመጋራት የብዙዎችን እይታ አግኝቷል።

ይሁን እንጂ ሀቅቼክ ምስሉን በማጣራት ምስሉ ፋኖ  የመከላከያን ሄሊኮፕተር መቶ እንደጣለ እንደማያሳይ በማረጋገጥ የፌስቡክ ፖስቱን ሀሰት ብሎታል።  

እ.አ.አ በየካቲት 2023 የኢትዮጵያ መንግስት  የክልል ልዩ ሀይሎችን እንዲበተኑ እና ወደ መከላከያ ሰራዊት፣ ወደ ፌደራል ፖሊስ ወይም ወደ ክልል መደበኛ ፖሊስ እንዲቀላቀሉ ወስኗል። ይህም በአማራ ክልል የሚገኘውን ፋኖ በመባል የሚጠራውን የታጠቀ ቡድን  ያበሳጨና ተቃውሞ ያስነሳ ነው ። ይህን ተከትሎ በፋኖ ታጣቂዎችና  በመንግስት ወታደሮች መካከል ብዙ ግጭቶች ተካሂደዋል።

እ.ኤ.አ. ነሀሴ 11 ቀን 2023 የወጡ ዘገባዎች እና የማህበራዊ ሚዲያ ጽሁፎች እንዳመላከቱት በዚህ ግጭት ሳቢያ በርካታ ጉዳቶች ተከስተዋል።

ምንም እንኳን መንግስት የአማራ ክልል ትላልቅ ከተሞችን መልሶ ቢቆጣጠርም አሁንም በኢትዮጵያ ሰራዊት እና በፋኖ ሚሊሻ ቡድኖች መካከል ያለው ግጭት ቀጥሏል።

ይህ በፌስቡክ የተጋራው ምስል በአማራ ክልል  የፋኖ ታጣቂዎች የመከላከያን ሄሊኮፕተር መትተው እንደጣሉ ለማሳየት የቀረበ ነው። ይህ መረጃ እውነት መሆኑን ለማረጋገጥ ሀቅቼክ የጉግል ተገላቢጦሽ ምስል መፈለጊያን በመጠቀም ምስሉን መርምሯል። በዚህም ምስሉ ከዚህ በፊት በአንድ ድህረገጽ ላይ እ.አ.አ በመጋቢት 3 ቀን 2023 የታተመ መሆኑን አረጋግጧል።

በምስሉ ላይ የሚታየው አንድ የሮማንያ የጦር ሄሊኮፕተር ሲሆን በጥቁር ባህር ላይ የጠፋው የሮማንያ ተዋጊ ጄትን ለመፈልግ እየበረረ ባጋጠመው ችግር የተከሰከሰ ነው።

ስለዚህ ሀቅቼክ  ይህ የፌስቡክ ፖስት የቆየና ትክክለኛ ያልሆነ ምስልን በመጠቀሙ ምክንያት ሀሰት ብሎታል።

ቪድዮው የፋኖ ታጣቂዎች በደብረማርቆስ መትተው የጣሉት የመከላከያን ሄሊኮፕተር አያሳይም

በነሀሴ  2023  ከ40 ሺህ በላይ ተከታዮች ያሉት አንድ የፌስቡክ ገፅ  አንድን ምስል የመከላከያ ጦር ሄሊኮፕተር በደብረ ማርቆስ  በፋኖ ታጣቂዎች  ተመቶ መውደቁን  ያሳያል በማለት  አጋርቷል። ይህ ጽሁፍ እስከሚታተምበት ጊዜ ድረስ ፖስቱ ​​​​ 7000 እይታ በማግኘት ከ300 በላይ ግብረመልሶችን አግኝቷል።

ይሁን እንጂ ሀቅቼክ ምስሉን በማጣራት ቪድዮው ፋኖ በደብረ ማርቆስ የመከላከያን ሄሊኮፕተር መትቶ እንደጣለ እንደማያሳይ በማረጋገጥ የፌስቡክ ፖስቱን ሀሰት ብሎታል።

እ.አ.አ በየካቲት 2023 የኢትዮጵያ መንግስት  የክልል ልዩ ሀይሎችን እንዲበተኑ እና ወደ መከላከያ ሰራዊት፣ ወደ ፌደራል ፖሊስ ወይም ወደ ክልል መደበኛ ፖሊስ እንዲቀላቀሉ ወስኗል። ይህም በአማራ ክልል የሚገኘውን ፋኖ በመባል የሚጠራውን የታጠቀ ቡድን  ያበሳጨና ተቃውሞ ያስነሳ ነው ። ይህን ተከትሎ በፋኖ ታጣቂዎችና  በመንግስት ወታደሮች መካከል ብዙ ግጭቶች ተካሂደዋል። ግጭቱ የተባባሰው የአማራ ብልፅግና ፓርቲ ሃላፊ የነበሩት አቶ ግርማ የሺጥላ ከተገደሉ በኋላ መንግስት የኢትዮጵያ የሀገር መከላከያ ሰራዊትን ‘ጽንፈኛ’ ያላቸው ታጣቂዎች እንዲዋጋ ባዘዘ ጊዜ ነው። አሁንም በአንዳንድ አከባቢዎች ግጭቱ እንደቀጠለ ነው።

እ.አ.አ. በነሀሴ 2023  የፋኖ ታጣቂዎች  አንዳንድ  ከተሞችን ተቆጣጥረው ነበር። መንግስትም ከተሞቹን መልሶ ለመቆጣጠር  መከላከያ ሰራዊት አሰማርቷል። በዚህም እነዚህ ትላልቅ ከተሞች መመለስ ችለዋል፣ ነገር ግን ግጭቱ አሁንም በአንዳንድ ቦታዎች እየተካሄደ ነው።

ይህ በፌስቡክ የተጋራው ምስል በአማራ ክልል የፋኖ ታጣቂዎች በደብረ ማርቆስ የመከላከያን ሄሊኮፕተር  መትተው እንደጣሉ ያሳያል ከሚል መረጃ ጋር ተጋርቷል። ይሁን እንጂ ምስሉ ከዚህ በፊት ፌስቡክ ላይ በሚያዝያ 21 ቀን 2023 ታትሞ ከነበረው ቪድዮ የተወሰደ እንደሆነ ሀቅቼክ አረጋግጧል። ቪድዮው እና ምስሉ ከአዲስ አበባ ወደ ጅማ ሲበር በሞተር ብልሽት ምክንያት የተከሰከሰ የሚድሮክ ኢትዮጵያ (ትራንስ ኔሽን ኤርዌይስ) የሆነውን ሄሊኮፕተር ያሳያል።

ስለዚህም ሀቅቼክ ይህን የፌስቡክ ፖስት ትክክል ያልሆነና የቆየ ምስል በመጠቀሙ ሀሰት ብሎታል።

ምስሉ ወደ አማራ ክልል በአውሮፕላን ተጭነው የሚሄዱ ወታደሮችን አያሳይም

ከ50ሺህ በላይ ተከታዮች ያሉት አንድ የትዊተር ገፅ ወደ አማራ ክልል የሚሄዱ ወታደሮችን የጫነ አውሮፕላንን ያሳያል በማለት  አንድን ምስል አጋርቷል።

ይህ ጽሁፍ እስከሚታተምበት ጊዜ ድረስ ፖስቱ​​​​ 61 ጊዜ ያህል ተጋርቶ እና ከ80 በላይ ግብረመልሶችን አግኝቶ ነበር።

ይሁን እንጂ ሀቅቼክ ምስሉን ወደ አማራ ክልል የሚሄዱ ወታደሮችን የጫነ አውሮፕላንን እንደማያሳይ አረጋግጧል። በዚህም የትዊተር ፖስቱ ሀሰት ተብሏል።

እ.አ.አ በየካቲት 2023 የኢትዮጵያ መንግስት  የክልል ልዩ ሀይሎችን እንዲበተኑ እና ወደ መከላከያ ሰራዊት፣ ወደ ፌደራል ፖሊስ ወይም ወደ ክልል መደበኛ ፖሊስ እንዲቀላቀሉ ወስኗል። ይህም በአማራ ክልል የሚገኘውን ፋኖ በመባል የሚጠራውን የታጠቀ ቡድን  ያበሳጨና ተቃውሞ ያስነሳ ነው ። ይህን ተከትሎ በፋኖ ታጣቂዎችና  በመንግስት ወታደሮች መካከል ብዙ ግጭቶች ተካሂደዋል።

እ.ኤ.አ. ነሀሴ 11 ቀን 2023 የወጡ ዘገባዎች እና የማህበራዊ ሚዲያ ጽሁፎች እንዳመላከቱት በዚህ ግጭት ሳቢያ በርካታ ጉዳቶች ተከስተዋል።

ምንም እንኳን መንግስት የአማራ ክልል ትላልቅ ከተሞችን መልሶ ቢቆጣጠርም አሁንም በኢትዮጵያ ሰራዊት እና በፋኖ ሚሊሻ ቡድኖች መካከል ያለው ግጭት ቀጥሏል።

በዚህ መነሻነት የኢትዮጵያ መንግስት ወታደሮች በአውሮፕላን ወደ አማራ ክልል እያጓጓዘ እና እያሰማራ እንደሆነ የሚገልጽ አንድ የኤክስ (ትዊተር) ፖስት ተመልክተናል። ፖስቱ አንድ ምስል አያይዞ ነበር የተጋራው። ይህ በኤክስ የተጋራው ምስል  የመከላክያ ወታደሮች በሄሊኮፕተር ወደ አማራ ክልል እየተወሰዱ ያሳያል በማለት የቀረበ ነው።

ይሁን እንጂ ምስሉ ከቆየ ቪድዮ ላይ ተቆርጦ የተወሰደና ዋናው ምስል በፌስቡክ ነሀሴ 2 ቀን 2021 በተሰራጨ ቪዲዮ ላይ የኢትዮጵያ አየር መንገድ ወታደሮች፣ ሎጅስቲክስ እና የጦር መሳሪያን ወደ ትግራይ አጓጉዟል ከሚል ፖስት ላይ የተወሰደ ነው።

ስለዚህ ሀቅቼክ  የኤክስ ፖስቱን ሀሰት ብሎታል።

ምስሉ በቅርቡ በፍኖተ ሰላም የተፈፀመ የአየር ጥቃትን ያሳያል?

ከ40ሺህ በላይ ተከታዮች ያሉት አንድ የፌስቡክ ገፅ የኢትዮጵያ መንግስት በቅርቡ በፍኖተ ሰላም የአየር ላይ ጥቃት በመፈጸም ከሶስት አመት በታች ያሉ ህጻናትን ጨምሮ 270 ንፁሀን ዜጎችን ገድሏል በሚል ይህን  ምስል  በስፋት አጋርቷል።

ይህ ጽሁፍ እስከሚታተምበት ጊዜ ድረስ ፖስቱ ​​​​ 7000 ጊዜ ያህል በመታየት  ከ 300 በላይ ግብረመልሶችን አግኝቷል።

የፌድራል መንግስት እና በአማራ ክልል  በፋኖ ሚሊሻ ቡድኖች መካከል ግጭት እንዳለ ይታወቃል። ይህ ግጭት የተፈጠረው መንግስት የክልሉ የልዩ ሃይሎች ትጥቅ ፈትተው ከሌሎች የጸጥታ አደረጃጀቶች  ማለትም መክላክያ፣ ፌደራል ፖሊስ ወይም የክልል ፖሊስ ተቋማት ጋር እንዲዋሃዱ ባዘዘ ጊዜ ነው።

በአማራ ክልል እነዚህ የታጠቁ ሚሊሻዎች በርካታ አካባቢዎች ከተቆጣጠሩ በኋላ፣ የኢትዮጵያ ፌደራል መንግስት በክልሉ  የአስቸኳይ ጊዜ አዋጅ አውጇል።

እ.ኤ.አ. ነሀሴ 11 ቀን 2023 የወጡ ዘገባዎች እና የማህበራዊ ሚዲያ ጽሁፎች በአማራ ክልል በተከሰተው ግጭት በርካታ ጉዳቶች መከሰታቸውን ይጠቁማሉ።

መንግስት በፋኖ ታጣቂዎች ጋር ባደረገው የመልሶ ማጥቃት ዘመቻ ዋና ዋና ከተሞችን መልሶ መቆጣጠር ችሏል። ያም ሆኖ በክልሉ ግጭቶች እንደቀጠሉ መረጃዎች ያሳያሉ።

ይህ በፌስቡክ የተጋራው ፎቶ የኢትዮጵያ አየር ሃይል በአማራ ክልል ፍኖተ ሰላም በተባለ ቦታ ላይ ጥቃት አድርሶ 270 ንጹሃንን  እንደገደለ ለማሳየት የቀረበ ነው። ይህ መረጃ እውነት መሆኑን ለማረጋገጥ ሀቅቼክ የጉግል ተገላቢጦሽ ምስል መፈለጊያን በመጠቀም ምስሉን መርምሯል። በዚህም ምስሉ ከዚህ በፊት በፌስቡክ ላይ የተለጠፈው በሀምሌ 21 ቀን 2023 መሆኑን አረጋግጧል።

በወቅቱ የተጋራው ይህ የፌስቡክ ፖስት የአውሮፕላኖቹን ብቃት  እንደሚያሳይ ከሚገልፅ ፅሁፍ ጋር ተጋርቶ ነበር። 

ስለዚህ ሀቅቼክ  በፍኖተስላም  የድሮን ጥቃት እንደነበረ እና ሰዎች እንደሞቱ የወጡ ዜናዎች ቢኖሩም፤ ነገር ግን ይህ የፌስቡክ ፖስት የቆየ ምስልን በመጠቀሙ ምክንያት ሀሰት ብሎታል።

አለምን ያወዛገቡ አስር የሀሰተኛ መረጃ ዘመቻዎች እና ጉዳታቸው

በታሪክ አጋጣሚዎች ውዝግብ ለመፍጠር፣ የህብረተሰቡን አስተሳሰብ ለመቀየር፣ እንዲሁም ማህበራዊ እና ፖለቲካዊ አለመረጋጋትን ለመፍጠር በማሰብ ሀሰተኛ መረጃዎች ሆን ተብለው ይሰራጫሉ።

እስቲ በታሪክ አጋጣሚ የተሰራጩ ታዋቂ ሀሰተኛ መረጃዎች እና ዘመቻዎችን እንመልከት፦

  1. የጽዮን (አይሁድ) ሽማግሌዎች ሰነድ

ይህ ፅሁፍ ፀረ አይሁድ እና ሆን ተብሎ የተፈጠረ ሲሆን አይሁዶች አለምን ለመቆጣጠር እያሴሩ እንደሆነ የሚገልፅ ነው። ሰነዱ ለመጀመሪያ ጊዜ የታተመው በፈረንጆቹ 1903 በሩሲያ ውስጥ ነበር። ከዚያ በኋላ ይህ ፅሁፍ አሁን ድረስ ሰዎች አይሁዶች ላይ ጥላቻ እና አመፅ እንዲቀሰቅሱ እያደረገ ይገኛል። በዚህ መፅሀፍ ውስጥ ያለው መረጃ ሀሰተኛ መሆኑ ቢረጋገጥም አሁንም ድረስ በአንዳንድ የአለማችን ክፍሎች ዘንድ ይታመናል።

    2. ኤድስ በአሜሪካ እንደተፈጠረ

በፈረንጆቹ 1980ዎች የሶቭየት ህብረት ሀሰተኛ መረጃን ኦፕሬሽን ኢንፌክሽን (Operation INFEKTION) በሚል ዘመቻ አሜሪካ የኤች አይቪ ቫይረስን ለጦር መሳሪያነት በማሰብ በቤተሙከራ ፈጥራዋለች በማለት አሰራጭታ ነበር።

ይህ መረጃ በተለያዩ የሚድያ አማራጮች ላይ በስፋት መነገሩን ተከትሎ ኤች አይ ቪ ኤድስ ያለባቸው ሰዎች ላይ ትልቅ ጭንቀትና መገለል ፈጥሮ ነበር።

   3. የኢራቁ ሳዳም ሁሴን ጅምላ ጨራሹ መሳርያ

በፈረንጆቹ 2003 በኢራቅ ላይ በተደረገው ወረራ የአሜሪካ መንግስት እና አጋሮቿ ኢራቅ የጅምላ ጨራሽ መሳሪያዎች አላት ብለው ነበር። ይህ መረጃ ኢራቅን ለመውረር እና የሳዳም ሁሴን መንግስት ለመገርሰስ እንደ ምክንያት ቀርቦ ነበር። በኋላ ምንም አይት የጅምላ ጨራሽ መሳሪያዎች አለመገኘታቸውን ተከትሎ መረጃው በአለም አቀፍ ደረጃ ውግዘትን እና በመንግስት ላይ ያለን እምነት መሸርሸር እስከትሎአል።

  4. የራሽያ ጣልቃ ገብነት በ2016 የአሜሪካ ምርጫ

የአሜሪካ የደህንነት ተቋማቶች በ2016ቱ የአሜሪካ ፕሬዝደንታዊ ምርጫ የሩሲያ መንግስት የተለያዩ ዘመቻዎችን በማዘጋጀት በምርጫው ላይ ጣልቃ ገብቶ እንደነበር ይገልፃሉ። ይህም የተለያዩ የማህበራዊ ሚድያ ቦቶችን በመጠቀም ሀሰተኛ መረጃዎችን ማሰራጨት፣ የዲሞክራት ፓርቲ የኢሜል መልዕክቶችን በመጥለፍ ወዘተ ተሳትፏል ተብሏል። ይህ የራሽያ ጣልቃ ገብነት በምርጫ ሂደቱ ላይ የነበረውን እምነት ከመሸርሸሩም ባለፈ በአሜሪካ ውስጥ ፅንፈኝነት እንዲነግስ አድርጓል።

  5. የኮሮና ቫይረስን በተመለከተ የተሰራጩ የውሸት መረጃዎች

በኮቪድ 19 ወረርሽኝ ወቅት ስለ ቫይረሱ ምንጭ ፤ ስለክትባቱ እና ስለበሽታው አደገኛነት የሚመለከቱ የተለያዩ ሀሰተኛ መረጃዎች ሲሰራጩ ቆይተዋል። ይህም በማህበረሰቡ እና በህክምና ባለሙያዎች ዘንድ መወዛገብና አለመተማመን አስከትሏል። ታድያ እነዚህ ሀሰተኛመረጃዎች የኮሮና ቫይረስን ለመቆጣጠር የሚደረገውን ጥረት በእጅጉ ጎድቶታል።

  6. የራሽያው የቀድሞ ሰላይ መመረዝ

በፈረንጆቹ 2018 የቀድሞ የሩሲያ ሰላይ የነበረ ሰርጌ ስክሪፓል እና ሴት ልጁ ዩሊያ በእንግሊዝ ሳሊስበሪ ከተማ በነርቭ ጋዝ ተመርዘው ነበር። የእንግሊዝ መንግስት ለጥቃቱ የሩሲያን መንግስት የወነጀለ ሲሆን በተቃራኒው ሩሲያ ይህንን ጥቃት የፈፀመው የእንግሊዝ መንግስት መሆኑን ገልፆ ነበር።

  7. የካታሎንያ የነጻነት ሪፈረንደም

በፈረንጆቹ 2017 በስፔን የምትገኘው ካታሎኒያ የመገንጠል /ህዝበ ውሳኔ/ ጥያቄ  አቅርባ ነበር። የስፔን መንግስት ይህን የመገንጠል ጥያቄ /ህዝበ ውሳኔው/ ህገወጥ ነው በማለት ተናግሮ ነበር። ይህንን ተከትሎ በሁለቱም ወገኖች ሀሰተኛ መረጃዎች ሲሰራጩ ነበር። የመገንጠል ጥያቄ ደጋፊዎች መንግስት ሀሰተኛ መረጃን እያሰራጨ ነው ቢሉም በምላሹ የስፔን መንግስት እነዚህ የመገንጠል ጥያቄውን የሚደግፉ አካላት ሀስተኛ መረጃን እና አመፅን የሚቀሰቅሱ መረጃዎችን በማህበራዊ ሚድያ ላይ እያጋሩ ነው በማለት ገልፆ ነበር።

  8. የእንግሊዝ ከአውሮፓ ህብረት የመውጣት ህዝበ ውሳኔ

በፈረንጆቹ 2016 የእንግሊዝ መንግስት ከአውሮፓ ህብረት ለመውጣት ህዝበ ውሳኔን አካሂዶ ነበር። ይህንን ተከትሎ የተለያዩ ሀሰተኛ መረጃዎች ሲሰራጩ ቆይተዋል። ከነዚያም መካከል እንግሊዝ ህብረቱን ለቃ ከወጣች በሳምንት እስከ 350 ሚልዮን ፓውንድ ታተርፋለች የሚሉ መረጃዎች ሲሰራጩ ነበር። በሌላ በኩል እንግሊዝ ህብረቱን ለቃ ከወጣች የኢኮኖሚ ቀውስ ይከሰታል የሚሉ የተጋነኑ ዘመቻዎችም ነበሩ። የሀሰተኛ መረጃ አስተዋፅኦ ለዚህ ህዝበ ውሳኔ እስካሁን ድረስ ለቀጠሉ ውዝግቦች መንስኤ ሆኗል።

  9. የ2015ቱ የስደተኞች ቀውስ

በፈረንጆቹ 2015 ግሪክ ለስደተኞች ወደ አውሮፓ መግቢያ ዋነኛ ቦታ ሆና ነበር። ይህንን ከፍተኛ የሆነ የስደተኛ ቁጥርን ተከትሎ በስደተኞቹ ላይ ያነጣጠሩ ሀሰተኛ መረጃዎች ሲሰራጩ ነበር። ከዘመቻዎቹ መካከል የወንጀል ቁጥር ጨምሯል ፣ የሽብር ስጋቶች በርትተዋል የሚሉ ይገኙበታል።

  10. የዩክሬን ጦርነት

ከፈረንጆቹ 2014 ጀምሮ በሩሲያ እና ዩክሬን መካከል ግጭት እና የሀሰተኛ መረጃ ዘመቻዎችን ነበሩ።  የሩሲያ መገናኛ ብዙሃን ጣቢያዎች የዩክሬንን መንግስት ፋሽሽታዊ አገዛዝ ነው ሲሉ ነበር። እነዚህ ዘመቻዎች ግጭቱን ሲያባብሱ እና በዩክሬንና ራሽያ ህዝቦች መካከል የጥላቻ ስሜት ሲቀሰቅሱ ኖሯል።

ሀሰት ፡ ምስሉ በታላቁ የህዳሴ ግድብ ሰራተኞች ላይ ጥቃት ያደረሱ የጉሙዝ ታጣቂዎችን አያሳይም

ከ290 ሺህ በላይ ተከታይ ያለው የፌስቡክ ገፅ “የህዳሴ ግድቡ ንብረት አመላላሽ የነበሩ ሰራተኞች በጉዞ ላይ እያሉ በጉሙዝ ታጣቂዎች ጥቃት ተፈጽሞባቸዋል” የሚል ፅሁፍን በማያያዝ አንድ ምስል አጋርቶ ነበር።

ይህ ፅሁፍ ለንባብ እስከበቃበት ጊዜ ድረስ የፌስቡክ ፖስቱ ከ10 ሺህ ጊዜ በላይ ግብረመልስ ያገኘ ሲሆን ከ1200 ጊዜ በላይ መጋራት ችሏል። 

ይሁን እንጂ ሀቅቼክ የምስሉን ትክክለኛነት መርምሮ ሀሰት ብሎታል። 

ታላቁ የህዳሴ ግድብ በአፍሪካ ትልቁ የውሃ ኃይል ማመንጫ ፕሮጀክት ሲሆን ፕሮጀክቱ ሲጠናቀቅ እስከ 6450 ሜጋዋት ሃይል ያመነጫል። ግድቡ ከሱዳን በስተምስራቅ 48 ኪ.ሜ ርቀት ላይ በቤንሻንጉል ጉሙዝ ክልላዊ መንግስት በምትገኘው ጉባ ላይ እየተገነባ ያለ ግዙፍ ፕሮጀክት ነው።   

በየካቲት 23 ፤ 2009 ዓ.ም የኢትዮጵያ የኮምዩኒኬሽን ሚኒስትር ዴኤታ እንደተናገሩት የጸጥታ ሀይሎች በቤንሻንጉል ክልል በህዳሴ ግድቡ አቅራቢያ ከቤንሻንጉል ክልል አማጽያን ጋር ግጭት ውስጥ ገብተው ነበር።”

የተለያዩ የዜና ምንጮችም በግጭቱ 13 የሚሆኑ የአማጽያኑ አባላት እንደተገደሉ አስነብበዋል። አማጽያኖቹ የተለያዩ ፈንጂዎችን ፣ ቦምቦች እና ልዩ ልዩ የጦር መሳሪያዎችን ይዘው እንደነበረ የሚያሳዩ የተለያዩ ሪፖርቶች አሉ። 

በሚያዝያ 7 ፤ 2009 ዓ.ም ብዙ ቢልየን ዶላሮች ፈሰስ በተደረገበት በዚህ ግዙፍ የውሃ ሃይል ማመንጫ ፕሮጀክት አካባቢ ጥቃት ፈጽመው በነበሩት 10 የሚደርሱ የቤንሻንጉል ጉሙዝ ህዝቦች ንቅናቄ አማጽያን ላይ ፍርድ ቤት ብይን ሰቷል። 

ይህ የፌስቡክ ፖስትም ይህን ሀሳብ ላይ መሰረት አድርጎ የተጋራ ነው። 

ሀቅቼክ ይህ የፌስቡክ ፖስት የተጠቀመውን ምስል በተለያዩ ፅሁፎች ላይ አግኝቶታል። ለምሳሌ ይህ ምስል በነሃሴ 26 ፤ 2009 ዓ.ም International Business Times  በተባለ ድረ-ገፅ ላይ የ26 ዓመቱ አሜሪካዊ ጋዜጠኛ ክሪስቶፈር አለን ደቡብ ሱዳን ውስጥ በነበረ ግጭት ምክንያት ተገድሎ መገኘቱን የሚያሳይ ጽሁፍ ይዞ ወቷል። 

ምስሉም በደቡብ ሱዳን ያሉ አማጽያንን የሚያሳይ ሲሆን እነሱም አብረው ከሚዋጉ ጓዶቻቸው ጋር ለመመሳሰል እንዲረዳቸው በጭንቅላታቸው ላይ ቀይ ጨርቅ እንደሚያስሩ ይህ ፅሁፍ ያስነብባል።     

የጉሙዝ ታጣቂዎች በግድቡ አቅራቢያ ጥቃትን እንደከፈቱ የሚያሳዩ የተለያዩ መረጃዎች ቢኖሩም አብዛኞቹ የፌስቡክ ገጾች ይህንኑ ምስል ተጠቅመዋል። 

ስለዚህ ሀቅቼክ የፌስቡክ ገጾቹ የተጠቀሙትን ምስል መርምሮ ሀሰት ብሎታል። 

አሳሳች፡ ሩስያ በኢትዮጵያ የኒውክለር ኃይል ማመንጫ እንጂ የኒውክለር የጦር መሳሪያ ማምረቻ የማቋቋም ዕቅድ የላትም

አንድ የፌስቡክ ገፅ የካቲት 30 ፤ 2014 ዓ.ም በሰበር ዜና መልክ “ሩስያ በኢትዮጵያ ትልቁን የኒውክለር ማብላያ ልትከፍት ነው” በሚል ፅሁፍ የከባድ ሚሳኤሎች ምስል አጋርቶ ነበር።

 

ከጥቂት ሳምንታት በፊት በሩስያ እና በዩክሬን መካከል ግጭት ተከስቷል። ይህ የተከሰተውን ግጭት ተከትሎ በኔቶ እና በሩስያ መካከል የኒውክለር ጦርነት ሊከሰት ይችላል የሚሉ ስጋቶች ባሉበት ሁኔታ ይህ መረጃ ተጋርቷል።

በሚያዝያ ወር 2011 ዓ.ም ሩስያ በኢትዮጵያ በቀጣዮቹ አስር አመታት ውስጥ የኒውክለር ኃይል ማመንጫ ለመገንባት ከስምምነት ላይ ደርሳለች።

በታህሳስ 2013 ዓ.ም የኢትዮጵያ የህዝብ ተወካዮች ምክር ቤት የኒውክለር ኃይልን ለሰላማዊ አላማ በማዋል ዙርያ ከሩስያ ጋር የተደረገውን ስምምነት አፅድቋል። በመጋቢት ወር 2014 ዓ.ም ኢትዮጵያ እና ሩስያ የኒውክለር ኃይልን ለሰላማዊ መንገድ በመጠቀም ዙሪያ ውይይት አድርገዋል።

ይህ የፌስቡክ ፖስት አሳሳች ከሆነበት ምክንያት አንዱ በፅሁፉ ካቀረበው ኃሳብ ጋር በጣም ትልልቅ እና ዘመናዊ ሚሳኤሎችን የሚያሳይ ምስልን ማያያዙ ነው። አብዛኛው ሰው የኒውክለር ማብላያ መገንባት የሚለውን ሀሳብ እንደ ኒኩሌር መሳሪያ ቢቆጥረውም ሩስያ ከኢትዮጵያ ጋር የገባችው ስምምነት ግን የኒውክለር መሳርያ ማምረቻን ለመገንባት ሳይሆን የኒውክለር ኃይል ማመንጫ ጣብያ ለመገንባት ነው።  

በአዲስ አበባ የሩስያ ኤምባሲ ለሀቅቼክ በኢሜል እንደገለፀው የተደረገው ስምምነት ኢትዮጵያን በተለያዩ የኒውክለር ቴክኖሎጂ ዘርፎች ተጠቃሚ እንድትሆን እንደሚያስችላት ገልጸዋል። 

ይህ የፌስቡክ ፖስትም ትልልቅ የሚሳኤል ምስሎችን በማያያዝ በሁለቱ ሀገሮች መካከል ካለው ስምምነት በራቀ መልኩ የኒውክለር ጦር መሳሪያ ማምረቻ ጣቢያ ሊቋቋም እንደሆነ አስነብቧል። 

ከዚህም በተጨማሪ ሀቅቼክ ምስሉን በማጣራት ምስሉ የተወሰደው በመስከረም ወር 2012 ዓ.ም  በChina Central Television (CCTV) ላይ ከተላለፈ ቪድዮ እንደሆነ አረጋግጧል። ቪድዮው በመስከረም 19 ፤ 2012 ዓ.ም የቻይናው ኮሚኒስት ፓርቲ ከፈረንጆቹ ጥቅምት 1 ፤ 1949 ጀምሮ ስልጣን የያዘበትን 70ኛ አመት ክብረ በዓል በሚያከብርበት ቀን የተደረጉ ወታደራዊ ትርኢቶችን ያሳያል።  

በፌስቡክ ፖስቱ ላይ የተመለከቱት ከባድ ሚሳኤሎችም የተወሰዱት ከዚሁ ወታደራዊ ትርኢት ላይ ነው። ሚሳኤሉ DF (Dongfeng) ሲባል ትርጉሙ በመንደሪን ቋንቋ ‘ሚሳኤል’ ማለት ነው። 

ይህ 5B ሞዴል የሆነው የሚሳኤል አይነት እጅግ ውስብስብና አህጉር አቋራጭ ባልስቲክ ሚሳኤል ነው።  

የተለያዩ መረጃዎች የሚገኙበት እና Britannica የሚባለው ድረ-ገጽ ይህ ባልስቲክ ሚሳኤል ትልልቅ ፈንጂዎችን በተጨማሪም የኬሚካል ፣ የባዮሎጂካል ወይም የኒኩሌር መሳርያዎችን ሊሸከም እንደሚችል ያስነብባል።

ይህን ቪድዮ ካስተላለፉት የዜና አውታሮች መካከል አንዱ የሆነው CGTN በወታደራዊ ትርኢቱ ላይ የታዩት Dongfeng-5B የተባሉት ባልስቲክ ሚሳኤሎች የኒኩሌር ሚሳኤል እንደሆኑ ዘግቧል።

ይሁን እንጂ የፌስቡክ ፖስቱ ካቀረበው ሩስያ በኢትዮጵያ የኒውክለር ማብላያ ጣቢያ ልትገነባ ነው ከሚለው መረጃ አንፃር፣ የባልስቲክ ሚሳኤሉን የሚያሳየው ምስል የፌስቡክ ፖስቱን አሳሳች የሚያደርገው ሲሆን መረጃውን ለመደገፍ የታዩት ባልስቲክ ሚሳኤሎችም የሩስያ ሳይሆኑ የቻይና እንደሆኑ ተረጋግጧል።

ስለዚህ ሀቅቼክ የፌስቡክ ፖስቱን አጣርቶ አሳሳች ብሎታል።          

ሀሰት፡ ምስሉ በቅርቡ በጨለንቆ የተደረገን ህዝባዊ ሁነት አያሳይም

126ተኛው የአድዋ ድል በዓል በሚከበርበት የካቲት 23 ፤ 2014 ዓ.ም ቀን ላይ ከ46 ሺህ በላይ ተከታይ ያለው አንድ የፌስቡክ ገጽ “ጨለንቆ ላይ የምኒሊክ አረመኔነት ታስቦ ውሏል” በሚል ጽሁፍ አንድ ምስል አጋርቶ ነበር።

ይህ ጽሁፍ ለንባብ እስከበቃበት ጊዜ ድረስ የፌስቡክ ፖስቱ ከአንድ ሺህ በላይ ግብረ መልስ ሲያገኝ ከ217 ጊዜ በላይ ደግሞ መጋራት ችሏል።

 ይሁን እንጂ ይህ የፌስቡክ ገጽ የተጠቀመው ምስል በ2007 ዓ.ም The Oromian Economist ከተባለ ድረ-ገጽ ላይ የተወስደ እንደሆነ ሀቅቼክ አረጋግጧል። 

126ተኛው የአድዋ ድል በዓል የካቲት 23 ቀን በመላው ኢትዮጵያ ተከብሮ ውሏል። ይህ የአድዋ ድል የመታሰቢያ ቀን በመዲናዋ አዲስ አበባም በአድዋ ድልድይ እና ሚኒሊክ አደባባይ በተለያዩ ሁነቶች ተከብሮ ውሏል። 

የኦሮሞ መብት ተከራካሪዎች አያሌ የኦሮሞ ሰማዕታት በጨለንቆ ጦርነት ላይ ለነፃነት ፣ ከጥገኝነት ለመላቀቅ ፣ ለፍትህ እና ለሰብዓዊነት እንደተዋደቁ ይናገራሉ። የጨለንቆ ጭፍጨፋ የመታሰቢያ ሀውልት ምርቃት የተከናወነው በመጋቢት 12 ፤ 2007 ዓ.ም በምስራቅ ሀረርጌ ነበር።

የጨለንቆ ጦርነት የተካሄደው በጥር ወር 1879 ዓ.ም በሸዋው ንጉስ አጼ ምኒልክ እና በሀረሩ ኢሚር አብደላህ ሁለተኛው መካከል ነበር። በጦርነቱ የሸዋው ንጉስ አጼ ሚኒሊክ  የሀረሩን ኢሚር አብደላ አሸንፈዋል። 

   

ሀቅቼክ ባደረገው ምርመራ እንዳረጋገጠው The Oromian Economist “በመጋቢት 12 ፤ 2007 ዓ.ም የጨለንቆ ጭፍጨፋ የመታሰቢያ ሀውልት ምረቃ” በሚል ርዕስ በቀረበ ፅሁፍ ውስጥ ይህን ምስል ተጠቅሞት ነበር። ይህ የዜና ሪፖርትም ከምርቃቱ ሁነት ላይ የነበሩ የተለያዩ ምስሎች እና ቪድዮዎችን አያይዞ አጋርቶ ነበር። 

በዚህም መስረት ያቀረበውን ሪፖርት ለመደገፍ የፌስቡክ ገጹ የተጠቀመበትን ምስል ወቅታዊነት አጣርቶ ሀቅቼክ ሀሰት ብሎታል።  

  ቪድዮው ከትግራይ ክልል የተዘረፉ ጥንታዊ ቅርሶችን ያሳያል ?

 ከ13 ሺህ በላይ ተከታይ ያለው የፌስቡክ አካውንት፣ “ከትግራይ የተዘረፉ ቅርሶች ለአለም ገበያ በዚህ አይነት ሁኔታ እየተቸበቸቡ ነው።” የሚል ጽሁፍ በማያያዝ africanews.com ወደተባለ ድረ-ገጽ የሚመራ ሊንክ አጋርቷል።

Africanews.com የተባለው ይህ ድረ-ገጽ በየካቲት 7 ፤ 2014 ዓ.ም “Tigray conflict surge in ancient ethiopian relics for sale.” የሚል ርዕስ ያለውን አንድ ቪድዮ አውጥቶ ነበር። 

ይህ ጽሁፍ ለንባብ እስከበቃበት ጊዜ ድረስ የፌስቡክ ፖስቱ ከ200 በላይ ግብረመልስ ያገኘ ሲሆን ከ90 ጊዜ በላይ ደግሞ መጋራት ችሏል።  ይሁን እንጂ ሀቅቼክ ባደረገው ማጣራት መሰረት ቪድዮው ከትግራይ ክልል ተዘርፈው በኤሌክትሮኒክስ መገበያያ ድረ-ገጽ ላይ ለሽያጭ የቀረቡ ቅርሶችን እንደማያሳይ አረጋግጧል።

ይሁን እንጂ የፌስቡክ ፖስቱን ለመደገፍ የቀረበውን ቪድዮ ትክክለኛነት መርምሮ ሀቅቼክ ሀሰት ብሎታል። 

ከጥቅምት 2013 ዓ.ም ጀምሮ በትግራይ ነጻ አውጪ ግንባር (ህወሓት) እና በፌደራሉ መንግስት መካከል የተከሰተው ግጭት ከአንድ አመት በላይ አሳልፏል።

በጦርነቱ ወቅት በተለያዩ አጋጣሚዎች እና ወቅቶች ትላልቅ ሃይማኖታዊ እና ታሪካዊ ቅርሶች ለውድመት የተዳረጉ ሲሆን የኢትዮጵያ የፌደራል መንግስትም በጦርነቱ ምክንያት ለወደሙት እድሜ ጠገብ እና ጥንታዊ መስጊዶችን እንዲሁም ቤተክርስትያኖችን ለመጠገን እና ወደቀድሞ ቦታቸው ለመመለስ ቃል ገብቷል።  

የእንግሊዙ ጋዜጣ The independent እንደዘገበውነ e-bay የተባለው የመገበያያ ድረ-ገጽን ጨምሮ በተለያዩ ድረ-ገጾች ላይ በትግራይ ክልል በነበረው ጦርነት ምክንያት ከቤተ-ክርስትያኖች የተዘረፉ እንደሆኑ የሚገመቱ ቅርሶች ለሽያጭ እየቀረቡ እንደሆነ ዘግቧል።

E-bay የተባለው የኤሌክትሮኒክስ መገበያያ ድረ-ገጽ ለሽያጭ ቀርበው የነበሩ አንዳንድ የኢትዮጵያ ጥንታዊ ቅርሶችን ከገጹ ላይ ያወረደ ቢሆንም አሁንም ድረስ አንዳንድ ታሪካዊ እና ሃይማኖታዊ የሆኑ ቅርሶች በዚህ ድረ-ገጽ ላይ ለሽያጭ ቀርበው ይገኛሉ።

Africanews.com የተባለው ድረ-ገጽ ባያያዘው ቪድዮ ላይ “ከአንድ አመት በላይ በፈጀው ጦርነት ምክንያት ጉዳት ከደረሰባቸው ቅርሶች መካከል ክፍለ ዘመናትን ያስቆጠሩ የብራና ላይ ጽሁፎች በጥቂት ዶላሮች  ዋጋ በተለያዩ ድረ-ገጾች ላይ እየቀረቡ ነው” በማለት ይናገራል።

እነዚህ ለሽያጭ የቀረቡት ቅርሶች በሰሜኑ የኢትዮጵያ ክፍል በተከሰተው ጦርነት ምክንያት የተዘረፉ ቅርሶች ሊሆኑ እንደሚችሉም ይህ የዜና ድረ-ገጽ ይዘግባል።

ሀቅቼክ የመረጃውን ትክክለኛነት ለማጣራት ባደረገው ጥረት በፌስቡክ ፖስቱ ላይ የተያያዘው ቪድዮ ለመጀመርያ ጊዜ የታተመው በህዳር 14 ፤ 2014 ዓ.ም ከ4.5 ሚልዮን በላይ ተከታይ ባለው አንድ የዩቲዩብ ቻናል ላይ ነበር።

ይህ የዩቲዩብ ቪድዮም “ተዘርፈው የነበሩ 13 ጥንታዊ ቅርሶች ከ150 ዓመታት በኋላ ወደ ኢትዮጵያ ተመልሰዋል።” የሚል ርዕስ የቀረበ ነበር። 

ይህ ጽሁፍ ለንባብ እስከበቃበት ጊዜ ድረስ ይህ ቪድዮ ከ5000 ጊዜ በላይ ታይቷል።

የተለያዩ ጥንታዊ እና ሃይማኖታዊ ቅርሶች በጦርነቱ ምክንያት ከትግራይ ክልል እንደተዘረፉ የሚያሳዩ የተለያዩ መረጃዎች ቢኖሩም የፌስቡክ ፖስቱም ሆነ የድረ-ገጹ ቪድዮ መረጃውን አያረጋግጥም።

በዚህም መሰረት፣ መረጃውን ለመደገፍ ከፖስቱ ጋር የተያያዘውን ቪድዮ ሀቅቼክ ሀሰት ብሎታል።  

ሀሰት፡ ጋዜጠኛ ታምራት ነገራ ከእስር አልተፈታም

አንድ የፌስቡክ አካውንት የተራራ ኔትዎርክ ዋና አዘጋጅ እና መስራች የሆነው ጋዜጠኛ ታምራት ነገራ ከእስር ተፈቷል በማለት የካቲት 8 ፤ 2014 ዓ.ም አንድ ምስል አጋርቶ ነበር።

ጋዜጠኛ ታምራት ነገራን ከሌሎች ሰዎች ጋር ሆኖ የሚያሳየው ይህ ከፖስቱ ጋር የሚዘዋወረው ምስል፣ “ወንድማችን ዮናስ ወልደየስ እንዳሳወቀን ታምራት ነገራ ከእስር ተፈቷል። ሰዎች ያለጥፋታቸው መታሰር መቆም አለበት” በሚል መግለጫ ተጋርቷል።

 

ታምራት ነገራ በታህሳስ 1 ፤ 2014 ዓ.ም ከቤቱ በድንገት ተወስዶ ከታሰረ በኋላ ለሳምንት ያክል ያለበት ቦታ አልታወቀም ነበር። ይሁን እንጂ ከዚያ በኋላ ታህሳስ 7 ላይ ለመጀመሪያ ጊዜ ፍርድ ቤት መቅረብ ችሏል።  

እስሩን ተከትሎ የአዲስ አበባ ፖሊስ ጋዜጠኛውን ኦሮሚያ ክልል ወደሚገኘው የገላን ፖሊስ ጣቢያ አዘዋውሮታል።   

በመጨረሻም የጋዜጠኛው ጉዳይ ወደ አስቸኳይ ጊዜ አዋጁ እንዲሸጋገር በፍርድ ቤቱ በመወሰኑ ሌላ የፍርድ ቤት ቀጠሮ እንዳያስፈልግ ሆኗል። 

በየካቲት 8 ፤ 2014 ዓ.ም የኢፌዴሪ የህዝብ ተወካዮች ምክር ቤት በህዳር ወር ላይ ታውጆ የነበረውን የአስቸኳይ ጊዜ አዋጅ አንስቷል።  

ይህን ተከትሎ የኢትዮጵያ የሰብዓዊ መብት ኮሚሽን መንግስት በአስቸኳይ ጊዜ አዋጁ ምክንያት በእስር ላይ የሚገኙ ሰዎችን በአስቸኳይ እንዲፈታ ጠይቋል።

ይህ መረጃም ይህን ሁኔታ መሰረት አድርጎ የተጋራ ነው። 

ይሁን እንጂ ሀቅቼክ ባደረገው ምርመራ ምስሉ ለመጀመሪያ ጊዜ ፖስት የተደረገው በነሃሴ 1 ፤ 2013 ዓ.ም ታምራት ነገራ በሚል  አንድ የፌስቡክ አካውንት ላይ ነበር።

ከዚያም በኋላ ይህ ምስል በቅርቡ በየካቲት 7 ፤ 2014 ዓ.ም “ነገ በተጠራው ልዩ የፓርላማ ስብሰባ SOE የሚነሳ ከሆነ ጋዜጠኛ ታምራት ነገራን ጨምሮ ሌሎች በአዋጁ ምክንያት የታሰሩ በሙሉ ከእስር ይለቀቃሉ ብዬ ተስፋ አደርጋለው።” በሚል ትዊት ላይ ተጋርቶ ነበር። 

በተጨማሪም ሀቅቼክ የታምራት ነገራን ቤተሰብ ደውሎ ያነጋገረ ሲሆን ጋዜጠኛው እስካሁን ከእስር እንዳልተፈታ ማረጋገጥ ችሏል። 

ይህም በመሆኑ፣ ታምራት ነገራ እንደተፈታ ተደርጎ የቀረበውን የፌስቡክ ፖስት ሀቅቼክ ሀሰት ብሎታል።   

Exit mobile version